ວາງສີລະລຶກ ສ້າງພະທາດແຝດນ້ຳເຕົ້າຄູ່ບາລະມີກ້ອນຕື່ນ ເມືອງປາກທາ

ວາງສີລະລຶກ ສ້າງພະທາດແຝດນ້ຳເຕົ້າຄູ່ບາລະມີກ້ອນຕື່ນ ເມືອງປາກທາ

5th March 2020 0 By Admin

ວັນທີ 4 ມີນາ 2020ນີ້ ທີ່ບ້ານກ້ອນຕື່ນ ເມືອງປາກທາ ແຂວງບໍ່ແກ້ວ ໄດ້ຈັດພິທີ ວາງສີລະລຶກ ສ້າງພະທາດແຝດນ້ຳເຕົ້າຄູ່ບາລະມີ ກ້ອນຕື່ນ ຫຼື ພະທາດນ້ຳເຕົ້າກ້ອນຕື່ນຂື້ນ ເຂົ້າຮ່ວມມີພິທີມີພຣະອາຈານໃຫ່ຍ ອາດຍາທຳ ຄຳເງີນ ຄຳວົງ ກຳມະການສູນກາງແນວລາວສ້າງຊາດ ກຳມະການສູນ ກາງ ອພສ ເຈົ້າຄະນະແຂວງບໍ່ແກ້ວ ມີພຣະອາຈານໃຫ່ຍຄູບາ ຄຳແສນ ພົມປັນຍາ ປະທານທີ່ປຶກສາ ຄະນະ ອພສ ແຂວງບໍ່ແກ້ວ ມີທ່ານ ສຸໄລ ດວງຜາຄຳ ກຳມະການພັກແຂວງ ເລຂາພັກເມືອງ ເຈົ້າເມືອງປາກທາ ມີບັນດາທ່ານ ອອກຕົນຍາດໂຍມ ເຈົ້າສັດທາທາງພາຍໃນ ແລະ ຕ່າງປະເທດ ຕະຫຼອດຮອດພໍ່ແມ່ປະຊາຊົນທີ່ມີຈິດໃຈເຫຼື່ອມໃສ່ສັດທາເຂົ້າຮ່ວມຢ່າງຫຼວງຫຼາຍ.

ພິທີໄດ້ເລີມຈາກການຈູດທູບທຽນບູຊາພຣະຣັດຕະນະໄຕ ແລະ ບູຊາທ້າວທັງ 4 ພ້ອມທັງສູດທະລິດຕະມຸງຄຸນພຣະສົງ 19 ອົງ, ຈາກນັ້ນ ກໍ່ໄດ້ທຳພິທີວາງສີລະລຶກສ້າງພະທາດແຝດນ້ຳເຕົ້າຄູ່ບາລະມີກ້ອນຕື່ນ ຫຼື ພະທາດນ້ຳເຕົ້າກ້ອນຕື່ນ ໄນເວລາ 15 ໂມງ 15 ນາທີ ປີກຸນມື້ຂື້ນ 11 ຄຳ ເດືອນ 4 ລາວ ພສ 2562 ສຳລັບຮູບແບບຂອງພະທາດແຝດນ້ຳເຕົ້າຄູ່ບາລະມີກ້ອນຕື່ນມີຂະໜາດກ້ວາງ 4 x 4 ແມັດ, ລວງສູງ 17,75 ແມັດ ກ້ອນຫີນຈຳລອງກ້ອນຕື່ນ 2 ກ້ອນ ມີດອກບົວຂັວມປົກຫຸ້ມຢູ່ເທີງໜ້າເພື່ອຕັ້ງເປັນຖານປູຮອງຮັບອົງພະທາດ ຊັ້ນທີ 2 ແມ່ນຕົວອົງພະທາດກໍ່ຄື ນ້ຳເຕົ້າມີດອກບົວຫງ່າຍອ້ອມຮອບຢູ່ເທິງບ່າໃກ້ບໍລິເວນລຳຄໍ ຊັ້ນທີ 3 ແມ່ນຄໍນ້ຳເຕົ້າ ຊັ້ນທີ 4 ແມ່ນແກນປິດປາກເຕົ້າ ແລະ ຊັ້ນທີ 5 ແມ່ນຍອດຊໍ່ຟ້າ

ເຊິ່ງເປັນສີລະປະເອກກະລັກຂອງລາວພາກເໜືອ ສຳລັບຮູບແບບພະທາດແຝດນ້ຳເຕົ້າຄູ່ບາລະມີກ້ອນຕື່ນແມ່ນໄດ້ຖອດແບບອອກມາຈາກພະທາດກ້ອນຕື່ນດັ່ງເດີມທີ່ຕັ້ງຢູ່ກ້ອນຕື່ນ 2 ກ້ອນຢູ່ກາງແມ່ນ້ຳຂອງທີ່ເປັນບ່ອນກາບໄຫວ້ສັກກະລະບູຊາໃນທາງພຸດທະສາສະໜາ ແລະ ໄດ້ມີປະເພນີສົງນ້ຳທຸກໆປີ ຂອງເທດສະການປີໃໝ່ລາວ ມາຮອດປັດຈຸບັນນ້ຳຂອງຂື້ນລົງບໍ່ປົກກະຕິເຮັດໃຫ້ບໍ່ສາມາດເຂົ້າໄປກາບໄຫວ້ສັກກະລະບູຊາໄດ້ ສະນັ້ນ ອົງການຈັດຕັ້ງພັກເຖົ້າແກ່ແນວໂຮມຕະຫຼອດຮອດເຈົ້າສັດທາທັງຫຼາຍ ຈຶ່ງໄດ້ພ້ອມພຽງກັນສ້າງພະທາດແຝດນ້ຳເຕົ້າຄູ່ບາລະມີກ້ອນຕື່ນ ເພື່ອໄວ້ເປັນມູນມໍລະດົກຂອງບ້ານ ໃຫ້ຊາວພຸດທະສາສະນິກະຊົນ ໄດ້ກາບໄຫວ້ສັກກະລະບູຊາ.

.

ພາບ-ຂ່າວ: ບຸນເພັງ ທຸມມະວົງ