ຊົມເຊີຍສາຍສຳພັນລາວ-ຈີນ! ສປ ຈີນ ມອບເຄື່ອງຊ່ວຍຕ້ານພະຍາດໂຄວິດ-19 ແກ່ ສປປ ລາວ

ຊົມເຊີຍສາຍສຳພັນລາວ-ຈີນ! ສປ ຈີນ ມອບເຄື່ອງຊ່ວຍຕ້ານພະຍາດໂຄວິດ-19 ແກ່ ສປປ ລາວ

19th March 2020 0 By Admin

ຂປລ.ໃນຕອນບ່າຍຂອງວັນທີ 18 ມີນາ 2020, ຢູ່ທີ່ກະຊວງການຕ່າງປະເທດ ໄດ້ມີພິທີມອບ-ຮັບເຄື່ອງຊ່ວຍເຫລືອລ້າຈາກ ອຳນາດການປົກຄອງແຂວງຫູໜານ (ຫ້ອງການຕ່າງປະເທດ) ແລະ ເຄື່ອງຊ່ວຍເຫລືອຈາກ ບໍລິສັດ ຊ່ຽເຟິງ ສາກົນ ແຂວງຫູໜານ, ເພື່ອມອບໃຫ້ແກ່ລັດຖະບານລາວ ນຳໃຊ້ເຂົ້າໃນການປ້ອງກັນ ແລະ ຕ້ານການແຜ່ລະບາດຂອງພະຍາດໂຄວິດ-19 ທີ່ກຳລັງສົ່ງຜົນກະທົບເປັນວົງກວ້າງໃນປັດຈຸບັນ. ເຄື່ອງຊ່ວຍເຫລືອດັ່ງກ່າວ ປະກອບມີ: ເຄື່ອງວັດແທກອຸນຫະພູມອິນຟາເຣດ ຈຳນວນ 100 ອັນ, ຊຸດປ້ອງກັນການແພດ 80 ຫີບ (ຈຳນວນ 2.000 ຊຸດ) ແລະ ແວ່ນຕາປ້ອງກັນຂອງແພດ 50 ຫີບ (ຈຳນວນ 400 ອັນ).

*
ຕາງໜ້າຝ່າຍ ສປ ຈີນ ມອບເຄື່ອງຊ່ວຍເຫລືອໃນຄັ້ງນີ້ ໂດຍ ທ່ານ ຊົ້ງ ເຈຍເຟິງ ປະທານ ບໍລິສັດ ຊ່ຽງເຟິງ ສາກົນ ແຂວງຫູໜານ, ປະທານກິດຕິມະສັກຖາວອນ ສະພາການຄ້າແຂວງຫູໜານ ປະຈຳລາວ ພ້ອມດ້ວຍຄະນະ ແລະ ຕາງໜ້າຝ່າຍລາວ ຮັບໂດຍ ທ່ານ ໂພໄຊ ໄຂຄຳພິທູນ ຫົວໜ້າຫ້ອງການກະຊວງການຕ່າງປະເທດ ພ້ອມດ້ວຍຄະນະ, ໂດຍມີຜູ້ຕາງໜ້າຈາກ ກະຊວງສາທາລະນະສຸກ ແລະ ບໍລິສັດ ການບິນລາວ ເຂົ້າຮ່ວມເປັນສັກຂີພິຍານໃນພິທີດັ່ງກ່າວ.

ທີ່ມາ: ຂ່າວສານປະເທດລາວ