ລົງນາມສັນຍາວ່າດ້ວຍການຮ່ວມມື ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ສປປ ເກົາຫຼີ

ລົງນາມສັນຍາວ່າດ້ວຍການຮ່ວມມື ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ສປປ ເກົາຫຼີ

29th March 2020 0 By Admin

ພິທີລົງນາມສັນຍາວ່າດ້ວຍການຮ່ວມມື ລະຫວ່າງ ກະຊວງການຕ່າງປະເທດ ແຫ່ງ ສປປ ລາວ ແລະ ສປປ ເກົາຫຼີ

ໃນຕອນບ່າຍຂອງວັນທີ 25 ມີນາ 2020, ທີ່ ກະຊວງການຕ່າງປະເທດ, ໄດ້ມີພິທີເຊັນສັນຍາວ່າດ້ວຍການຮ່ວມມື ລະຫວ່າງ ສອງກະຊວງການຕ່າງປະເທດ ແຫ່ງ ສປປ ລາວ ແລະ ສປປ ເກົາຫຼີ, ໂດຍແມ່ນ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ, ຕາງໜ້າໃຫ້ກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ລີ ຢົງ ຊົນ, ເອກອັກຄະລັດຖະທູດ ແຫ່ງ ສປປ ເກົາຫຼີ ປະຈໍາ ສປປ ລາວ, ຕາງໜ້າໃຫ້ກະຊວງການຕ່າງປະເທດ ແຫ່ງ ສປປ ເກົາຫຼີ ຮ່ວມກັນລົງນາມໃນສັນຍາດັ່ງກ່າວ.

ສັນຍາວ່າດ້ວຍການຮ່ວມມືສະບັບນີ້ ຈະປ່ຽນແທນສັນຍາສະບັບກ່ອນ ທີ່ທັງສອງຝ່າຍໄດ້ລົງນາມຮ່ວມກັນ ໃນປີ 1990 ທີ່ໝົດອາຍຸແລ້ວ, ຊຶ່ງສັນຍາສະບັບນີ້ ແມ່ນເອກະສານທີ່ສໍາຄັນສໍາລັບການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືແບບສະຫາຍອ້າຍນ້ອງ ລະຫວ່າງ ສອງປະເທດ ສປປ ລາວ ແລະ ສປປ ເກົາຫຼີ, ໂດຍສະເພາະການຮ່ວມມື ລະຫວ່າງສອງກະຊວງການຕ່າງປະເທດ ໃນຕໍ່ໜ້າ ບົນພື້ນຖານຕ່າງຝ່າຍຕ່າງມີຜົນປະໂຫຍດ ແລະ ເພື່ອນໍາຜົນປະໂຫຍດອັນແທ້ຈິງ ມາສູ່ປະຊາຊົນຂອງສອງປະເທດ ໃຫ້ນັບມື້ນັບຫຼາຍຂຶ້ນກວ່າເກົ່າ.

ໃນໂອກາດນີ້, ສອງຝ່າຍ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີງາມຂອງສອງປະເທດ ສປປ ລາວ ແລະ ສປປ ເກົາຫຼີ, ໂດຍສະເພາະການເປັນປະເທດເພື່ອນມິດຮ່ວມອຸດົມການສັງຄົມນິຍົມອັນດຽວກັນ.

ພ້ອມນີ້, ສອງຝ່າຍ ຕ່າງກໍໄດ້ອວຍພອນໃຫ້ສາຍພົວພັນຮ່ວມມືດັ່ງກ່າວຂອງສອງປະເທດ ຈົ່ງໝັ້ນຄົງທະນົງແກ່ນ ແລະ ແຕກດອກອອກຜົນຢ່າງບໍ່ຢຸດຢັ້ງ.

Source: ກະຊວງການຕ່າງປະເທດ