ນາຍົກລັດຖະມົນຕີ ຕ້ອນຮັບການເຂົ້າຢ້ຽມຂໍ່ານັບຂອງຜູ້ອຳນວຍການໃຫຍ່ອົງການ (FAO)

ນາຍົກລັດຖະມົນຕີ ຕ້ອນຮັບການເຂົ້າຢ້ຽມຂໍ່ານັບຂອງຜູ້ອຳນວຍການໃຫຍ່ອົງການ (FAO)

19th February 2020 0 By Admin

ໃນຕອນເຊົ້າຂອງມື້ນີ້ ວັນທີ 19 ກຸມພາ 2020 ທີ່ສຳນັກ​ງານນາຍົກລັດຖະມົນຕີ, ນະຄອນຫຼວງວຽງຈັນ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງທ່ານ Dr. Qu Dongyu, ຜູ້ອຳນວຍການໃຫຍ່ ອົງການອາຫານ ແລະ ການກະເສດ (FAO) ຊຶ່ງມີສຳນັກງານໃຫຍ່ຕັ້ງຢູ່ ນະຄອນຫຼວງໂຣມ, ປະເທດອິຕາລີ, ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງ ວັນທີ 18-20 ກຸມພາ 2020.

.

ໃນໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ Dr. Qu Dongyu ທີ່ໄດ້ຮັບເລືອກໃຫ້ດຳລົງຕຳແໜ່ງເປັນຜູ້ອຳນວຍການໃຫຍ່ຄົນໃໝ່ຂອງ ອົງການ FAO ເມື່ອບໍ່ດົນມານີ້, ພ້ອມທັງ ໄດ້ຕີລາຄາສູງຕໍ່ການຢ້ຽມ ຢາມ ສປປ ລາວ ໃນຄັ້ງນີ້, ຊຶ່ງເປັນການຮັດແໜ້ນສາຍພົວພັນການຮ່ວມມື ລະຫວ່າງ ສປປ ລາວ ແລະ ອົງການ FAO ໃຫ້ແໜ້ນແຟ້ນຂຶ້ນກວ່າເກົ່າ, ທັງເປັນການ ປຶກສາຫາລືແລກປ່ຽນ ກ່ຽວກັບບັນດາໂຄງການຮ່ວມມືໃນໄລຍະຜ່ານມາ ແລະ ແນວທາງການຮ່ວມມືໃນຕໍ່ໜ້າ, ໂດຍສະເພາະແມ່ນຂໍ້ລິເລີ່ມຈາກມືສູ່ມື (Hand-in-Hand Initiative) ຂອງຜູ້ອຳນວຍການໃຫຍ່, ໂດຍຈຸດປະສົງ ແມ່ນເພື່ອນຳເອົາການຊ່ວຍເຫຼືອຈາກບັນດາຄູ່ຮ່ວມພັດທະນາ ມາສູ່ບັນດາປະເທດທີ່ມີຄວາມຈຳເປັນ.

ໃນໂອກາດດຽວກັນນີ້, ທ່ານ ນາຍົກລັດຖະມົນຕີ ກໍ່ໄດ້ສະແດງຄວາມຂອບໃຈ ມາຍັງອົງການ FAO ທີ່ໄດ້ປະກອບສ່ວນ ໃນການລະດົມຂົນຂວາຍທຶນເຂົ້າໃນການປັບປຸງ ແລະ ພັດທະນາວຽກງານໃນຂົງເຂດກ່ຽວຂ້ອງ, ໂດຍຜ່ານບັນດາໂຄງການຕ່າງໆທີ່ໄດ້ຈັດຕັ້ງປະຕິບັດ ຮ່ວມກັບຂະແໜງການພາກລັດຂອງລາວ ລວມເຖິງບັນດາໂຄງການຊ່ວຍເຫຼືອທີ່ຈະເກີດມີໃນອະນາຄົດ.

.

ນອກຈາກນີ້, ທ່ານນາຍົກລັດຖະມົນຕີ ຍັງໄດ້ແຈ້ງໃຫ້ທ່ານຜູ້ອຳນວຍການໃຫຍ່ ອົງການ FAO ຊາບ ກ່ຽວກັບສະ​ພາບການພັດທະນາ ກໍ່ຄືຈຸດພິເສດ ທາງດ້ານທ່າແຮງ, ຂໍ້ຈຳກັດ ແລະ ການດຳລົງຊີວິດຂອງປະຊາຊົນລາວ, ໂດຍສະເພາະ ຢູ່ເຂດຊົນນະບົດຫ່າງໄກສອກຫຼີກ, ລວມທັງ ຄວາມພະຍາຍາມ ແລະ ຄວາມເອົາໃຈໃສ່ຂອງທຸກພາກສ່ວນທີ່ກ່ຽວຂ້ອງ ໃນການພັດທະນາຊົນນະບົດ ແລະ ການປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ ເພື່ອບັນລຸຄາດໝາຍຕ່າງໆທີ່ວາງໄວ້ ໂດຍສະເພາະ ການສຸມໃສ່ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ກໍ່ຄື ການກະກຽມໃຫ້ແກ່ການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025), ລວມທັງ ການຈັດຕັ້ງປະຕິບັດວິໄສທັດ ຮອດປີ 2030 ເພື່ອການພັດທະນາແບບຍືນຍົງ, ແລະ ມຸ່ງພະຍາຍາມເຮັດໃຫ້ ສປປ ລາວ ຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ, ໂດຍສະເພາະ ການລຶບລ້າງຄວາມທຸກຍາກ ແລະ ການກຳຈັດໄພອຶດຫິວ ກໍ່ຄື ການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ຊຶ່ງວຽກງານເຫຼົ່ານັ້ນ ລ້ວນແຕ່ເປັນວຽກທີ່ຕິດພັນໂດຍກົງກັບວຽກບູລິມະສິິດ ແລະ ເປົ້າໝາຍຂອງ ອົງການ FAO.


ໃນຕອນທ້າຍ, ທ່ານນາຍົກລັດຖະມົນຕີ ທອງລຸນ ສີສຸລິດ ຍັງໄດ້ສະເໜີໃຫ້ທ່ານຜູ້ອຳນວຍການໃຫຍ່ ອົງການ FAO ຈົ່ງສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອ ແກ່ ສປປ ລາວ ໃນການຈັດຕັ້ງປະຕິບັດແຜນການ, ໂຄງການ ທີ່ຕິດພັນກັບການພັດທະນາພັດທະນາຊົນນະບົດ, ລຶບລ້າງຄວາມທຸກຍາກ ແລະ ໄພອຶດຫົວ ໃຫ້ບັນລຸຜົນສຳເລັດຕາມຄາດ ໝາຍທີ່ວາງໄວ້.

ໃນໂອກາດດຽວກັນ, ທ່ານຜູ້ອຳນວຍການໃຫຍ່ ອົງການ FAO ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງລັດຖະບານລາວ, ໂດຍການເດີນທາງມາຢ້ຽມຢາມໃນຄັ້ງນີ້ ສະແດງໃຫ້ເຫັນເຖິງການຮ່ວມມືທີ່ດີ ລະຫວ່າງ ສປປ ລາວ ແລະ ອົງການ FAO ໃນໄລຍະຜ່ານມາ ແລະ ການເອົາໃຈໃສ່ເປັນພິເສດ ໃນການຮ່ວມມືໃນວຽກງານການຄ້ຳປະກັນສະບຽງອາຫານ ແລະ ປັບປຸງໂພຊະນາການ.

ອົງການ FAO ໄດ້ມີການຮ່ວມມືກັບ ສປປ ລາວ ຕັ້ງແຕ່ປີ 1975 ເປັນຕົ້ນມາ ແລະ ໄດ້ສ້າງຕັ້ງຫ້ອງການຜູ້ຕາງໜ້າຂອງຕົນ ປະຈຳ ສປປ ລາວ ໃນປີ 1980.


ປະຈຸບັນ, ສປປ ລາວ ແລະ ອົງການ FAO ກຳລັງຈັດຕັ້ງປະຕິບັດແຜນງານຊ່ວຍເຫຼືອ ສປປ ລາວ ຊຶ່ງມີມູນຄ່າ 37 ລ້ານໂດລາສະຫະລັດ ຫຼື 325,6 ຕື້ກີບ ສຳລັບໄລຍະປີ 2016-2021.

ຂ່າວ,​ພາບ: ກົມປະຊາສຳພັນ ສນຍ