ນະຄອນຫຼວງ ທຸ້ມງົບ 7,4 ຕື້ກີບ ປັບປຸງຖະໜົນ 8 ສາຍຫຼັກຄືນໃໝ່ ໃຫ້ເປັນລະບຽບ, ສວຍງາມ

ນະຄອນຫຼວງ ທຸ້ມງົບ 7,4 ຕື້ກີບ ປັບປຸງຖະໜົນ 8 ສາຍຫຼັກຄືນໃໝ່ ໃຫ້ເປັນລະບຽບ, ສວຍງາມ

12th March 2020 0 By Admin

ພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ນໍາໃຊ້ເງິນກອງທຶນທາງ 7,4 ຕື້ກີບ ເພື່ອປັບປຸງທາສີເສັ້ນທາງ, ໄຟອໍານາດ ແລະ ຕິດຕັ້ງປ້າຍຈະລາຈອນຢູ່ 8 ເສັ້ນທາງຫລັກພາຍໃນນະຄອນຫລວງວຽງຈັນຄືນໃໝ່ ໃຫ້ມີຄວາມສວຍງາມ, ເປັນລະບຽບຮຽບຮ້ອຍ ແລະ ປະກອບສ່ວນຊ່ວຍແກ້ໄຂຄວາມແອອັດຂອງການສັນຈອນ, ທັງເປັນການຕ້ອນຮັບວັນສໍາຄັນຂອງພັກ-ຂອງຊາດພາຍໃນປີ 2020.

ທ່ານ ສີວອນ ຊັບທະວີ, ຫົວໜ້າຂະແໜງຄຸ້ມຄອງການຂົນສົ່ງທາງບົກ, ພະແນກໂຍທາທິການ ແລະ ຂົນສົ່ງນະ ຄອນຫລວງວຽງຈັນ ໃຫ້ສໍາພາດວ່າ: 8 ເສັ້ນທາງທີ່ປັບປຸງໃໝ່ ລວມມີ: ຖະໜົນໄກສອນ ພົມວິຫານ, ໜອງບອນ, ສາມແສນໄທ, ເສດຖາທິລາດ, ເຈົ້າຟ້າງຸ່ມ, ສຸພານຸວົງ, ລ້ານຊ້າງ ແລະຖະໜົນທ່າເດື່ອ ໂດຍໄດ້ອະນາໄມເອົາສີແຕ້ມເສັ້ນທາງເກົ່າອອກແລ້ວແຕ້ມສີໃໝ່ແທນ, ພ້ອມນີ້ ໄດ້ປັບປຸງປ້າຍ ແລະ ໄຟອໍານາດຕາມເສັ້ນທາງເປົ້າໝາຍຄືນໃໝ່. ເບື້ອງຕົ້ນແມ່ນເລີ່ມຈາກຖະໜົນໄກສອນ ພົມວິຫານ ແລະ ຖະໜົນລ້ານຊ້າງ ໂດຍເຮັດທັງເວັນ ແລະ ຄືນ ເພື່ອໃຫ້ສໍາເລັດກ່ອນວັນທີ 15 ມີນານີ້ ຈາກນັ້ນຈິ່ງສືບຕໍ່ປັບປຸງບັນດາເສັ້ນທາງທີ່ເຫລືອເພື່ອໃຫ້ສໍາເລັດພາຍໃນເດືອນ ພຶດສະພາປີ 2020. ຄຽງຄູ່ກັບການປັບປຸງ 8 ເສັ້ນທາງຫລັກແລ້ວ ຈະໄດ້ປັບປຸງເພີ່ມຕື່ມບາງເສັ້ນທາງທີ່ເຊື່ອມຕໍ່ທາງເບຕົ່ງເພື່ອໃຫ້ເປັນລະ ບຽບຮຽບຮ້ອຍກ່ວາເກົ່າ.

ທ່ານ ສີວອນ ຊັບທະວີ ໃຫ້ຮູ້ຕື່ມວ່າ: ສໍາລັບການປັບປຸງທາສີຂອບທາງໃນຄັ້ງນີ້ ໄດ້ປ່ຽນແປງສີຂອບທາງໃໝ່ຕາມຄູ່ມືທີ່ກະຊວງ ໂຍທາທິການ ແລະ ຂົນສົ່ງກໍານົດໃໝ່ທີ່ເອກະພາບກັນໃນຂອບເຂດທົ່ວປະເທດ ໂດຍກຳນົດສີຂອບທາງຂອງຄູດອນກາງຈາກສີຂາວ ແລະ ແດງ ໃນເມື່ອກ່ອນມາເປັນສີຂາວ ແລະ ດໍາ, ສ່ວນເສັ້ນຜ່າກາງທາງທີ່ເປັນເສັ້ນ ທາງສັນຈອນສອງເລນແມ່ນປ່ຽນຈາກສີຂາວໃນເມື່ອກ່ອນມາເປັນສີເຫລືອງ, ຂະນະທີ່ຂອບທາງເບື້ອງນອກແມ່ນບໍ່ໄດ້ແຕ້ມໃໝ່ເພາະມີປ້າຍຫ້າມຕ່າງຯ ຕິດຕັ້ງຢູ່ແລ້ວ.

ຢ່າງໃດກໍ່ຕາມ ໃນໄລຍະປັບປຸງທາສີທາງ, ໄຟອໍານາດ ແລະ ຕິດຕັ້ງປ້າຍຈະລາຈອນຄືນໃໝ່ນີ້ ອາດເຮັດໃຫ້ການສັນຈອນໄປ-ມາຢູ່ບັນດາເສັ້ນທາງເປົ້າໝາຍພົບຄວາມຫຍຸ້ງຍາກ ດັ່ງນັ້ນ ທ່ານຈິ່ງຮຽກຮ້ອງໃຫ້ຜູ້ໃຊ້ລົດໃຊ້ຖະໜົນໃນນະຄອນຫລວງວຽງຈັນທຸກຄົນ ຈົ່ງມີສະຕິຄ່ອຍໄປຄ່ອຍມາ ແລະ ໃຫ້ກຽດເຊີ່ງກັນ ແລະ ກັນໃນຂະນະຂັບຂີ່, ພ້ອມທັງປະຕິບັດຕາມກົດລະບຽບການສັນຈອນຢ່າງເຄັ່ງຄັດ ເພື່ອຮັບປະກັນບໍ່ມີໃຫ້ອຸບັດຕິເຫດເກີດຂຶ້ນ.

ທີ່ມາ: FM 90