ລະວັງກັນແນ່ເດີ້! ສະຫວັນນະເຂດ ກວດພົບຄົນທຳອິດ ທີ່ສົງໄສຕິດເຊື້ອໂຄວິດ-19 ແລ້ວ

ລະວັງກັນແນ່ເດີ້! ສະຫວັນນະເຂດ ກວດພົບຄົນທຳອິດ ທີ່ສົງໄສຕິດເຊື້ອໂຄວິດ-19 ແລ້ວ

17th March 2020 0 By Admin

ອີງຕາມເພຈ lao national radio ລາຍງານຂ່າວວ່າ: ໃນຕອນເຊົ້າວັນທີ 17 ມີນາ 2020, ຫນ່ວຍງານຄວບຄຸມພະຍາດຕິດຕໍ່ປະຈໍາດ່ານສາກົນຂົວມິດຕະພາບລາວ-ໄທແຫ່ງທີ 2 ແຂວງສະຫວັນນະເຂດ-ແຂວງມຸກດາຫານ ປະເທດໄທ ໄດ້ກວດພົບຜູ້ຕ້ອງສົງໃສຕິດເຊື້ອພະຍາດໂຄວິດ-19 ເປັນຄົນທໍາອິດຂອງແຂວງ, ເປັນເພດຍິງ ອາຍຸ 28 ປີທີ່ເດີນທາງມາຈາກປະເທດໄທ.


ທ່ານໝໍ ຖາວອນ ທຸມມະສອນ, ຫົວຫນ້າໜ່ວຍງານຄວບຄຸມພະຍາດຕິດຕໍ່ປະຈຳດ່ານສາກົນຂົວທິດຕະພາບລາວ-ໄທ ແຫ່ງທີ 2 ໃຫ້ຮູ້ວ່າ: ຜູ້ຕ້ອງສົງໃສຕິດເຊື້ອພະຍາດໂຄວິດ-19 ທີ່ກວດພົບນີ້ ແມ່ນເຮັດວຽກເປັນແມ່ເຮືອນຢູ່ນະຄອນຫຼວງບາງກອກ ປະເທດໄທ.
ໂດຍກ່ອນເດີນທາງກັບມາບ້ານເກີດທີ່ແຂວງສະຫວັນນະເຂດ, ຜູ້ກ່ຽວແມ່ນມີອາການໄຂ້ມາໄດ້ 2-3 ວັນແລ້ວ. ຈາກນັ້ນ, ນາຍຈ້າງກໍ່ໄດ້ອະນຸຍາດໃຫ້ລາວເດີນທາງກັບບ້ານ.


ຜ່ານການກວດຕົວຈິງຂອງເຈົ້າຫນ້າທີ່ກ່ຽວຂ້ອງປະຈໍາດ່ານເຫັນວ່າ ຜູ້ກ່ຽວມີອາການໄຂ້ສູງເຖິງ 38,5 ອົງສາ, ພ້ອມທັງ ມີອາການໄອ ແລະ ຈາມ ເຊິ່ງນອນຢູ່ໃນນິຍາມຂອງການເປັນພະຍາດໂຄວິດ-19.

ປັດຈຸບັນ, ຜູ້ກ່ຽວຖືກກັກຕົວໄວ້ທີ່ຈຸດຄວບຄວມຂອງພະແນກສາທາລະນະສຸກແຂວງ ທີ່ຈັດກຽມໄວ້ ໂດຍຈະຖືກກັກຕົວເປັນເວລາ 14 ວັນ ພ້ອມທັງຈະໄດ້ກວດວ່າຜູ້ກ່ຽວແມ່ນຕິດເຊື້ອພະຍາດດັ່ງກ່າວນີ້ແທ້ ຫຼື ບໍ່.


ຫຼ້າສຸດ, ອີງຕາມເພຈສູນຂ່າວສານການແພດສຸຂະສຶກສາ Centre of Information and Education for Health ເຊິ່ງເປັນເພຈທາງການຂອງ ສປປ ລາວລາຍງານວ່າ: ມາຮອດປັດຈຸບັນ (ວັນທີ 17 ມີນາ 2020) ພົບການແພ່ລະບາດຂອງພະຍາດອັກເສບປອດສາຍພັນໃໝ່ໂຄວິດ-19 ແລ້ວ 159 ປະເທດ ແລະ ພົບຜູ້ຕິດເຊື້ອທັງໝົດທົ່ວໂລກ182,185 ຄົນ, ເພີ່ມຂຶ້ນ 12,798 ຄົນ; ເສຍຊີວິດແລ້ວ 7,157 ເພີ່ມຂຶ້ນ 641 ຄົນ ແລະ ປິ່ນປົວຫາຍດີແລ້ວ 79,418 ຄົນ ເພີ່ມຂຶ້ນ 2,161.

ສຳລັບ ສປປ ລາວ ມາຮອດປັດຈຸບັນ ມີຄົນທີ່ຕົກຢູ່ໃນກໍລະນີສົງໄສສະສົມທັງໝົດ 85 ກໍລະນີ, ໃນ 81 ກໍລະນີ ຜົນກວດແມ່ນບໍ່ພົບເຊື້ອ ແລະ ອີກ 4 ກໍລະນີ ແມ່ນຍັງລໍຖ້າຜົນກວດຢູ່.

ທີ່ມາ: Lao National Radio