ໃຜສວຍໂອກາດຂຶ້ນລາຄາຜ້າອັດປາກ, ນໍ້າຢາລ້າງມື ກວດພົບຖອນໃບທະບຽນວິສາຫະກິດ

ໃຜສວຍໂອກາດຂຶ້ນລາຄາຜ້າອັດປາກ, ນໍ້າຢາລ້າງມື ກວດພົບຖອນໃບທະບຽນວິສາຫະກິດ

6th February 2020 0 By Admin

ຍ້ອນຄວາມຕ້ອງການທີ່ສູງຂຶ້ນ ເຮັດໃຫ້ຜະລິດຕະພັນການແພດ ໂດຍສະເພາະຜ້າອັດປາກ ເປັນສິນຄ້າຂາດຕະຫຼາດ ແລະ ຫາຊື້ໄດ້ຍາກ, ຈາກສະຖານະການດັ່ງກ່າວ ເຮັດໃຫ້ມີພໍ່ຄ້າແມ່ຄ້າຫົວໃສ ຈຳນວນໜຶ່ງສວຍໂອກາດຂຶ້ນລາຄາມລຳພັງໃຈ. ສະນັ້ນ, ເພື່ອເປັນການປົກປ້ອງຜູ້ຊົມໃຊ້ ບໍ່ໃຫ້ຖືກເອົາລັດເອົາປຽບ ພ້ອມທັງເຮັດໃຫ້ສັງຄົມມີຄວາມຍຸດຕິທຳ. ຫ້ອງການສຳນັກງານນາຍົກ ໄດ້ອອກແຈ້ງການ ສະບັບເລກທີ 147/ຫສນຍ ລົງວັນທີ 5 ກຸມພາ 2020 ເຖິງ ບັນດາທ່ານ ລັດຖະມົນຕີ, ຫົວໜ້າອົງການທຽບເທົ່າ ທ່ານ ເຈົ້າຄອງນະຄອນຫຼວງວຽງຈັນ ແລະ ບັນດາທ່ານ ເຈົ້າແຂວງທົ່ວປະເທດ ເລື່ອງ ທິດຊີ້ນໍາກ່ຽວກັບການຫ້າມຂຶ້ນລາຄາຜ້າປິດປາກ-ດັງ, ຖົງມື, ຢາ ແລະ ຜະລິດຕະພັນການແພດຕ່າງໆ ທີ່ນໍາໃຊ້ເຂົ້າໃຊ້ການປ້ອງກັນພະຍາດອັກເສບປອດ ຈາກເຊື້ອຈຸລະໂຣກ ສາຍພັນໃໝ່ (ໄວຣັສ ໂຄໂລນາ Novel Coronavirus: NCOV).

ເຊິ່ງໃນແຈ້ງການລະບຸວ່າ: ຫ້າມບຸກຄົນ, ນິຕິບຸກຄົນ, ຮ້ານຂາຍຢາ, ຮ້ານຈໍາໜ່າຍຜະລິດຕະພັນການຢາ ແລະ ຫົວໜ່ວຍທຸລະກິດຕ່າງໆ ຂຶ້ນລາຄາເກີນລາຄາທີ່ລັດກໍານົດ ຫຼື ກັກຕຸນ ຜ້າປິດປາກ-ດັງ, ຖົງມື, ນໍ້າຢາລ້າງມື, ຢາ ແລະ ຜະລິດຕະພັນການແພດຕ່າງໆ ທີ່ນໍາໃຊ້ເຂົ້າໃນການປ້ອງກັນພະຍາດ ອັກເສບປອດ ຈາກເຊື້ອຈຸລະໂຣກ ສາຍພັນໃໝ່ (ໄວຣັສ ໂຄໂລນາ Novel Coronavirus: NCOV) ຢ່າງເດັດຂາດ, ຖ້າພົບເຫັນມີການສວຍໂອກາດຂຶ້ນລາຄາ ແມ່ນຈະໄດ້ດໍາເນີນມາດຕະການເດັດຂາດຕາມກົດໝາຍ ແລະ ລະບຽບການກ່ຽວຂ້ອງກໍານົດ.


ດັ່ງນັ້ນ, ຈຶ່ງມອບໃຫ້ກະຊວງອຸດສາຫະກໍາ ແລະ ການຄ້າ ກໍານົດລາຄາຂາຍ ຜ້າປິດປາກ-ດັງ, ຖົງມື, ນໍ້າຢາ ລ້າງມື, ຢາ ແລະ ຜະລິດຕະພັນການແພດຕ່າງໆ ທີ່ນໍາໃຊ້ເຂົ້າໃນການປ້ອງກັນພະຍາດ ອັກເສບປອດ ຈາກເຊື້ອຈຸລະໂຣກສາຍພັນໃໝ່ (ໄວຣັສ ໂຄໂລນາ Novel Coronavirus: NCOV) ໃຫ້ລະອຽດ ແລະ ປະກາດ ໃຫ້ສັງຄົມຊາບ ຢ່າງທົ່ວເຖິງ.

ພ້ອມທັງ ເປັນເຈົ້າການສົມທົບກັບກະຊວງສາທາລະນະສຸກ, ກະຊວງປ້ອງກັນ ຄວາມສະຫງົບ, ນະຄອນຫຼວງວຽງຈັນ ແລະ ບັນດາແຂວງທົ່ວປະເທດຕິດຕາມ ແລະ ກວດກາຢ່າງໃກ້ຊິດ, ຖ້າພົບເຫັນບຸກຄົນ, ນິຕິບຸກຄົນ, ຮ້ານຂາຍຢາ, ຮ້ານຈໍາໜ່າຍຜະລິດຕະພັນການຢາ ແລະ ບັນດາຫົວໜ່ວຍທຸລະກິດ ສວຍໂອກາດຂຶ້ນລາຄາ ຫຼື ກັກຕຸນສິນຄ້າ ເພື່ອເກງກໍາໄລ ໃນໄລຍະການລະບາດຂອງພະຍາດດັ່ງກ່າວນີ້ ແມ່ນໃຫ້ນໍາໃຊ້ມາດຕະການທາງດ້ານບໍລິຫານ, ດໍາເນີນຄະດີອາຍາ, ຄະດີແພ່ງ, ຖອນໃບອະນຸຍາດດໍາເນີນທຸລະກິດ ແລະ ມາດຕະການອື່ນໆ ຕາມກົດໝາຍ ແລະ ລະບຽບການກ່ຽວຂ້ອງກໍານົດ ຢ່າງເຂັ້ມງວດ.

ພ້ອມນີ້ໃຫ້ກະຊວງ ອຸດສາຫະກໍາ ແລະ ການຄ້າ ເປັນເຈົ້າການສົມທົບກະຊວງສາທາລະນະສຸກ ຂຶ້ນແຜນຈັດຊື້ຜ້າປິດປາກ-ດັ່ງ ຢູ່ພາຍໃນ ແລະ ຕ່າງປະເທດ ເພື່ອສະໜອງໃຫ້ສັງຄົມ ແລະ ສົ່ງໄປຊ່ວຍເຫຼືອ ສປ ຈົນ ຕາມຄວາມສາມາດຕົວຈິງ ແລ້ວສະເໜີກະຊວງການເງິນ ພິຈາລະນາຕາມລະບຽບການ.