ພົບປະແລກປ່ຽນບົດຮຽນດ້ານການຮ່ວມມື ສານສໍາພັນ ​ປາກຊັນ – ບືງການ

ພົບປະແລກປ່ຽນບົດຮຽນດ້ານການຮ່ວມມື ສານສໍາພັນ ​ປາກຊັນ – ບືງການ

21st February 2020 0 By Admin

ໃນ​ລະ​ຫວ່າງ​ວັນ​ທີ 13 ກຸມພາ 2020 ຜ່ານ​ມານີ້ ຢູ່ສະໂມສອນປົກຄອງເມືອງປາກຊັນ ຄະນະຜູ້ແທນ ແລະ ເຈົ້າໜ້າທີ່ຄະນະກໍາມະການ BLO ຈາກອຳເພີເມືອງ ຈັງວັດບືງການ ຣາຊາອານາຈັກໄທ ນຳໂດຍທ່ານ ວະລາດີ ສອນອ່ອນນຸດ ປະລັດຈັງວັດບືງການ ແລະ ທ່ານ ດອນ ສະມິດເກດຕຣິນ ນາຍອຳເພີເມືອງບືງການ ພ້ອມດ້ວຍຄະນະ ໄດ້ເດີນທາງມາພົບປະແລກປ່ຽນ, ຖອນບົດຮຽນຕາມແນວຊາຍແດນເມືອງປາກຊັນ ແຂວງບໍລິຄຳໄຊ ສປປ ລາວ ແລະ ອຳເພີເມືອງບືງການ ຈັງວັດບືງການ ຣາສະອານາຈັກໄທ ໂດຍການຕ້ອນຮັບຂອງ ທ່ານ ໄມຈອມ ວັນນະສານຄຳ ເຈົ້າເມືອງປາກຊັນ, ມີຄະນະຜູ້ແທນທັງສອງຝ່າຍ ເຂົ້າຮ່ວມ.

ໃນ​ກອງ​ປະຊຸມ ​ຜູ້​ແທນ​ທັງ​ສອງ​ຝ່າຍ ​​ໄດ້​ຮັບ​ຟັງການ​ລາຍ​ງານສະພາບການຮັກສາຄວາມສະຫງົບຮຽບຮ້ອຍຕາມບໍລິເວນຊາຍແດນ ພ້ອມທັງແລກປ່ຽນຖອດຖອນບົດຮຽນເຊິ່ງກັນ ແລະ ກັນ ກ່ຽວ​ກັບ​ສະພາບການ​ເຄື່ອນ​ໄຫວ, ​ໄປ-ມາຫາ​ສູ່​ຂອງ​​ປະຊາຊົນ​ສອງ​ຝາກ​ຝັ່ງ ​ເລາະ​ລຽບ​ຕາມ​ແມ່​ນ້ຳຂອງ ພ້ອມ​ທັງຮັກສາຄວາມສະຫງົບ, ຄວາມເປັນລະບຽນຮຽບຮ້ອຍ ​ແລະ ສະກັດກັ້ນ​ແກ້​ໄຂປະກົດການຫຍໍ້ທໍ້ ເຊັ່ນ : ບັນຫາ​ຢາ​ເສບ​ຕິດ, ການຄ້າຂາຍເຖື່ອນ ຕາມ​ບໍລິ​ເວນ​ຊາຍ​ແດນລາວ-​ໄທ ກໍ່​ຄືຕາມ​ບໍລິ​ເວນ​ຊາຍ​ແດນ​ປາກ​ຊັນ-ບື​ງການ ​ເຊິ່ງ​ໄລຍະ​ຜ່ານ​ມາ ​ເຈົ້າ​ໜ້າ​ທີ່, ຄະນະ​ນະ​ກຳມະການ BLO ທັງ​ສອງ​ຝ່າຍກໍ່​ໄດ້​ເອົາ​ໃຈ​ໃສ່​ປະສານ​ສົມທົບ​ທຸກ​ພາກສ່ວນ ​ແລະ ​ເມືອງ​ໃກ້​ຄຽງ ​ເພື່ອຮັກສາຄວາມສະຫງົບ, ປ້ອງກັນ ແລະ ​ສະກັດ​ກັ້ນ ເຮັດໃຫ້ປະກົດການຫຍໍ້ທໍ້ຕ່າງໆ​ຫຼຸດ​ໜ້ອຍ​ຖອຍ​ລົງ​.

ຫລັງຈາກນັ້ນ ເພື່ອເປັນກັນສ້າງສາຍພົວພັນທີ່ດີຂອງ 2 ເມືອງ ລະຫວ່າງເມືອງປາກຊັນ ກັບ ເມືອງບືງການ ຄະນະຜູ້ແທນທັງສອງຝ່າຍ ຍັງໄດ້ຮ່ວມກັນ ສ້າງກິດຈະກຳແຂ່ງຂັນກິລາບານເຕະມິດຕະພາບ ເພື່ອສຸຂະພາບ, ຮັດແໜ້ນຄວາມສາມະຄີຮັກແພງ ແລກປ່ຽນເຊິ່ງກັນ ແລະ ກັນ ດ້ວຍບັນຍາກາດທີ່ມີຄວາມສຳຄັນຢ່າງຟົດຟື້ນ ແລະ ມ່ວນຊື່ນ.