ຕະລືງເລີຍ! ນັກວິໄຈຊາວຈີນ ພົບກຸບເລືອດ A ສ່ຽງຕິດເຊື້ອໂຄວິດ-19 ຫຼາຍເປັນອັນດັບທຳອິດ

ຕະລືງເລີຍ! ນັກວິໄຈຊາວຈີນ ພົບກຸບເລືອດ A ສ່ຽງຕິດເຊື້ອໂຄວິດ-19 ຫຼາຍເປັນອັນດັບທຳອິດ

18th March 2020 0 By Admin

ຖືວ່າເປັນຂ່າວທີ່ໄດ້ຮັບການຕິດຕາມຢ່າງຕໍ່ເນື່ອງ ສຳລັບການແພ່ລະບາດຂອງເຊື້ອໄວຣັສ ໂຄວິດ-19, ໃນວັນທີ 11 ມີນາ 2020 ທີ່ຜ່ານມາ ນັກວິໄຈດ້ານການແພດຈາກປະເທດຈີນ ໄດ້ເຜີຍແພ່ຜົນງານວິໄຈເບື້ອງຕົ້ນຂອງຕົນ ລົງເວັບໄຊ Medrxiv.org ໂດຍງານວິໄຈດັ່ງກ່າວໄດ້ນຳເອົາຕົວຢ່າງເລືອດຂອງຜູ້ປ່ວຍທີ່ຕິດເຊື້ອ ໂຄວິດ-19 ໃນເມືອງ ອູ່ຮັ່ນ ແລະ ເຊິນເຈິ້ນ ຫຼາຍກວ່າ 2,000 ຕົວຢ່າງ ໄປປຽບທຽບກັບຕົວຢ່າງເລືອດຂອງຄົນໃນ 2 ເມືອງດັ່ງກ່າວທີ່ບໍ່ໄດ້ຕິດເຊື້ອ ໂຄວິດ-19.

ງານວິໄຈດັ່ງກ່າວ ຄົ້ນພົບໃນເບື້ອງຕົ້ນວ່າ ຄົນທີ່ມີເລືອດກຸບ A ມີໂອກາດຕິດເຊື້ອ ໂຄວິດ-19 ຫຼາຍກວ່າຄົນກຸບເລືອດອື່ນ ລວມເຖິງເມື່ອຕິດເຊື້ອ ໂຄວິດ-19 ແລ້ວ, ຄົນເຈັບທີ່ມີເລືອດກຸບ A ຍັງມີຄວາມສ່ຽງທີ່ຈະເຈັບປ່ວຍຫຼາຍກວ່າຄົນເຈັບທີ່ມີກຸບເລືອດອື່ນ.

ທ່ານ ຫວັງ ຊິງຫວນ (Wang Xinghuan) ຫົວໜ້ານັກວິໄຈ ຂອງຜົນງານວິໄຈດັ່ງກ່າວນີ້ ໄດ້ກ່າວວ່າ ຄົນເຈັບທີ່ຕິດເຊື້ອ ໂຄວິດ-19 ແລະ ມີເລືອດກຸບ A ອາດຈະຕ້ອງການ ການເບິ່ງແຍງຢ່າງໃກ້ຊິດ ແລະ ການຮັກສາທີ່ເອົາໃຈໃສ່ກວ່າຄົນອື່ນໆ. ແຕ່ໃນຂະນະດຽວກັນ ຜົນງານວິໄຈດັ່ງກ່າວ ຍັງລະບຸວ່າ ຄົນທີ່ມີເລືອດກຸບ O ມີຄວາມສ່ຽງທີ່ຈະຕິດເຊື້ອ ໂຄວິດ-19 ນ້ອຍກວ່າຄົນທີ່ມີເລືອດກຸບອື່ນໆ.

ທັງນີ້ ຈາກສະຖິຕິຄົນເຈັບ 206 ຄົນທີ່ເສຍຊີວິດຈາກ ໂຄວິດ-19 ໃນເມືອງອູ່ຮັ່ນ ມີ 85 ຄົນທີ່ມີເລືອດກຸບ A ແລະ ມີພຽງ 52 ຄົນເທົ່ານັ້ນທີ່ມີເລືອດກຸບ O ຫຼື ຖ້າທຽບເປັນສັດສ່ວນແລ້ວຫຼາຍກວ່າກັນ 63% ໂດຍຄວາມແຕກຕ່າງນີ້ພົບໃນທຸກຊ່ວງອາຍຸ ແລະ ທຸກເພດ.

ຢ່າງໃດກໍ່ຕາມ ຜົນງານວິໄຈດັ່ງກ່າວນີ້ ຍັງເປັນພຽງການຄົ້ນພົບເບື້ອງຕົ້ນເທົ່ານັ້ນ ແລະ ຍັງເປັນງານວິໄຈທີ່ບໍ່ໄດ້ຜ່ານຂະບວນການກວດສອບຄຸນນະພາບຈາກວິຊາການ ຫຼື ທີ່ເອີ້ນວ່າ peer review ນອກຈາກນັ້ນ ກຸ່ມຕົວຢ່າງທີ່ໃຊ້ເຂົ້າໃນງານວິໄຈຄັ້ງນີ້ ມີພຽງປະມານ 2,000 ຕົວຢ່າງ ເຊິ່ງຖືວ່ານ້ອຍຫຼາຍ ເມືອທຽບກັບຕົວເລກຜູ້ຕິດເຊື້ອທົ່ວໂລກໃນຕອນນີ້ທີ່ມີຫຼາຍກວ່າ 198,737ຄົນ (ຕົວເລກອາດມີການປ່ຽນແປງຢູ່ຕະຫຼອດເວລາ).

ທີ່ມາ: South China Morning Post ແລະ Lao Youth Radio FM 90.0 Mhz