ຄະນະຜູ້ແທນ ສປປ ລາວ ຮ່ວມກອງປະຊຸມຂອບການຮ່ວມມື ອາຊີຕາເວັນອອກ ແລະ ອາເມລິກາລາຕິນ ທີ່ໂດມິນິກັນ

ຄະນະຜູ້ແທນ ສປປ ລາວ ຮ່ວມກອງປະຊຸມຂອບການຮ່ວມມື ອາຊີຕາເວັນອອກ ແລະ ອາເມລິກາລາຕິນ ທີ່ໂດມິນິກັນ

11th November 2019 0 By Admin

ໃນວັນທີ 08-09 ພະຈິກ 2019, ທ່ານ ສະເຫລີມໄຊ ກົມມະສິດ, ລັດຖະມົນຕີ ກະຊວງການຕ່າງປະເທດ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືອາຊີຕາເວັນອອກ ແລະ ອາເມລິກາລາຕິນ (FEALAC) ຄັ້ງທີ 9 ແລະ ກອງປະຊຸມປິ່ນອ້ອມອື່ນໆ ທີ່ ຊານໂຕ ໂດມິງໂກ, ສາທາລະນະລັດ ໂດມິນິກັນ.


ໃນກອງປະຊຸມລັດຖະມົນຕີຕ່າງປະເທດ FEALAC ຄັ້ງທີ 9 ໄດ້ຈັດຂຶ້ນໃນວັນທີ 9 ພະຈິກ 2019, ທີ່ ຊານໂຕ ໂດມີງໂກ, ສາທາລະນະລັດ ໂດມິນິກັນ ໂດຍການເປັນປະທານຮ່ວມ ຂອງ ສປປ ລາວ ແລະ ສາທາລະນະລັດ ໂດມິນິກັນ, ຊຶ່ງມີຜູ້ເຂົ້າຮ່ວມໂດຍບັນດາລັດຖະມົນຕີ ແລະ ຜູ້ຕາງໜ້າຈາກບັນດາປະເທດສະມາຊິກຕ່າງໆຂອງ FEALAC ຈາກພາກພື້ນອາຊີຕາເວັນອອກ ແລະ ອາເມລິກາລາຕິນ.

ຈຸດປະສົງຂອງກອງປະຊຸມ ແມ່ນເພື່ອທົບທວນຄືນຄວາມຄືບໜ້າການຈັດຕັ້ງປະຕິບັດວຽກງານຕ່າງໆໃນໄລຍະຜ່ານມາ ຫຼັງກອງປະຊຸມລັດຖະມົນຕີຕ່າງປະເທດ ຄັ້ງທີ 8 ໃນປີ 2017, ພ້ອມທັງປຶກສາຫາລື ກ່ຽວກັບ ກາລະໂອກາດ ແລະ ສິ່ງທ້າທາຍຕ່າງໆ ໃນການພັດທະນາ ເສດຖະກິດ-ສັງຄົມ ແລະ ການຈັດຕັ້ງປະຕິບັດກິດຈະກຳຕ່າງໃນການຮ່ວມມື ລະຫວ່າງ ສອງພາກພື້ນ ໃຫ້ມີຄວາມເຂັ້ມແຂງ ແລະ ຍົກລະດັບກົນໄກການຮ່ວມມືໃນຂອບ FEALAC ຢູ່ໃນຂົງເຂດການຮ່ວມມືຕ່າງໆ ເຊັ່ນ: ດ້ານການຄ້າ, ການລົງທຶນ, ການທ່ອງທ່ຽວ, ນະວັດຕະກຳ, ສິ່ງແວດລ້ອມ, ການສຶກສາ, ວັດທະນະທຳ-ສັງຄົມ, ການພັດທະນາແບບຍືນຍົງ ແລະ ອື່ນໆ ເພື່ອເຮັດໃຫ້ຂອບການຮ່ວມມືດັ່ງກ່າວ ເປັນຮູບປະທຳຫຼາຍຂຶ້ນ.

ພ້ອມທັງ ແລກປ່ຽນຄວາມຄິດເຫັນຮ່ວມກັນ ກ່ຽວກັບ ການຮ່ວມມືໃນຕໍ່ໜ້າ ເປັນຕົ້ນແມ່ນ ການສຶກສາຄວາມເປັນໄປໄດ້ໃນການສ້າງຕັ້ງກອງເລຂາຖາວອນ FEALAC, ການຈັດກອງປະຊຸມສຸດຍອດ FEALAC ສະໄໝພິເສດ ແລະ ການປັບປຸງແຜນປະຕິບັດງານສະປັບໃໝ່ຂອງ FEALAC.


ເພື່ອກະກຽມໃຫ້ແກ່ກອງປະຊຸມລັດຖະມົນຕີຄັ້ງນີ້, ໄດ້ມີກອງປະຊຸມປິ່ນອ້ອມທີ່ສຳຄັນຕ່າງໆ ຄື: ກອງປະຊຸມປະເທດປະສານງານພາກພື້ນ; ກອງປະຊຸມປະເທດປະສານງານພາກພື້ນອາຊີຕາເວັນອອກ; ກອງປະຊຸມປະເທດປະສານງານພາກພື້ນອາເມລິກາລາຕິນ, ກອງປະຊຸມປະເທດປະສານງານ; ກອງປະຊຸມເຈົ້າໜ້າທີ່ອາວຸໂສ ຟິແລັກ ຄັ້ງທີ 20, ກອງປະຊຸມຄະນະກໍາມະການຮ່ວມກອງທຶນ FEALAC ຄັ້ງທີ 3; ກອງປະຊຸມເວທີປຶກສາຫາລືນະວັດຕະນະກຳດ້ານທຸລະກິດ ແລະ ກອງປະຊຸມສີ່ໜ່ວຍງານວິຊາການຂອງ FEALAC ເຊັ່ນ: 1) ໜ່ວຍງານການຮ່ວມມືດ້ານການຮ່ວມມືທາງສັງຄົມ-ການເມືອງ, ແລະ ການພັດທະນາແບບຍືນຍົງ; 2) ໜ່ວຍງານການຮ່ວມມືດ້ານການຄ້າ, ການລົງທຶນ, ການທ່ອງທ່ຽວ, ຈຸລະວິສາຫະກິດ, ແລະ ວິສາຫະກິດຂະໜາດນ້ອຍ ແລະ ຂະໜາດກາງ; 3) ໜ່ວຍງານການຮ່ວມມືດ້ານວັດທະນະທໍາ, ຊາວໜຸ່ມ, ແລະ ກິລາ; ໜ່ວຍງານການຮ່ວມມືດ້ານວິທະຍາສາດ, ເຕັກໂນໂລຊີ, ນະວັດຕະກໍາ ແລະ ການສຶກສາ ເພື່ອເປັນການກະກຽມໃຫ້ກອງປະຊຸມລັດຖະມົນຕີ FEALAC ໃນຄັ້ງນີ້.

ນອກຈາກນີ້, ກອງປະຊຸມລັດຖະມົນຕີຄັ້ງນີ້ຍັງໄດ້ເຫັນດີຮັບຮອງເອົາ ຖະແຫຼງການ ຊານໂຕ ໂດມິງໂກ ເພື່ອເປັນພື້ນຖານໃນການຈັດຕັ້ງປະຕິບັດວຽກງານໃນຕໍ່ໜ້າ. ໃນໂອກາດນີ້, ໃນວັນທີ 8 ພະຈິກ 2019 ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແລະ ທ່ານ ມີເກັນ ວາຣກັດສ, ລັດຖະມົນຕີຕ່າງປະເທດ ໂດມິນິກັນ ຍັງໄດ້ຮ່ວມລົງນາມໃນບົດບັນທຶກຄວາມເຂົ້າໃຈ ວ່າດ້ວຍ ການປຶກສາຫາລືທາງດ້ານການເມືອງ ລະຫວ່າງ ກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງການຕ່າງປະເທດ ແຫ່ງ ສາທາລະນະລັດ ໂດມີນີກັນ ເພື່ອຮັດແໜ້ນມິດຕະພາບ ແລະ ການຮ່ວມມື ລະຫວ່າງ ສອງປະເທດ. ນອກຈາກນີ້, ໃນວັນທີ 9 ພະຈິກ 2019, ທ່ານ ສະເຫີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ກໍໄດ້ເຂົ້າຮ່ວມພົບປະສອງຝ່າຍ ກັບ ຫົວໜ້າຄະນະຜູ້ແທນ ສ. ກູບາ ແລະ ຍີ່ປຸ່ນ.

 

ຂ່າວຈາກ: ກົມການຂ່າວ, ກະຊວງການຕ່າງປະເທດລາວ