ຜົນອອກມາແລ້ວ, ບໍ່ຕິດເຊື້ອ ຈາກກໍລະນີສົງໄສຕິດເຊື້ອໂຄວິດ-19 ຢູ່ ສະຫວັນນະເຂດ, ຄໍາມ່ວນ ແລະ ນັກສຶກສາຈີນ

ຜົນອອກມາແລ້ວ, ບໍ່ຕິດເຊື້ອ ຈາກກໍລະນີສົງໄສຕິດເຊື້ອໂຄວິດ-19 ຢູ່ ສະຫວັນນະເຂດ, ຄໍາມ່ວນ ແລະ ນັກສຶກສາຈີນ

18th March 2020 0 By Admin

ອີງຕາມການລາຍງານຂອງສູນຂ່າວສານການແພດສຸຂະສຶກສາ ໃຫ້ຮູ້ວ່າ: ທ່ານ ຮສ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ຖະແຫຼງຂ່າວ ເວລາ 16:30 ໂມງຂອງວັນທີ 18 ມີນາ 2020 ວ່າ: ຈາກກໍລະນີຂ່າວລືພົບຜູ້ຕ້ອງສົງໄສຕິດເຊື້ອໂຄວິດ-19 ຢູ່ ແຂວງສະຫວັນນະເຂດ, ແຂວງຄໍາມ່ວນ ແລະ ນັກສຶກສາຈີນຢູ່ມະຫາວິທະຍາໄລແຫ່ງຊາດດົງໂດກ. ແຕ່ຜ່ານການກວດເຊື້ອພາຍໃຕ້ການຮ່ວມມືກັບອົງການອະນາໄມໂລກ ໃນນັ້ນຜົນອອກມາພົບວ່າເປັນລົບ(ບໍ່ຕິດເຊື້ອ).

ຂະນະທີ່ມາຮອດເວລາ16:30ໂມງຂອງວັນທີ18 ມີນາ 2020 ຢູ່ສປປລາວ ມີຄົນທີ່ມີອາການຄ້າຍຄື ຫລື ສົງໄສຕິດພະຍາດໂຄວິດ-19 ທີ່ໄດ້ຮັບການກວດມີທັງໝົດ92 ຄົນ, ໃນນີ້ 90ຄົນຜົນກວດແມ່ນບໍ່ພົບເຊືຶ້ອ ສ່ວນອີກ2 ຄົນຍັງລໍຖ້າຜົນກວດ.

ສ່ວນລັດຖະບານ ໄດ້ຮ່ວມກັບຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໄດ້ຈັດກອງປະຊຸມປຶກສາຫາລື ກ່ຽວກັບມາດຕະການສະກັດກັ້ນ ແລະ ຮັບມືພະຍາດໂຄວິດ-19 ຂຶ້ນທີ ສຳນັກງານນາຍົກລັດຖະມົນຕີ ໃນວັນທີ 18 ມີນາ 2020 ໂດຍເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ເຊິ່ງມີບັນດາລັດຖະມົນຕີ ແລະພາກສ່ວນກ່ຽວຂ້ອງເຂົ້າຮ່ວມ.