ຫຼວງພະບາງຄຸມເຂັ້ມ! ສັ່ງປິດຊົ່ວຄາວ 7 ສະຖານທີ່ທ່ອງທ່ຽວສຳຄັນຂອງແຂວງ

ຫຼວງພະບາງຄຸມເຂັ້ມ! ສັ່ງປິດຊົ່ວຄາວ 7 ສະຖານທີ່ທ່ອງທ່ຽວສຳຄັນຂອງແຂວງ

2nd April 2020 0 By Admin

ເພື່ອຕ້ານ ແລະ ສະກັດກັ້ນການລະບາດຂອງພະຍາດໂຄວິດ – 19 ຫຼັງຈາກມາຮອດວັນທີ 31 ມີນາ 2020 ແຂວງຫຼວງພະບາງ ມີຜູ້ຕິດເຊື້ອ 3 ຄົນ. ສະນັ້ນ, ຫຼວງພະບາງ ຈຶ່ງໄດ້ອອກແຈ້ງການປິດ 7 ສະຖານທີ່ທ່ອງທ່ຽວສຳຄັນຂອງແຂວງ ເພື່ອຕ້ານການແພ່ລະບາດຂອງເຊື້ອພະຍາດດັ່ງກ່າວ.

ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງຫຼວງພະບາງ ໄດ້ອອກແຈ້ງການເລກທີ 03 /ຖວທຂ ລົງວັນທີ 31 ມີນາ 2020, ເຖິງຄະນະຮັບຜິດຊອບສະຖານທີ່ແຫຼ່ງທ່ອງທ່ຽວໃນຂອບເຂດທົ່ວແຂວງຫຼວງພະບາງ. ເລື່ອງ: ໃຫ້ປິດບໍລິການເຂົ້າຊົມຊົ່ວຄາວ.

ອີງຕາມສະພາບການລະບາດຂອງພະຍາດໂຄວິດ – 19; ອີງຕາມທິດຊີ້ນໍາຂອງທ່ານເຈົ້າແຂວງຫຼວງພະບາງ ຄັ້ງວັນທີ 30 ມີນາ 2020. ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງຫຼວງພະບາງ, ຂໍ້ແຈ້ງການມາຍັງຄະນະຮັບຜິດຊອບສະຖານທີ່ທ່ອງທ່ຽວໃນຂອບເຂດທົ່ວແຂວງຫຼວງພະບາງ ເປັນຕົ້ນແມ່ນຫໍພິພິທະພັນແຫ່ງຊາດຫຼວງພະບາງ, ພະທາດພູສີ, ວັດຊຽງທອງ, ວັດວິຊຸນ, ວັດອາຮາມ, ຕາດກວາງຊີ ແລະ ຖໍ້າຕິ່ງ ເພື່ອໃຫ້ປິດການບໍລິການເຂົ້າຊົມຊົ່ວຄາວ ນັບແຕ່ວັນທີ 1 ເມສາ ຫາ 21 ເມສາ 2020 ເພື່ອຕ້ານ ແລະ ສະກັດກັ້ນການລະບາດຂອງພະຍາດໂຄວິດ – 19.

ໂດຍມອບໃຫ້ຫ້ອງການພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ສົມທົບກັບພະແນກການເງິນແຂວງ ແລະ ພາກສ່ວນທີ່ກ່ຽວຂ້ອງຄົ້ນຄວ້າຈັດຕັ້ງການເວນຍາມ ເພື່ອຮັກສາຄວາມປອດໄພສະຖານທີ່ດັ່ງກ່າວ. ດັ່ງນັ້ນ, ຈຶ່ງແຈ້ງການມາຍັງບັນດາທ່ານເພື່ອຊາບ ແລະ ພ້ອມກັນຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ.

*