ກຳນົດເພີ່ມອີກ 15 ວັນ ຫ້າມປະຊາຊົນເຂົ້າ-ອອກ ເຂດສາມຫຼ່ຽມຄຳເດັດຂາດ

ກຳນົດເພີ່ມອີກ 15 ວັນ ຫ້າມປະຊາຊົນເຂົ້າ-ອອກ ເຂດສາມຫຼ່ຽມຄຳເດັດຂາດ

10th March 2020 0 By Admin

ເນື່ອງຈາກສະຖານະການ ການແພ່ລະບາດຂອງພະຍາດອັກເສບປອດສາຍພັນໃໝ່ ໂຄວິດ-19 ເພີ່ມຂຶ້ນຢ່າງວ່ອງໄວ ແລະ ແພ່ລາມໄປຍັງຫຼາຍປະເທດໃນທົ່ວໂລກ,  ສົ່ງຜົນໃຫ້ຫຼາຍປະເທດໄດ້ມີມາດຕະການຄວບຄຸມຢ່າງຈິງຈັງ ແລະ ໃຫ້ຊິດ ສະເພາະ ສປປ ລາວ ໂດຍສະເພາະແມ່ນັນດາເຂດເສດຖະກິດພິເສດສາມຫຼ່ຽມຄຳ ເຊິ່ງເປັນອີກໜຶ່ງສະຖານທີ່ ທີ່ມີຊາຍແດນຕິດຈອດກັບບັນດາປະເທດ ທີ່ມີການແພ່ລະບາດຂອງເຊື້ອພະຍາດ ຈຶ່ງໄດ້ມີການອອກແຈ້ງໂຈະຫ້າມປະຊາຊົນອອກນອກເຂດດັ່ງກ່າວ ເປັນຄັ້ງທີ 3 ແລະ ແກ່ຍາວໄປອີກ 15 ວັນ ນັບແຕ່ວັນທີ 11-25 ມີນາ 2020 ນີ້ ເພື່ອເຝົ້!ລະວັງ ແລະ ປ້ອງກັນບໍ່ໃຫ້ເຊື້ອພະຍາດດັ່ງກ່າວແພ່ມາສູ່ ສປປ ລາວໄດ້.

ອີງຕາມຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະຄຸ້ມຄອງເຂດເສດຖະກິດພິເສດ ແຂວງ ແລະ ນະຄອນຫຼວງ ສະບັບເລກທີ 1971/ກຜທ, ລົງວັນທີ 15 ສິງຫາ 2018; ອີງຕາມແຈ້ງການ ວ່າດ້ວຍການໂຈະຊົ່ວຄາວ ການເຂົ້າ ເຂດເສດຖະກິດພິເສດ ສາມຫຼ່ຽມຄໍາ ຄັ້ງທີ 2 ສະບັບເລກທີ 057/ຄອສພ.ປກ, ລົງວັນທີ 25 ກຸມພາ 2020 ແລະ ອີງຕາມຫນັງສືສະເໜີ ວ່າດ້ວຍເພີ່ມໄລຍະເວລາການໂຈະຊົ່ວຄາວ ການເຂົ້າ ເຂດເສດຖະກິດພິເສດສາມຫຼ່ຽມຄໍາ ຄັ້ງທີ 3 ສະບັບເລກທີ 541/ສພປ.ຂສພຄ, ລົງວັນທີ 9 ມີນາ 2020.


ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ ຈຶ່ງອອກແຈ້ງການ ສະບັບເລກທີ 071/ຄຂສພ.ບກ ລົງວັນທີ 10 ມີນາ 2020 ເຖິງສະພາບໍລິຫານເຂດເສດຖະກິດພິເສດສາມຫຼ່ຽມຄໍາ (ຂພຄ), ເຈົ້າໜ້າທີ່ ປກສ ເຂດ, ປກຊ ເຂດ, ດ່ານສາກົນ ສາມຫຼ່ຽມຄໍາ, ພາສີ, ກຸ່ມບໍລິສັດ ດອກງິ້ວຄໍາ, ຮ້ານຄ້າປອດພາສີ, ສະມາຄົມທ່າເຮືອບ້ານຄ້ວານ, ທ່າເຮືອເຂດດອນຊາວ, ບັນດາວິສາຫະກິດ, ທະນາຄານ ແລະ ປະຊາຊົນບັນດາເຜົ່າ ເລື່ອງ ການໂຈະຊົ່ວຄາວ ການເຂົ້າເຂດເສດຖະກິດພິເສດ ສາມຫຼ່ຽມຄໍາ ຄັ້ງທີ 3.


ເຊິ່ງໃນແຈ້ງການໄດ້ລະບຸວ່າ: ຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ (ຄຂສພ.ບກ) ຂໍແຈ້ງມາຍັງທ່ານ ຊາບວ່າ: ເຂດເສດຖະກິດພິເສດ ສາມຫຼ່ຽມຄໍາ (ຂສພຄ) ຈະສືບຕໍ່ຈັດຕັ້ງປະຕິບັດໂຈະຊົ່ວຄາວການເຂົ້າ ຂສພຄ ຕື່ມອີກ 15 ວັນ ເຊິ່ງເລີ່ມຕັ້ງແຕ່ວັນທີ 11 ມີນາ 2020 ຫາວັນທີ 25 ມີນາ 2020 ເພື່ອປ້ອງກັນພະຍາດ ອັກເສບປອດຈາກເຊື້ອຈຸລະໂລກສາຍພັນໃໝ່ (ໂຄວິດ-19 = CoVID-19) ບໍ່ໃຫ້ເຂົ້າມາໃນ ຂສພຄ ໄດ້.


ສະນັ້ນ, ໃນຊ່ວງໃນຍະເວລາໂຈະຊົ່ວຄາວຄັ້ງນີ້ ແມ່ນບໍ່ອະນຸຍາດໃຫ້ຄົນຢູ່ນອກ ຂສພຄ ເຂົ້າມາໃນເຂດ. ສ່ວນຜູ້ໃດຢູ່ໃນເຂດ ແລ້ວມີຈຸດປະສົງຢາກອອກໄປນອກເຂດ ແມ່ນເຫັນດີໃຫ້ອອກ ແຕ່ບໍ່ອະນຸຍາດໃຫ້ກັບຄືນເຂົ້າມາໃນເຂດໃນຊ່ວງເວລາ 15 ວັນນີ້.

ໃນຊ່ວງເວລາ 15 ວັນດັ່ງກ່າວມາຂ້າງເທີງນີ້ ແມ່ນສະເໜີໃຫ້ພະນັກງານ ຄກສພ ບກ ແລະ ຂະແໜງການປິ່ນອ້ອມ, ເຈົ້າໜ້າທີ່ພາສີ, ເຈົ້າໜ້າທີ່ ປກສ, ປກຊ, ລປພ, ພະນັກງານທະນາຄານ ເຈດີບີ ແລະ ເຈົ້າໜ້າທີ່ຮັບຜິດຊອບທຸກພາກສ່ວນ ຈົ່ງມາປະຈໍາການປົກກະຕິ ເພື່ອແກ້ໄຂວຽກງານວິຊາສະເພາະ ຕາມພາລະບົດບາດສິດຫນ້າທີ່ຂອງຕົນ ແລະ ຂໍໃຫ້ທຸກພາກສ່ວນທີ່ກ່ຽວຂ້ອງ ຈົ່ງພ້ອມກັນຮ່ວມມືປະຕິບັດຕາມມາດຕະການປ້ອງກັນພະຍາດຂອງ ຂສພຄ ຢ່າງເຄັ່ງຄັດ.