ປັດຈຸບັນຍັງບໍ່ພົບການຕິດເຊື້ອພະຍາດອັກເສບປອດ ໂຄໂຣນາ ໄວຣັສ ຢູ່ ສປປ ລາວ

ປັດຈຸບັນຍັງບໍ່ພົບການຕິດເຊື້ອພະຍາດອັກເສບປອດ ໂຄໂຣນາ ໄວຣັສ ຢູ່ ສປປ ລາວ

11th February 2020 0 By Admin

ໃນຕອນບ່າຍຂອງວັນທີ 10 ກຸມພາ 2020, ດຣ ນາງ ພອນປະເສີດ ໄຊຍະມຸງຄຸນ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ສໍາພາດຕໍ່ສື່ມວນຊົນ ກ່ຽວກັບກໍລະນີມີຂ່າວທາງສື່ສັງຄົມອອນໄລວ່າ ແຂວງຜົ້ງສາລີໄດ້ເກີດມີກໍລະນີສົງໄສຄົນຕິດເຊື້ອ ອັກເສບປອດ ໂຄໂຣນາໄວຣັສ ຈໍານວນ 27 ຄົນ ແລະ ໄດ້ເສຍຊີວິດ ແລ້ວ 3 ຄົນເຊິ່ງບໍ່ມີການເກັບຕົວຢ່າງມາວິໄຈ.

ທ່ານຮອງຫົວໜ້າກົມຄວບຄຸມພະຍາດຕິດຕໍ່ກ່າວວ່າ : ຕໍ່ເຫດການນີ້, ທາງສູນວິເຄາະ ແລະ ລະບາດວິທະຍາ, ກະຊວງສາທາລະນະສຸກ ໄດ້ຈັດກອງປະຊຸມດ່ວນທາງໂທລະສັບ ເພື່ອສອບສວນຄືນກ່ຽວກັບສະພາບດັ່ງກ່າວ ແລ້ວພົບວ່າ ມີຄົນເຈັບຈໍານວນ 27 ຄົນທີ່ສະແດງອາການຄ້າຍຄືໄຂ້ຫວັດໃຫ່ຍ ເສຍຊີວິດ 3 ຄົນ, ເຊິ່ງສາເຫດການເສຍຊີວິດນັ້ນ ແມ່ນບໍ່ກ່ຽວຂ້ອງກັບພະຍາດອັກເສບປອດຍ້ອນເຊື້ອຈຸລະໂລກ ໂຄໂຣນາແຕ່ຢ່າງໃດ.

ທາງທີມງານແພດໝໍແຂວງຜົ້ງສາລີ ໄດ້ລົງສອບສວນໃນເບື້ອງຕົ້ນໃນວັນທີ 4 ກຸມພາ ແລະ ໄດ້ເກັບຕົວຢ່າງຈາກຜູ້ທີ່ຍັງເຈັບເປັນ ຈໍານວນ 6 ຄົນ ເພື່ອມາວິເຄາະ ເພື່ອຊອກຫາເຊື້ອໄຂ້ຫວັດໃຫ່ຍ (Influenza A) ແລະ ສູນວິເຄາະລະບາດວິທະຍາ ກໍ່ໄດ້ວິເຄາະຫາເຊື້ອພະຍາດອັກເສບປອດ ໂຄໂຣນາ ແມ່ນໃຫ້ຜົນລົບທັງໝົດ.

ສໍາລັບຂ່າວລືວ່າມີການເສຍຊີວິດ 6 ກໍລະນີຢູ່ເຂດຍົກຍ້າຍນໍ້າອູ7 ແມ່ນບໍ່ມີມູນຄວາມຈິງ; ທາງທິມງານແພດໝໍໄດ້ລົງສໍາຫລວດຄືນ ແລະ ພົບວ່າ ໃນບ້ານແມ່ນມີຄົນເຈັບ 3 ກໍລະນີ ທີ່ມີອາການຄ້າຍຄືໄຂ້ຫວັດ ແລະ ໄດ້ເກັບຕົວຢ່າງມາກວດຢູ່ຫ້ອງວິເຄາະໃນວັນທີ 10 ກຸມພານີ້ (ໂດຍໃນປະຈຸບັນກໍ່ຍັງລໍຖ້າຜົນກວດຢູ່).

ຕໍ່ກັບຂ່າວລືທີ່ເກີດຄວາມບໍ່ເຊື່ອ ໝັ້ນໃນການກວດຂອງຫ້ອງວິເຄາະ ແລະ ການເຮັດວຽກຂອງກະຊວງສາທາລະນະສຸກ ເຊັ່ນວ່າ ເປັນຫຍັງບັນດາປະເທດອ້ອມຂ້າງໃກ້ຄຽງ ຈຶ່ງມີກໍລະນີເປັນພະຍາດທັງໝົດ ຍົກເວັ້ນປະເທດລາວເຮົາ.

ດຣ ນາງ ພອນປະເສີດ ໄຊຍະມຸງຄຸນ ກ່າວຕື່ມວ່າ: ດັ່ງທີ່ໄດ້ແຈ້ງໃຫ້ບັນດາທ່ານຮັບຮູ້ຜ່ານມາແລ້ວວ່າ ລາວເຮົາມີຫ້ອງວິເຄາະທີ່ໄດ້ມາດຕະຖານສາກົນ ທີ່ສູນວິເຄາະແລະ ລະບາດວິທະຍາ ພ້ອມທັງສະຖາບັນປັສເຕີ ແລະ ໂຮງໝໍມະໂຫສົດ ກໍ່ແມ່ນມີຄວາມພ້ອມໃນການກວດວິເຄາະ ທັງ 3 ແຫ່ງຢູ່ຂັນສູນກາງ; ນອກນັ້ນ, ພວກເຮົາຍັງມີເຄື່ອງກວດວິເຄາະແບບເຄື່ອນທີ່ ຢູ່ແຂວງທາງພາກເໜືອ ຄືຫລວງນໍ້າທາ ແລະ ຫລວງພະບາງ ໃນການກວດຊອກຫາເຊື້ອພະຍາດທີ່ສະດວກ ແລະ ວ່ອງໄວ.

ຂໍໃຫ້ບັນດາທ່ານໝັ້ນໃຈໃນມາດຕະຖານການວິເຄາະຂອງພວກເຮົາ. ຕໍ່ກໍລະນີທີ່ວ່າເປັນຫຍັງປະເທດອື່ນມີ ແຕ່ລາວເຮົາບໍ່ມີກໍລະນີນັ້ນ ອາດຍ້ອນຫລາຍປັດໃຈ ເຊັ່ນ: ທິມງານຄັດກອງຢູ່ດ່ານເຂົ້າ-ອອກແມ່ນເຮັດວຽກຢ່າງຟົດຟຶ້ນເພື່ອກວດກາກໍລະນີສົງໄສ, ມີການຕິດຕາມເຝົ້າລະວັງບຸກຄົນທີ່ໄດ້ສໍາຜັດກັບກໍລະນີທີ່ຕິດເຊື້ອພະຍາດຢ່າງໃກ້ຊິດ, ນັກທ່ອງທ່ຽວຈາກປະເທດທີ່ມີການລະບາດເຂົ້າມາປະເທດເຮົາ ແມ່ນມີບໍ່ຫລາຍຖ້າທຽບໃສ່ບ້ານເພິ່ນ, ອາກາດບ້ານເຮົາກໍຂ້ອນຂ້າງຮ້ອນ ເຊິ່ງບໍ່ອໍານວຍຕໍ່ການຂະຫຍາຍຂອງເຊື້ອຈຸລະໂລກຊະນິດນີ້.

ຄວາມໜາແໜ້ນຂອງພົນລະເມືອງເຮົາ ແລະ ທີ່ຢູ່ອາໄສກໍບໍ່ຫລາຍ ແລະຢູ່ແບບເຮືອນດ່ຽວເປັນສ່ວນໃຫ່ຍ .
ຕໍ່ຄໍາຖາມທີ່ວ່າ ຖ້າຫາກວ່າປະເທດເຮົາ ຫາກພົບວ່າມີກໍລະນີຕິດເຊື້ອ ແລະບົ່ງມະຕິການເປັນພະຍາດທີ່ຊັດເຈນແລ້ວ ພວກເຮົາມີວິທີການແລະຍຸດທະສາດຫຍັງແດ່?

ດຣ. ນາງພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກ່າວວ່າ: ລັດຖະບານໄດ້ໃຫ້ຄວາມເອົາໃຈໃສ່ຕໍ່ບັນຫານີ້ຫລາຍ, ຂໍແຈ້ງໃຫ້ທ່ານຊາບວ່າ ຫາກພົບກໍລະນີການຕິດພະຍາດອັກເສບປອດ 2019-n Cov ພວກເຮົາກໍມີໂຮງໝໍສະເພາະທີ່ຈະປິ່ນປົວ ໂດຍແມ່ນລັດຖະບານຈະຮັບພາລະໃຊ້ຈ່າຍໃຫ້ທັງໝົດ ໝາຍຄວາມວ່າຄົນເຈັບຈະບໍ່ໄດ້ເສຍຄ່າຮັກສາແຕ່ຢ່າງໃດ.