ງານຕະຫຼາດນັດວາງສະແດງສີນຄ້າປະຈໍາປີ 2020 ຂອງເມືອງ ນາຊາຍທອງ ມີຮ້ານຄ້າເຂົ້າຮ່ວມຈໍານວນ 345ຮ້ານ

ງານຕະຫຼາດນັດວາງສະແດງສີນຄ້າປະຈໍາປີ 2020 ຂອງເມືອງ ນາຊາຍທອງ ມີຮ້ານຄ້າເຂົ້າຮ່ວມຈໍານວນ 345ຮ້ານ

11th February 2020 0 By Admin

ໃນງານຄັ້ງນີ້ປະກອບມີ ສີນຄ້າກະສິກໍາ, ຫັດຖະກໍັາ ແລະ ອຸດສາຫະກໍາ ເຂົ້າຮ່ວມວາງສະແດງ ແລະ ຂາຍຄື : ຜະລິດຕະພັນສີນຄ້າໂອດອບພາຍໃນເມືອງ,ຄອບຄົວຕົວແບບຜະລິດເປັນສີນຄ້າດ້ານຕ່າງໆ, ຜົນຜະລິດຂອງປະຊາຊົນພາຍໃນເມືອງ, ໂຮງຈັກ, ໂຮງງານ, ໂຮງຊ່າງຫັດຖະກໍາ,ໂຮງງານເຟີນີເຈີ, ຜະລິດຕະພັນສີນຄ້າໂອດອບຕ່າງເມືອງ, ຮ້ານຄ້າຕ່າງແຂວງ,ບັນດາຮ້ານບໍລິການ ແລະ ສີນຄ້າທົ່ວໄປລວມທັງຮ້ານອາຫານ,ຮ້ານກີນດື່ມ ແລະ ອື່ນໆ.


ທ່ານ ວຽງຄໍາ ສີຫາໂຄດ ຮອງເຈົ້າເມືອງນາຊາຍທອງ ຮອງປະທານຄະນະກໍາມະການຈັດງານຕະຫຼາດນັດປະຈໍາປີ 2020ໄດ້ກ່າວໃນງານວ່າ : ການຈັດງານຕະຫຼາດນັດຄັ້ງນີ້ ເປັນການສະຫຼຸບຄືນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງເມືອງ ນາຊາຍທອງໃນ1ປີຜ່ານມາ ແລະ ເປັນການສ້າງເງື່ອນໄຂໃຫ້ຊາວກະສິກອນ, ຊ່າງຫັດຖະກຳ, ຄອບຄົວຕົວແບບ, ຫົວຫນ່ວຍທຸລະກິດດ້ານຕ່າງໆ ໄດ້ນໍາເອົາຜະລິດຕະພັນຂອງຕົນມາວາງສະແດງ ແລະ ຂາຍອອກສູ່ສັງຄົມ ນອກຈາກນີ້ຍັງເປັນການກະຕຸກຊຸກຍູ້ ແລະ ສົ່ງເສີມການຜະລິດເປັນສີນຄ້າຂອງປະຊາຊົນ ແລະ ຄອບຄົວຕົວແບບໃຫ້ເຕີບໃຫ່ຍເຂັ້ມແຂງ.

ສໍາລັບການຈັດງານຕະຫຼາດນັດຄັ້ງນີ້ ແມ່ນຈະດໍາເນີນໄປນັບແຕ່ວັນທີ11 – 17 ກຸມພາ 2020. ຢູ່ທີ່ ບ້ານ ແຈ້ງສະຫວ່າງ ເມືອງ ນາຊາຍທອງ ນະຄອນຫຼວງວຽງຈັນ.


ເຂົ້າຮ່ວມໃນງານຄັ້ງນີ້ ມີທ່ານ ວິລະສັກ ນາມມຸນຕີ ເຈົ້າເມືອງ ນາຊາຍທອງ , ຫົວຫນ້າພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.


ຂ່າວ : ລັດສະໝີ
ພາບ : ອຸໄລວັນ