ນັກທ່ອງທ່ຽວເຂົ້າທ່ຽວຊົມວັດພູ 83,000 ກວ່າຄົນ ທຽບໃສ່ປີຜ່ານມາຫຼຸດລົງ 15%

ນັກທ່ອງທ່ຽວເຂົ້າທ່ຽວຊົມວັດພູ 83,000 ກວ່າຄົນ ທຽບໃສ່ປີຜ່ານມາຫຼຸດລົງ 15%

8th February 2020 0 By Admin

ທ່ານ ອຸດົມສີ ແກ້ວສັກສິດ ຫົວໜ້າຫ້ອງການຄຸ້ມຄອງມໍລະດົກໂລກວັດພູ ຈຳປາສັກໃຫ້ສຳພາດວ່າ: ໃນໄລຍະ 1 ປີ 2019 ທີ່ຜ່ານມາມີນັກທ່ອງທ່ຽວເຂົ້າມາທ່ຽວຊົມສະຖານບູຮານ ມໍລະດົກໂລກວັດພູຈຳປາສັກທັງໝົດ 8 ໝື່ນ 3 ພັນກວ່າຄົນ. ໃນນັ້ນມີຄົນຕ່າງປະເທດ 4 ໝື່ນ 1 ພັນກວ່າຄົນ, ຄົນລາວ 4 ໝື່ນ 1 ພັນກວ່າຄົນ, ໃນນັ້ນຜູ້ເຂົ້າຊົມສະຖານບູຮານວັດພູໄດ້ເສຍຄ່າເຂົ້າຊົມ 8 ໝື່ນ 1 ພັນກວ່າຄົນ, ແຂກຍົກເວັ້ນການເສຍຄ່າ 1 ພັນ 900 ກວ່າຄົນ.


ນັກທ່ອງທ່ຽວທີ່ເຂົ້າມາທ່ຽວຊົມສະຖານບູຮານວັດພູຈຳປາສັກປີ 2019 ຖ້າທຽບໃສ່ປີຜ່ານມາແມ່ນຫຼຸດລົງປະມານ 15% ສາເຫດນັກທ່ອງທ່ຽວຫຼຸດລົງຍ້ອນສະພາບການເກັບຄ່າບໍລິການເພີ່ມຂຶ້ນເຊັ່ນ: ຄ່າຝາກລົດ, ຄ່າບໍລິການຜ່ານທາງ ແລະ ປັດໃຈພາຍນອກຈາກປະເທດໃກ້ຄຽງທີ່ສົ່ງຜົນກະທົບຕໍ່ການທ່ອງທ່ຽວ.


ທ່ານ ອຸດົມສີ ແກ້ວສັກສິດ ກ່າວອີກວ່າ: ສໍາລັບການຈັດງານມໍລະດົກໂບກວັດພູຈໍາປາສັກປີ 2020 ນີ້ ແມ່ນມີສີສັນບັນຍາກາດໃໝ່ຄຶກຄື້ນ ມີການເຂົ້າຮ່ວມແຫ່ ຂະບວນຈາກ 9 ເມືອງ,1 ນະຄອນ,ມີການສະແດງຄົບງັນ ແລະກິດຈະກໍາຫຼາຍຢ່າງ ທີ່ສະທ້ອນໃຫ້ເຫັນສີລະປະ,ວັດທະນະທໍາຄວາມເປັນເອກະລັກຂອງແຕ່ທ້ອງຖິ່ນ ເພືອໂຄສະນາດຶງດູດນັກທ່ອງທ່ຽວພາຍໃນແລະຕ່າງປະເທດເຂົ້າມາທ່ອງທ່ຽວແຂວງຈໍາປາສັກ ກໍຄືວັດພູມໍບະດົກໂລກ ແຫ່ງທີສອງຂອງລາວໃຫ້ຫຼາຍຂຶ້ນ.ທ່ານຍັງໄດ້ຮຽກຮ້ອງເຊີນຊວນມາຍັງນັກທ່ອງທ່ຽວເຂົ້າທ່ຽວຊົມໃນງານບຸນວັດພູນັບແຕ່ວັນທີ 6 ~ 8 ກຸມພາ ໂດຍບໍ່ເສຍຄ່າ ເສຍແຕ່ຄ່າຝາກລົດໃຫຍ່ຄັນລະ 30 000 ກີບ,ລົດຈັກ 10 000 ກີບ.

ຖ້າທຽບໃສ່ປີຜ່ານມາການໃຊ້ຈ່າຍຫຼຸດລົງ 50%, ຫົວໜ້າຫ້ອງການຄຸ້ມຄອງມໍລະດົກໂລກສັດພູຍັງຮຽກຮ້ອງໃຫ້ນັກທ່ອງທ່ຽວທີ່ເຂົ້າມາທ່ຽວຊົມສະຖານບູຮານວັດພູມີຄວາມເຄົາລົບຢໍາເກງຕໍ່ສະຖານສັກສິດ,ບໍ່ລະເມີດປ້າຍຫ້າມ ເຊັ່ນຫ້າມຈັບ,ຫ້າມເຂົ້າບ່ອນທີ່ຊຸດໂຊມ ຫຼື ກໍາລັງມີການປະຕິສັງຂອນຢູ່ແຕ່ລະບ່ອນ ເພື່ອຄວາມປອດໄພ ແລະບໍ່ໃຫ້ມີອັນເສຍຫາຍ.ພ້ອມທັງຮຽກຮ້ອງໃຫ້ມີການຮັກສາສະພາບແວດລ້ອມດ້ວຍການຖິ້ມຂີ້ເຫຍື່ອ ຫຼືເສດອາຫານຕາມຈຸດທີ່ກໍານົດໄວ້ ເພື່ອຄວາມສະອາດ ແລະສວຍງາມຂອງສະຖານບູຮານວັດພູ.

ຈາກ: ເກດສະໜາ ແກ້ວສຸວັນນະແສງ