ນາຍົກລັດຖະມົນຕີ ຊຸກຍູ້ວຽກງານຕິດຕາມເຝົ້າລະວັງ ທີ່ດ່ານສາກົນຂົວມິດຕະພາບລາວ-ໄທ 1

ນາຍົກລັດຖະມົນຕີ ຊຸກຍູ້ວຽກງານຕິດຕາມເຝົ້າລະວັງ ທີ່ດ່ານສາກົນຂົວມິດຕະພາບລາວ-ໄທ 1

16th March 2020 0 By Admin

ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຕິດຕາມເຝົ້າລະວັງ, ປ້ອງກັນຄວບຄຸມ ແລະ ແຫ້ໄຂບັນຫາການແຜ່ລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ-19 ທີ່ດ່ານສາກົນຂົວມິດຕະພາບລາວ-ໄທແຫ່ງທີ 1 ນະຄອນຫຼວງວຽງຈັນໃນຕອນເຊົ້າມື້ນີ້.

ພັນເອກ ຄຳພອນ ເທບພະວົງ ຫົວໜ້າດ່ານສາກົນຂົວມິດຕະພາບລາວ-ໄທ ແຫ່ງທີ 1 ລາຍງານສະພາບການຈັດຕັ້ງປະຕິບັດມາດຕະການປ້ອງກັນ ແລະ ຄວບຄຸມພະຍາດໂຄວິດ-19 ວ່າ ພາຍຫຼັງມີການແຈ້ງການຊອງກະຊວງສາທາລະນະສຸກໄດ້ຕັ້ງຈຸດກວດກາດ້ານການແພດ

ໂດຍໃຊ້ເຄື່ອງວັດແທກອຸນຫະພູມໃນ 3 ຈຸດ ແລະ ຈຸດບໍລິການລ້າງມືດ້ວຍນໍ້າຢາຂ້າເຊື້ອ 3 ຈຸດ ພ້ອມທັງໄດ້ຈັດຕັ້ງເຮັດອະນາໄມຢູ່ບໍລິເວນດ່ານ ແລະ ຫ້ອງການຕ່າງໆທຸກໆວັນ ແນະນຳໃຫ້ທຸກຄົນໃສ່ຜາອັດປາກ, ລ້າງມືເປັນປະຈຳ ແລະ ແນະນຳໃຫ້ໜ່ວຍງານສາທາລະນະສຸກສະເໜີຂັ້ນເທິງໃຫ້ການຊ່ວຍເຫຼືອອຸປະກອນການແພດ ແລະ ບຸກຄະລາກອນແພດ, ປັດຈຸບັນຍັງບໍ່ທັນພຽງພໍກັບຄວາມຕ້ອງການຂອງວຽກງານຕົວຈິງ, ຍ້ອນວ່າດ່ານສາກົນແຫ່ງນີ້ເປັນດ່ານໃຫຍ່ມີຄົນເຂົ້າ-ອອກຫຼາຍ, ແຕ່ກ່ອນບໍ່ທັນມີພະຍາດໂຄວິດ-19 ລະບາດ ມີຄົນອອກປະມານ 10.000 ຄົນຕໍ່ວັນ, ແຕ່ປັດຈຸບັນນີ້ຫຼຸດລົງ 2 ສ່ວນ 3 ຂອງເມື່ອກ່ອນ.

ໂອກາດນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ມີຄຳເຫັນ ແລະ ໃຫ້ທິດຊີ້ນຳວ່າ ຕ້ອງເພີ່ມອຸປະກອນ ແລະ ບຸກຄະລາກອນການແພດໃຫ້ພຽງພໍ, ຄວບຄຸມລາຄາຜ້າອັດປາກໃຫ້ໄດ້, ທີ່ສຳຄັນໃຫ້ກວດກາທຸຸກຄົນຢ່າງເຂັ້ມງວດທີ່ດ່ານສາກົນແຫ່ງນີ້.

ໃນຕອນເຊົ້າມື້ນີ້ ນາຍົກລັດຖະມົນຕີຍັງໄດ້ເດີນທາງໄປສະຖານທີ່ຮອງຮັບບຸກຄົນກໍລະນີສົງໄສຕິດເຊື້ອພະຍາດໂຄວິດ-19 ທີ່ໂຮງໝໍ 103, ໂຮງໝໍ 150 ຕຽງ ແລະ ຢ້ຽມຊົມການຈັດຕັ້ງປະຕິບັດມາດຕະການຮັບມື ແລະ ການກວດກາຄົນເຂົ້າ-ອອກ ປະຈຳສະໜາມບິນສາກົນວັດໄຕ ນະຄອນຫຼວງວຽງຈັນຕື່ມອີກ.

ຂ່າວ: ຍືນຍົງ ແກ້ວເວີນໄຊ
ພາບ: ອະພິນຍາ ສຸລິຍະວົງ