ປະກາດບ້ານຜາຫວາຍ ເປັນບ້ານສາທາລະນະສຸກແບບຢ່າງ

ປະກາດບ້ານຜາຫວາຍ ເປັນບ້ານສາທາລະນະສຸກແບບຢ່າງ

6th March 2020 0 By Admin

ພິທີຮັບຮອງຄອບຄົວ ແລະ ປະກາດບ້ານຜາຫວາຍ ກຸ່ມບ້ານຈີມ ເມືອງພູຄູນ ເປັນບ້ານສາທາລະນະສຸກແບບຢາງ ໄດ້ຈັດຂື້ນໃນທ້າຍເດືອນກຸມພາ ທີ່ຜ່ານມາ ໂດຍການໃຫ້ກຽດເຂົ້າຮ່ວມຂອງ ທ່ານ ຄຳພັນ ພະນິນທອງ ຮອງເຈົ້າເມືອງພູຄູນ, ມີຫົວໜ້າຫ້ອງການຂອງເມືອງ, ກຸ່ມບ້ານ ແລະ ນາຍບ້ານອອ້ມຂ້າງ, ຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມ.

ໃນພິທີ ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານສ້າງຄອບຄົວ ແລະ ບ້ານສາທາລະນະສຸກແບບຢາງ ຈາກທ່ານ ເຊີຕົ່ງເຮີ ນາຍບ້ານຜາຫວາຍ ເຊິ່ງທ່ານໃຫ້ຍົກໃຫ້ເຫັນ ຄວາມເປັນເຈົ້າການຂອງອົງການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າ ໃນການຍົກສູງຕໍ່ວຽກງານສາທາລະນະສຸກ ຕາມ 10 ມາດຖານ 30 ຕົວຊີ້ວັດຂອງການສ້າງຄອບຄົວ ແລະ ບ້ານສາທາລະນະສຸກແບບຢາງ ທີ່ກະຊວງສາທາລະນະສຸກວາງອອກ ໂດຍຕິດພັນກັບການຈັດຕັ້ງປະຕິບັດ ມະຕິກອງປະຊຸມໃຫ່ຍ, ແຜນພັດທະນາເສດຖະກິດຂອງເມືອງ ໂດຍປະຊາຊົນເຂົ້າໃຈ ແລະ ມີສວນຮ່ວມໃນການປ້ອງກັນພະຍາດລະບາດຕາມລະດູການ, ການສົ່ງເສີມສຸຂະພາບ, ການເຂົ້າເຖິງການບໍລິການດ້ານສຸຂະພາບ, ການເຂົ້າຮ່ວມຂະບວນໂຄສະນາສຸຂະສຶກສາ ແລະ ກິດຈະກຳອື່ນໆ ເຮັດໃຫ້ປະຊາຊົນ ໄດ້ຮັບຮູ້ ແລະ ດຳລົງຊີວິດຖືກຕ້ອງຕາມຫຼັກສຸຂາອະນາໄມ ສ້າງຊີວິດໃຫ້ມີສຸຂະພາບແຂງແຮງດີ ປາສະຈາກພະຍາດລະບາດ.

ບ້ານຜາຫວາຍ ປະກອບມີ 29 ຫລັງຄາເຮືອນ, 28 ຄອບຄົວ, ພົນລະເມືອງທັງໝົດ 185 ຄົນ, ຍິງ 98 ຄົນ, ປະຊາຊົນສວນໃຫ່ຍປະກອບອາຊີບປູກຝັງ ແລະ ລ້ຽງສັດ.ຜ່ານການປະເມີນຜົນຕາມມາດຖານເງືອນໄຂຂອງການສ້າງຄອບຄົວ ແລະ ບ້ານສາທາລະນະສຸກແບບຢາງຂອງເຫັນວ່າ ມີຄອບຄົວທີໄດ້ຮັບໃບຢັ້ງຢືນຄອບຄົວສາທາລະນະສຸກແບບຢ່າງ ຈຳນວນ 28 ຄອບຄົວ ເທົ່າກັບ 100% ຂອງຈໍານວນຄອບຄົວທັງໝົດ.

ໂອກາດນີ້ ທ່ານ ຄໍາພັນ ພະນິນທອງ ໄດ້ໃຫ້ກຽດໂອ້ລົມຕໍ່ອົງການປົກຄອງບ້ານ, ພໍ່ແມ່ປະຊາຊົນ ພ້ອມທັງລັນຄ້ອງ 9 ບາດ ແລະ ເປີດປ້າຍບ້ານສາທາລະນະສຸກແບບຢ່າງ.

ຂ່າວ: ເມືອງພູຄູນ