ນາຍົກລັດຖະມົນຕີ ເນັ້ນຊຸກຍູ້ສົ່ງເສີມປະຊາຊົນເມືອງ​ສັງ​ທອງ

ນາຍົກລັດຖະມົນຕີ ເນັ້ນຫນັກໃຫ້ອົງການປົກຄອງເມືອງສັງທອງ ນະຄອນຫລວງວຽງຈັນ ສືບຕໍ່ເອົາໃຈໃສ່ຊຸກຍູ້ສົ່ງເສີມປະຊາຊົນພາຍໃນເມືອງ ຜະລິດກະສິກໍາເປັນສີນຄ້າໃຫ້ຫລາຍຂື້ນ ເພາະສັງທອງເປັນເມືອງຫນື່ງທີ່ມີທ່າແຮງໃນດ້ານນີ້ ແນ່ໃສ່ເຮັດໃຫ້ປະຊາຊົນພາຍໃນເມືອງ ມີຫລາຍຮັບເຂົ້າສູ່ຄອບຄົວນັບມື້ເພີ່ມຂື້ນ.

ໃນໂອກາດເຄືອນໄຫວຢ້ຽມຢາມ ແລະ ເຮັດວຽກ ຢູ່ເມືອງສັງທອງໃນວັນທີ​ 7 ມັງ​ກອນ 2020 ຂອງນາຍົກລັດຖະມົນຕີພ້ອມດ້ວຍຄະນະ,​ ທ່ານທອງລຸນ ສີສຸລິດ ນາຍົກລັດ​ຖະມົນຕີໃຫ້ກຽດໂອ້ລົມ ຕໍ່ຄະນະພັກ-ຄະນະນໍາ,ສະມາຊິກພັກ,ພະນັກງານ ພາຍໃນອົງການປົກຄອງເມືອງສັງທອງວ່າ:

ສັງທອງເປັນເມືອງຫນື່ງຂອງນະຄອນຫລວງວຽງຈັນ ທີ່ມີທ່າແຮງດ້ານການຜະລິດກະສິ ດັ່ງນັ່ນ ອົງການປົກຄອງເມືອງ ຕ້ອງຈັດສັນເນື້ອທີ່ດີນຜະລິດກະສິກໍາ ໃຫ້ເປັນແຜນງານລະອຽດວ່າຈະກໍານົດເອົາຈຸດໃດ ໃຫ້ປະຊາຊົນປູກເຂົ້າ,ພືດຊະນິດຕ່າງໆ ແລະ ໄວ້ສະເພາະການລ້ຽງສັດ ພ້ອມທັງຄົ້ນຄວ້າ ຊອກຫາແຫລ່ງທືນ ເພື່ອຈັດຊື້ອຸປະກອນທີ່ທັນສະໄຫມເພື່ອນໍາໃຊ້ເຂົ້າໃນການປູກ,ການລ້ຽງໃຫ້ປະ ຊາ​ຊົນ ເພືອຍົກສູງສະມັດຕະພາບການຜະລິດໃຫ້ຫລາຍຂຶ້ນ ເພື່ອຄໍ້າປະກັນທາງດ້ານສະບຽງອາຫານພາຍໃນເມືອງ ແລະ ເປັນສີນຄ້າສົ່ງອອກ ແນ່ໃສ່ສ້າງລາຍຮັບເພີ່ມໃຫ້ປະຊາຊົນ.

ສໍາລັບການເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງສັງທອງ ຂອງທ່ານທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະຄັ້ງນີ້ ໄດ້ຢ້ຽມຢາມກຸ່ມບ້ານຫັດຖະກໍາໄມ້ປ່ອງ ບ້ານນາປໍ,ພົບປະໂອ້ລົມ ອົງການປົກຄອງ ແລະ ປະ​ຊາຊົນບ້ານຊໍ້,ຢ້ຽມຢາມຝາຍນໍ້າລົ້ນ ຢູ່ບ້ານຫີນສີ່ວ ຟາມລ້ຽງເຕົ່າ​ 5​ A,ໂຄງການປູກຢາງພາລາ,ສວນປູກຫມາກແຕງແຄນຕາລຸບ ຂອງນັກລົງທຶນພາຍໃນ,ຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາເສດ​ຖະກິດ-ສັງຄົມຂອງເມືອງ ຈາກເຈົ້າເມືອງສັງທອງ ,ຢ້ຽມຢາມຟາມລ້ຽງງົວພັນນີວຊີແລນ ແລະ ພື້ນຖານການຜະລິດກະສິກໍາຂອງເມືອງສັງທອງຈໍານວນຫນື່ງ.

ຂ່າວ,​ພາບ: ເດດອາລຸນ ແກ້ວວິໄລວົງ