ຊາວຫຼວງພະບາງສົ່ງແຮງໃຈຊ່ວຍເຫຼືອ ສປ ຈີນ ຕ້ານໂຄວິດ-19

ຊາວຫຼວງພະບາງສົ່ງແຮງໃຈຊ່ວຍເຫຼືອ ສປ ຈີນ ຕ້ານໂຄວິດ-19

13th March 2020 0 By Admin

ໃນວັນທີ 12 ມີນາ 2020 ຢູ່ທີ່ກົງສູນຈີນ ທ່ານ ຄຳຂັນ ຈັນທະວີສຸກ ເຈົ້າແຂວງ ຫຼວງພະບາງ ແລະທ່ານ ສາຍສະໝອນ ຄົມທະວົງ ຮອງເລຂາພັກແຂວງ ພ້ອມດ້ວຍຄະນະ ໄດ້ນຳເງິນຈຳນວນ 20.000 ໂດລາ ມອບໃຫ້ ທ່ານ ລີຈື່ກົ່ງ ຫົວໜ້າກົງສູນ ສປ ຈີນ ປະຈຳພາກເໜືອ ເພື່ອນຳໄປຊ່ວຍເຫຼືອຜູ້ທີ່ຖືກເຄາະຮ້າຍ ຈາກເຊື້ອໄວຣັດໂຄວິດ-19 ທີ່ກຳລັງແຜ່ລະບາດໃນປະເທດຈີນ.

ອັນເປັນການສະແດງເຖິງຄວາມຮັກແພງ, ຄວາມເປັນຫ່ວງເປັນໄຍ ແລະສາຍພົວພັນລະຫວ່າງສອງປະເທດ ລາວ-ຈີນ.


ໂອກາດນີ້ ທ່ານ ຫົວໜ້າກົງສຸນຈີນ ກໍໄດ້ສະແດງຄວາມຂອບໃຈມາຍັງທ່ານເຈົ້າແຂວງ ທີ່ໃຫ້ການຊ່ວຍເຫຼືອໃນຄັ້ງນີ້ ພ້ອມທັງຍົກໃຫ້ເຫັນສະພາບ ການລະບາດຂອງເຊື້ອພະຍາດໂຄວິດ-19 ຢູ່ພາຍໃນປະເທດຈີນ ແລະທົ່ວໂລກ.

ເຊິ່ງ ສປ ຈີນ ຍັງມີຄວາມເຊື່ອໝັ້ນວ່າຈະຟື້ນຟູທຸກຢ່າງໃຫ້ເຂົ້າສູ່ປົກກະຕິ ພາຍຫຼັງ ລັດຖະບານຈີນໄດ້ສຸມໃສ່ແກ້ໄຂບັນຫາຢ່າງຈິງຈັງ ເຮັດໃຫ້ສະພາບການລະບາດພະຍາດດັ່ງກ່າວຫຼຸດລົງ. ປັດຈຸບັນຍັງມີຜູ້ທີ່ປິ່ນປົວຢູ່ໂຮງໝໍ 14 ພັນ 800 ຄົນ ແລະຍັງພົບຜູ້ຕ້ອງສົງໄສອີກຈຳນວນ 253 ກໍລະນີ.

ມາຮອດວັນທີ 11 ມີນາ ມີຜູ້ຕິດເຊື້ອໃນທົ່ວໂລກທັງໝົດ 90 ກວ່າປະເທດ ຈຳນວນ 119.225 ຄົນ, ເສຍຊີວິດ 4.229 ຄົນ ປິ່ນປົວດີ 66.569 ຄົນ.


ຈາກນັ້ນ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ກໍໄດ້ສະແດງຄວາມເສຍໃຈຕໍ່ປະຊາຊົນ ແລະຄອບຄົວທີ່ກຳລັງປະສົບກັບເຄາະຮ້າຍຈາກພະຍາດໂຄວິດ-19 ແລະຜູ້ທີ່ສູນເສຍສະມາຊິກໃນຄອບຄົວໄປ. ສຳລັບແຂວງຫຼວງພະບາງກໍໄດ້ສຸມໃສ່ເຝົ້າລະວັງ, ຕິດຕາມກວດກາຄົນທີ່ຕິດເຊຶ້ອທີ່ຈະຜ່ານເຂົ້າ-ອອກພາຍໃນແຂວງຫຼວງພະບາງຢ່າງເຄັ່ງຄັດ.

ຂ່າວ: ເພັດສາຄອນ – ປີບ ເພັດມະນີ