ສູນການຄ້າ ສີສັນໃໝ່ໃນເມືອງຫ້ວຍຊາຍ ຄາດຈະເປີດນຳໃຊ້ກາງປີໜ້າ

ສູນການຄ້າ ສີສັນໃໝ່ໃນເມືອງຫ້ວຍຊາຍ ຄາດຈະເປີດນຳໃຊ້ກາງປີໜ້າ

14th November 2019 0 By Admin

ກຸ່ມບໍລິສັດລົງທຶນພັດທະນາ ຫາຍເຊິງ ລາວ ຈໍາກັດ ໄດ້ຈັດພິທີລາຍງານຜົນສໍາເລັດການກໍ່ສ້າງ ໄລຍະທີ 1 ຂອງໂຄງການພັດທະນາສູນການຄ້າ ແລະ ການທ່ອງທ່ຽວສາກົນ ເມືອງຫ້ວຍຊາຍ ແຂວງບໍ່ແກ້ວ ປະກອບມີອາຄານ 17 ຊັ້ນ ຈໍານວນ 2 ຫຼັງ; ພາຍຫຼັງທີ່ໄດ້ລົງມືຈັດຕັ້ງປະຕິບັດມາແຕ່ເດືອນມັງ ກອນ 2019 ດ້ວຍມູນຄ່າການກໍ່ສ້າງ 40 ລ້ານໂດລາ ແລະ ໃຊ້ເວລາພຽງແຕ່ 10 ເດືອນສໍາເລັດຕາມຄາດໝາຍ. ຂະນະທີ່ ໂຄງການດັ່ງກ່າວຫາກສໍາເລັດຮຽບຮ້ອຍຈະເປີດທົດລອງນໍາໃຊ້ໃນເດືອນກັນຍາ 2020.

ທ່ານ ຫຼານ ຈາ ເຫວີຍ ຜູ້ອໍານວຍການໃຫຍ່ ກຸ່ມບໍລິສັດລົງທຶນພັດທະນາ ຫາຍເຊິ່ງ ລາວ ຈໍາກັດກ່າວວ່າ: ໂຄງການພັດ ທະນາສູນການຄ້າ ແລະ ການທ່ອງທ່ຽວ ເມືອງຫ້ວຍຊາຍໄດ້ແບ່ງການກໍ່ສ້າງອອກເປັນສອງໄລຍະ ຄື: ໄລຍະທີ 1 ໄດ້ດໍາເນີນການກໍ່ສ້າງອາຄານສູງ 17 ຊັ້ນ ຈໍານວນ 2 ຫຼັງ ນັບແຕ່ເດືອນມັງກອນ 2019 ເປັນຕົ້ນມາ ໂດຍທັງສອງອາຄານມີມູນຄ່າການກໍ່ສ້າງ 40 ລ້ານໂດລາ ໂດຍໃຊ້ເວລາພຽງແຕ່ 10 ເດືອນສໍາເລັດ ແລະ ໂອ ກາດຕໍ່ໄປຈະດໍາເນີນການກໍ່ສ້າງໂຮງແຮມ 5 ດາວ, ສໍານັກງານຫ້ອງການ, ອາພາດເມັ້ນ, ຮ້ານອາຫານ ແລະ ເຮືອນພັກລຽບ ຕາມແຄມແມ່ນໍ້າຂອງຕື່ມອີກ. ສ່ວນໄລຍະທີສອງແມ່ນກໍ່ສ້າງສູນການຄ້າປອດພາສີທັງ 5 ຕຶກ, ສະຖານບັນເທີງ, ທ່າເຮືອທ່ອງທ່ຽວສາກົນ ແລະ ສະຖານນີຂົນສົ່ງໂດຍສານ ເຊິ່ງໂຄງການດັ່ງກ່າວມີເນື້ອທີ່ທັງໝົດ 13,8 ເຮັກຕາ ໂດຍແມ່ນບໍລິສັດໃນເຄືອຂອງຫາຍເຊິ່ງກຮຸບເປັນຜູ້ຮັບເໝົາກໍ່ສ້າງ ດ້ວຍມູນຄ່າທັງ ໝົດ 100 ລ້ານໂດລາສະຫະລັດ.

ສໍາລັບການກໍ່ສ້າງທັງສອງໄລຍະຫາກສໍາເລັດຄາດວ່າຈະເປີດທົດລອງນໍາໃຊ້ອາຄານດັ່ງກ່າວ ໃນເດືອນກັນຍາ 2020 ຖືວ່າເປັນອີກໂຄງການໜຶ່ງທີ່ສ້າງສີສັນໃໝ່ຂອງເມືອງຫ້ວຍຊາຍ.

ໂອກາດນີ້, ທ່ານ ບົວສະຫວາດ ອິນທະວັນ ຫົວໜ້າພະແນກແຜນການ ແລະ ການລົງທຶນແຂວງບໍ່ແກ້ວ ໄດ້ມີຄໍາເຫັນວ່າ: ໃນ ນາມເປັນຄູ່ສັນຍາພ້ອມແລ້ວທີ່ຈະໃຫ້ການສະໜັບສະໜູນ, ອໍານວຍຄວາມສະດວກທາງດ້ານນະໂຍບາຍຕ່າງໆໃຫ້ແກ່ໂຄງການ ເພື່ອເຮັດໃຫ້ການກໍ່ສ້າງສໍາເລັດໄປດ້ວຍດີຕາມແຜນ ກຳນົດໄວ້ ແລະ ຮຽກຮ້ອງໃຫ້ຜູ້ພັດທະນາຈົ່ງໄດ້ເຊີດຊູຄວາມຮັບຜິດຊອບສູງເພື່ອຮັບປະກັນໃຫ້ແກ່ການຈັດ ຕັ້ງປະຕິບັດໂຄງການການໄດ້ຮັບຜົນສໍາເລັດ ແລະ ເປັນຕົວແບບໃຫ້ແກ່ໂຄງການອື່ນໆ ພ້ອມທັງສ້າງວຽກເຮັດງານທໍາໃຫ້ແກ່ປະຊາຊົນ, ເຮັດໃຫ້ຊິວິດການເປັນຢູ່ດີຂຶ້ນ ແລະ ສ້າງແຂວງບໍ່ແກ້ວໃຫ້ເປັນໃຈກາງ ດ້ານການບໍລິການ, ການຄ້າ ແລະ ການທ່ອງທ່ຽວໃຫ້ຫຼາຍຂຶ້ນ.

ພິທີດັ່ງກ່າວ, ໄດ້ຈັດຂຶ້ນໃນຕອນແລງວັນທີ 12 ພະຈິກ 2019 ຜ່ານມາຢູ່ບໍລິເວນດ່ານສາກົນຂົວມິດຕະພາບ 4 ໃຫ້ກຽດເຂົ້າຮ່ວມຂອງທ່ານ ພົນຈັດຕະວາ ມະລີສານ ແສງຈັນທາ ຮອງເຈົ້າແຂວງບໍ່ແກ້ວ, ມີບັນດາຫົວໜ້າພະແນກ, ຕາງໜ້າບໍລິສັດ ແລະ ຂະແໜງການທີ່ກ່ຽວຂ້ອງເຂົ້າຮ່ວມ. ປະເດັນຫຼັກ: “ອາຄານທັງສອງຫຼັງໃຊ້ເວລາກໍ່ສ້າງສໍາເລັດພາຍໃນ 10 ເດືອນ”.

ທີ່ມາ: ໜັງສືພິມບໍ່ແກ້ວ