ວັດທ່າແຕງໃຕ້ ມີພຣະເຈົ້າກຳຈັດທຸກປາງຊະນະມານໄວ້ ເພື່ອສັກກາລະບູຊາ

ວັດທ່າແຕງໃຕ້ ມີພຣະເຈົ້າກຳຈັດທຸກປາງຊະນະມານໄວ້ ເພື່ອສັກກາລະບູຊາ

12th November 2019 0 By Admin

ຊາວພຸດທະສາສະໜາສະນິກາຊົນເມືອງທ່າແຕງແຂວງເຊກອງຮ່ວມບໍລິຈາກສ້າງບຸນກຸສົນ ແລະ ມີສັດທາເຫຼື້ອມໃສໃນພະພຸດທະສາສະໜາອັນແຮງກ້າສົມທົບທຶນຫຼໍ່ພຣະທອງ 1 ອົງ ໂດຍມີນໍ້າໜັກ 250 ກິໂລກຼາມ,ລວມມູນຄ່າ 60 ລ້ານກ່ວາກີບ.

ເພື່ອປະດິດສະຖານຢູ່ຫໍແຈກ ຫຼື ສາລາໂຮງທໍາວັດບ້ານທ່າແຕງໄຕ້,ເຊິ່ງພິທີຫຼໍ່ພຣະພຸດທະຮູບອົງດັ່ງກ່າວຈັດຂຶ້ນໃນວັນທີ 9 ພະຈິກ 2019,

ໂດຍມີ ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ,ທ່ານ ສົມເພັດ ເອີດລັດດາ ວ່າການເຈົ້າເມືອງທ່າແຕງ,ພຣະອາຈານບຸນໂຖ້ຍ ໄຊຍະບຸດ ປະທານ ອົງການພຸດທະສາສະໜາ ແຂວງເຊກອງ,ມີ ພຣະອາຈານ ບຸນທັນ ສຸລິສັກ ເຈົ້າຄະນະເມືອງ. ພ້ອມດ້ວຍພາກສ່ວນກ໋ຽວຂ້ອງທັງຂັ້ນແຂວງ-ເມືອງ ແລະ ອົງການປົກຄອງບ້ານຊາວພຸດທະສາສະໜາສະນິກາຊົນເຂົ້າຮ່ວມຢ່າງຫຼວງຫຼາຍ.

ບ້ານທ່າແຕງໄຕ້ ແມ່ນບ້ານໜຶ່ງທີ່ມີປະຊາຊົນມາຕັ້ງຖິ່ນຖານຢູ່ເປັນເວລາດົນນານ ແລະ ເປັນບ້ານທີ່ໄດ້ສ້າງຕັ້ງວັດຂຶ້ນເປັນແຫ່ງທຳອິດຂອງເມືອງທ່າແຕງ ແຂວງເຊກອງເຊິ່ງໄດ້ນັບຖືສາສະໜາພຸດມາແຕ່ປີ ພຸດທະສັກະລາດ 2326 ແລະ ຄຼິດຕະສັກະລາດ 1783 ນັບເປັນເວລາກ່ວາ 236 ປີ,ກ່ອນສະໄໝຈັກກະພັດຝັ່ຣງເຂົ້າມາປົກຄອງປະເທດລາວ.

ປັດຈຸບັນບ້ານທ່າແຕງໄຕ້ໄດ້ມີສັດທາອັນແຮງກ້າໃນການປະຕິສັງຂອນ ຫຼື ກໍ່ສ້າງສາລາໂຮງທຳເພື່ອເປັນບ່ອນຮອງຮັບໃນການທໍາບຸນສິນກິນທານ ຫຼື ເປັນບ່ອນປະຕິບັດກິດຈະກຳທາງພຸດທະສາສະກໍຄືສິ່ງສັກສິດເປັນຕົ້ນ.

ພຣະພຸດທະຮູບທອງທີ່ມີຊື່ວ່າ: ພຣະເຈົ້າກຳຈັດທຸກປາງຊະນະມານ ຈໍານວນ 1 ອົງທີ່ມີນໍ້າໜັກ 250 ກິໂລກຼາມນັ້ນ ເປັນບ່ອນສັກກາລະບູຊາ,ເປັນທີ່ເພິ່ງທາງດ້ານຈິດໃຈ ແລະ ຄວາມສະມາຄີຂອງປະຊາຊົນຊາວພຸດທະສາສະນີກາຊົນ ໂດຍສືບທອດມູນເຊື້ອທີ່ມີມາແຕ່ດົນນານ ແລະ ຮັກສາໄວ້ຮີດຄອງປະເພນີອັນດີງາມຂອງຊາດໃຫ້ຍືນຍົງຄົງຕົວຕະຫຼອດໄປ.

.

ຂ່າວ-ພາບ: ສະຫຍາມ ຈັນທະສອນ. 020 55175490-030 5436832.
ສົ່ງ:ຄູ່ຮ່ວມງານ 11 /11/ 2019.