ຜູ້​ຕິດ​ເຊື້ອ​ໂຄວິດ​ຄົງ​ທ​ີ່ ​ບໍ່​ມີ​ຜູ້​ຕິດ​ເພີ່ມ ​ຍັງ​ຄົງ​ມີ​ພຽງ 6 ກໍ​ລະ​ນີໃນ​ລາວ

ຜູ້​ຕິດ​ເຊື້ອ​ໂຄວິດ​ຄົງ​ທ​ີ່ ​ບໍ່​ມີ​ຜູ້​ຕິດ​ເພີ່ມ ​ຍັງ​ຄົງ​ມີ​ພຽງ 6 ກໍ​ລະ​ນີໃນ​ລາວ

27th March 2020 0 By Admin

ນັບວ່າເປັນຂ່າວດີໃນຮອບອາທິດ ຫຼັງກະຊວງສາທາອອກມາປະກາດການກວດພົບຜູ້ຕິດເຊື້ອໂຄວິດ-19 ໃນລາວ ນັບແຕ່ວັນທີ 24 ມີນາ 2020, ແຕ່ລາຍງານຫຼ້າສຸດມື້ນີ້ ວັນທີ 27 ມີນາ 2020 ບໍ່ພົບຜູ້ຕິດເຊື້ອເພີ່ມ ຕົວເລກຍັງຄົງທີ່ 6ກໍລະນີ.

ວັນທີ 27 ມີນາ 2020 ທີ່ກະຊວງສາທະລະນະສຸກ ໄດ້ມີການຖະແຫຼງກ່ຽວກັບສະພາບການລະບາດຂອງພະຍາດໂຄວິດ-19 ຢູ່ໃນ ສປປ ລາວ ໂດຍທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດຄວບຄຸມພະຍາດໂຄວິດ-19 ພ້ອມຄະນະດ້ວຍ ແລະ ມີບັນດາສື່ມວນຊົນເຂົ້າຮ່ວມ.

ທ່ານ ຮສ ດຣ. ພູທອນ ເມືອງປາກ ກ່າວວ່າ: ການເຝົ້າລະວັງການລະບາດຂອງພະຍາດໂຄວິດ-19 ໃນ ສປປ ລາວ ຮອດວັນທີ 27 ມີນາ 2020 ມີ ຜູ້ຕິດເຊື້ອແມ່ນຄົງທີ່ ມີຈຳນວນ 6 ຄົນເທົ່າເດີມ. ຈາກການກວດວິເຄາະຫາເຊື້ອທັງໝົດໃນໄລຍະຜ່ານມາ 218 ກໍລະນີ. ພ້ອມທັງໄດ້ຄົ້ນຫາຜູ້ໃກ້ຊິດ ແລະ ສຳຜັດຜູ້ຕິດເຊື້ອ ໄດ້ທັງໝົດມາຮອດວັນທີ 27 ມີນາ ແມ່ນມີຈຳນວນ 195 ຄົນ.

ສ່ວນລາຍງານຕົວເລກຜູ້ຕິດເຊື້ອທົ່ວໂລກມີທັງໝົດ 201 ປະເທດ, ກໍລະນີຢັ້ງຢືນຜູ້ຕິດເຊື້ອພະຍາດ ໂຄວິດ-19 ແລ້ວ 528.376 ກໍລະນີ (ເພີ່ມຂື້ນ 60.419 ກໍລະນີ) , ເສຍຊິວິດ 23.962 (ເພີ່ມຂື້ນ 2.779 ກໍລະນີ) ແລະ ປີ່ນປົວຫາຍດີ 123.380 (ເພີ່ມຂື້ນ 9.162).

ຈາກ: ຂ່າວ​ເສດ​ຖະ​ກິດ​ການ​ຄ້າ