ດີໃຈນຳ! ຜູ້ປະສົບອັກຄີໄພ 20 ຄອບຄົວ ຢູ່ເມືອງຊານໄຊ ໄດ້ຮັບການຊ່ວຍເຫຼືອ

ດີໃຈນຳ! ຜູ້ປະສົບອັກຄີໄພ 20 ຄອບຄົວ ຢູ່ເມືອງຊານໄຊ ໄດ້ຮັບການຊ່ວຍເຫຼືອ

31st March 2020 0 By Admin

ໃນວັນທີ 26 ມີນາ 2020 ນີ້ ການນໍາແຂວງອັດຕະປື ນໍາໂດຍ ທ່ານ ເລັດ ໄຊຍະພອນ ເຈົ້າແຂວງອັດຕະປື ພ້ອມດ້ວຍອໍານາດການປົກຄອງເມືອງຊານໄຊ ໄດ້ນໍາເອົາເຄື່ອງຊ່ວຍເຫຼືອບັນເທົາທຸກເບື້ອງຕົ້ນ ມູນຄ່າ 87 ລ້ານກີບ ແລະ ເງີນ 20 ລ້ານກີບ ໄປມອບໃຫ້ 20 ຄອບຄົວຢູ່ບ້ານ ດາກຍົກ ທີ່ຂື້ນກັບເມືອງຊານໄຊ ທີ່ໄດ້ປະສົບເຄາະຮ້າຍໄຟໄໝ່ເຮືອນໃນຄັ້ງວັນທີ 22 ມີນາຜ່ານມາ ເຊິ່ງມີ 20 ຫຼັງຄາເຮືອນຖືກໄຟໄໝ້ເສຍຫາຍໝົດ ແລະ ມີ 125 ຄົນໄດ້ຮັບຜົນກະທົບຂາດມີທີ່ຢູ່ອາໄສ ຕາມການປະເມີນເບື້ອງຕົ້ນໄຟ້ໄໝ້ດັ່ງກ່າວມູນຄ່າເສຍຫາຍມີປະມານ 200 ກວ່າລ້ານກີບ.


ພິທີມອບຮັບເຄື່ອງຊ່ວຍເຫຼືອບັນເທົາ ແລະ ເງີນຊ່ວຍເຫຼືອເບື້ອງຕົ້ນ ໄດ້ຈັດຂື້ນບ້ານດາກຍົກ ໃຫ້ກຽດມອບໂດຍທ່ານ ເລັດ ໄຊຍະພອນ ເຈົ້າແຂວງອັດຕະປື ແລະຮັບໂດຍຄອບຄົວທີ່ຖຶກເຄາະຮ້າຍໄຟໄໝ່ເຮືອນທັງ 20 ຄອບຄົວ ໂດຍຊ້ອງໜ້າອໍານາດການປົກຄອງເມືອງ ບ້ານ ຕະຫຼອດຮອດພໍ່ແມ່ປະຊາຊົນພາຍໃນບ້ານ . ເຄື່ອງທີ່ນໍາມາຊ່ວຍເຫລືອ ໃນເທື່ອນີ້ມີ ສັງກະສີ. ເຂົ້າສານ ແລະເຄື່ອງໃຊ້ຄົວເຮືອນຈໍານວນໜຶ່ງ.


ໂອກາດດັ່ງກ່າວ ເຈົ້າເມືອງເມືອງຊານໄຊ ຕາງຫນ້າໃຫ້ອຳນາດການປົກຄອງເມືອງ ແລະ ປະຊາຊົນທີ່ຖືກອັກຄີໄຟ ກ່າວສະແດງຄວາມຂອບໃຈ ມາຍັງອຳນາດການປົກຄອງແຂວງທຸກພາກສ່ວນທີ່ກ່ຽວຂ້ອງ ທີ່ມີຄວາມເປັນຫວ່ງເປັນໃຍ ນໍາເອົາເຄື່ອງຊ່ວຍເຫຼືອມາມອບໃຫ້ປະຊາຊົນໃນຄັ້ງນີ້ ແລະ ໃຫ້ສັນຍາວ່າຈະນຳພາຄອບຄົວທີ່ໄດ້ຮັບຜົນກະທົບຄ່ອຍສ້າງສາປັບປຸງ ໃຫ້ກັບຄືນສູ່ສະພາບປົກກະຕິໂດຍໄວ. ຂ່າວໃຫ້ຮູ້ຕື່ມອີກວ່າໃນວັນດຽວກັນ ຄອບຄົວທ່ານ ພົງໄຊ ປະທານບໍ່ຄຳວັງຕັດ ກໍ່ໄດ້ນໍາເອົາເຄື່ອງອຸປະໂພກ ບໍລິໂພກ ຈຳນວນຫນຶ່ງມາມອບໃຫ້ ຄອບຄົວຖືກອັກຄີໄຟ ຕື່ມອີກ.

ທີ່ມາ: Attapeu Media