ຍິນດີນໍາ ທ່ານ ໂສມ ບຸດຕະກຸນ ກຳມະການພັກແຂວງ​ ໄດ້ເປັນຫົວໜ້າພະແນກ​ ຖວທ​ ແຂວງຈໍາປາສັກ​ ຜູ້ໃໝ່

ຍິນດີນໍາ ທ່ານ ໂສມ ບຸດຕະກຸນ ກຳມະການພັກແຂວງ​ ໄດ້ເປັນຫົວໜ້າພະແນກ​ ຖວທ​ ແຂວງຈໍາປາສັກ​ ຜູ້ໃໝ່

7th March 2020 0 By Admin

ພິທີມອບຮັບໜ້າທີ່ຫົວໜ້າພະແນກຖະແຫຼງຂ່າວ,​ ວັດທະນະທຳ​ ແລະ​ ທ່ອງທ່ຽວ​ ລະຫວ່າງຜູ້ເກົ່າ ແລະຜູ້ໃໝ່.

ວັນທີ 6 ມີນາ 2020, ໄດ້ມີພິທີມອບ -​ ຮັບໜ້າທີ່ຫົວໜ້າພະແນກຖະແຫຼງຂ່າວ,​ ວັດທະນະທຳ​ ແລະ​ ທ່ອງທ່ຽວ​ ລະຫວ່າງ ທ່ານ ບົວທອງ ສຸວັນນະສານ​ ກຳມະການ​ພັກ​ແຂວງ ຫົວໜ້າ​ພະແນກ​ ຖວທ​ ຜູ້ເກົ່າ ແລະ ທ່ານ ໂສມ ບຸດຕະກຸນ ກຳມະການພັກແຂວງ​ ຫົວໜ້າພະແນກ​ ຖວທ​ ແຂວງ​ ຜູ້ໃໝ່.

ພິທີຈັດ​ຂຶ້ນຢູ່ຫໍວັດທະນະທຳ ບັນດາເຜົ່າ ຫຼັກ 7 ນະຄອນປາກເຊ ໂດຍ​ການ​ເຂົ້າຮ່ວມ​ຂອງ​ ທ່ານ​ ນິພອນ​ ວຽງປະເສີດ​ ຮອງເລຂາຄະນະບໍລິຫານງານພັກແຂວງ​ ຫົວໜ້າຄະນະຈັດຕັ້ງແຂວງ.

ມີການນຳຈາກພະແນກການຂົງເຂດວັດທະນະທຳ -​ ສັງຄົມ,​ ຫ້ອງການ ຖວທ 9 ເມືອງ, 1 ນະຄອນ, ການນຳ, ສະມາຊິກພັກ​ ແລະ ພະນັກງານ ຂະແໜງການກອງວິຊາການອ້ອມຂ້າງພະແນກ ຖວທ ແຂວງ ເຂົ້າຮ່ວມ.

ໃນພິທີ ທ່ານ ບົວທອງ ສຸວັນນະສານ ກຳມະການ​ພັກ​ແຂວງ ຫົວໜ້າ​ພະແນກ​ ຖວທ​ ຜູ້ເກົ່າ ໄດ້ກ່າວມອບໜ້າທີ່ ໂດຍຍົກໃຫ້ເຫັນຜົນງານວຽກງານ ຖວທ ພາຍໃຕ້ການນໍາພາຂອງຕົນໃນໄລຍະຜ່ານມາ ເປັນຕົ້ນວຽກງານສື່ມວນຊົນໄດ້ນໍາພາສຸມໃສ່ໂຄສະນາເຫດການສຳຄັນຂອງພັກ-ຊາດ ແລະ ສາກົນ ເນື້ອໃນຂອງສື່ມວນຊົນທຸກປະເພດແມ່ນໄດ້ສ່ອງແສງຄວາມເປັນຈິງບໍ່ວ່າເຫດການທີ່ເກີດຂື້ນທັງພາຍໃນ, ຕ່າງແຂວງ ແລະ ຕ່າງປະເທດ, ສ້າງຄວາມຮັບຮູ້ ແລະ ຄວາມເຂົ້າໃຈຕໍ່ເຫດການ, ສະພາບ ແລະ ການເຄື່ອນໄຫວ ໃນຊີວິດການເມືອງ, ເສດຖະກິດ, ວັດທະນະທຳ-ສັງຄົມ ຮັບປະກັນດ້ານຄວາມໝັ້ນຄົງດ້ານຂໍ້ມູນຂ່າວສານ ໃຫ້ສະລະຄວາມຮູ້, ສືກສາອົບຮົມປຸກລະດົມ ແລະ ການບັນເທີງໃຫ້ໄປເຖິງເປົ້າໝາຍພາຍໃນແຂວງ.

ຕ່າງແຂວງ ແລະ ຕ່າງປະເທດ ໂດຍຜ່ານຫຼາຍປະຕູ, ຫຼາຍເວທີ, ຫຼາຍເຄືອຄ່າຍ ແລະ ຫຼາຍເສັ້ນທາງດ້ວຍຄວາມວ່ອງໄວ, ຊັດເຈນ, ທົ່ວເຖິງກວ່າເກົ່າ.

ປັດຈຸບັນທົ່ວແຂວງມີໂທລະໂຄ່ງທັງໝົດ 599 ຊຸດ ຊຸກຍູ້ບັນດາເມືອງສ້າງໃຫ້ມີຫໍຂ່າວ ແລະ ຕິດຂ່າວເຄື່ອນໄຫວຂອງການນຳໃນແຕ່ລະຂັ້ນ, ທົ່ວແຂວງມີຫໍຂ່າວທັງໝົດ 10 ຈຸດ, ທີ່ປະຈຳຢູ່ 9 ເມືອງ 1 ນະຄອນ

ທົ່ວແຂວງມີສະຖານີວິທະຍຸ 5 ແຫ່ງ 6 ຄື້ນ: 1 ສະຖານີວິທະຍຸກະຈາຍສຽງແຂວງຈຳປາສັກ, 2 ສະຖານີວິທະຍຸກະຈາຍສຽງເມືອງໂພນທອງ, 3 ສະຖານີວິທະຍຸກະຈາຍສຽງເມືອງຊະນະສົມບູນ, 4  ສະຖານີວິທະຍຸກະຈາຍສຽງເມືອງປາກຊ່ອງ, 5 ສະຖານີວິທະຍຸກະຈາຍສຽງເມືອງສຸຂຸມາ, 6 ສະຖານີວິທະຍຸກະຈາຍສຽງເມືອງໂຂງ

.

ປັດຈຸບັນອາຄານວິທະຍຸແຂວງຫຼັງໃໝ່ ແລະ ຫຼັກອັງແຕນແມ່ນໄດ້ກໍ່ສ້າງສຳເລັດແລ້ວ ລໍຖ້າແຕ່ປັບປຸງລະບົບເຕັກນິກເທົ່ານັ້ນ ສະເພາະສະຖານວິທະຍຸກະຈາຍສຽງແຂວງຈຳປາສັກ ແມ່ນໄດ້ກະຈາຍສຽງໃນຄື້ນ 100.7 ແລະ 104.7 MKH ອອກອາກາດ 13 ຊົ່ວໂມງເຄີ່ງຕໍ່ວັນ ກຳລັງແຮງສົ່ງກວມພື້ນທີ່ 70% ໃນທົ່ວແຂວງ ມີໂທລະພາບດີຈິຕ້ອນ 2 ແຫ່ງ, ອານາຣອກ 1 ແຫ່ງ ມີໜັງສືພິມລາຍສັບປະດາ 1 ແຫ່ງຄື: ໜັງສືພິມຈຳປາໃໝ່.

ນອກຈາກນີ້ ຍັງມີຜົນງານດ້ານວັດຖະນະທຳ, ທ່ອງທ່ຽວ ແລະ ອື່ນໆຢ່າງຫຼວງຫຼາຍ. ໂອກາດນີ້ ໃນພິທີທ່ານ ບົວທອງ ສຸວັນນະສານ ຫົວໜ້າພະແນກ ຖວທ ແຂວງຈຳປາສັກ ຜູ້ເກົ່າຍັງໄດ້ເຊັນມອບໜ້າທີ່ຫົວໜ້າພະແນກ ຖວທ ໃຫ້ທ່ານ ໂສມ ບຸດຕະກຸນ ເປັນຜູ້ຮັບໜ້າທີ່ຕໍ່ໄປຢ່າງເປັນທາງການ.

.

ໂອກາດນີ້ທ່ານ ນິພອນ ວຽງປະເສີດ ຮອງເລຂາພັກແຂວງຫົວໜ້າຄະນະຈັດຕັ້ງແຂວງຈຳປາສັກຍັງໄດ້ໂອ້ລົມໂດຍເນັ້ນໃຫ້ຫົວໜ້າພະແນກ ຖວທ ຜູ້ໃໝ່ ແລະ ຜູ້ເກົ່າທີ່ໄປຮັບໜ້າທີ່ໃໝ່ຈົ່ງໄດ້ສືບຕໍ່ເສີມຂະຫຍາຍມູນເຊື້ອຜົນງານຂອງຕົນໃຫ້ຫຼາຍຂຶ້ນ ຍາດໄດ້ຜົນສຳເລັດໃໝ່ໃຫຍ່ຫຼວງກວ່າເກົ່າ.

.

ສໍາລັບທ່ານ ບົວທອງ ສຸວັນນະສານ​ ກຳມະການ​ພັກ​ແຂວງ ຫົວໜ້າ​ພະແນກ​ ຖວທ​ ຜູ້ເກົ່າ ແມ່ນໄປຮັບໜ້າທີ່ໃໝ່ເປັນຫົວໜ້າໂຮງຮຽນການເມືອງ-ການປົກຄອງແຂວງຈໍາປາສັກ.

ຈາກ: ປະພິດ ສີສົມບູນ