ຈໍາປາສັກເອົາໃຈໃສ່ປ້ອງກັນພະຍາດປອດອັກເສບ ຢືນຢັນຍັງບໍ່ພົບກໍລະນີຕິດເຊື້ອ

ຈໍາປາສັກເອົາໃຈໃສ່ປ້ອງກັນພະຍາດປອດອັກເສບ ຢືນຢັນຍັງບໍ່ພົບກໍລະນີຕິດເຊື້ອ

5th February 2020 0 By Admin

ທ່ານ ດຣ ວຽງສີ ສຸພັກດີ ຮອງຫົວໜ້າພະແນກສາທາລະນະສຸກແຂວງຈໍາປາສັກ ໃຫ້ສໍາພາດວ່າ ແຂວງຈໍາສັກໄດ້ໃຊ້ມາດຕະການເຂັ້ມງວດໃນການເຝົ້າລະວັງປ້ອງກັນພະຍາດປອດອັກເສບທີ່ເກີດຈາກເຊື້ອ ໄວຣັດ ໂຄໂຣນາ(Novel Corona Virus) ເຊັ່ນ: ໄດ້ຝຶກອົບຮົມແພດໝໍ ແລະນໍາໃຊ້ເຄື່ອງທັນສະໄໝໃນການກວດອຸນນະພູມຮ່າງກາຍຄົນທີ່ເຂົ້າອອກເມືອງຕາມຈຸດຜ່ານແດນດ່ານສາກົນວັງເຕົ່າ-ຊ່ອງເມັກ,ສະໜາມບິນສາກົນປາກເຊ ແລະ ດ່ານສາກົນໜອງນົກຂຽນ,ຈາກນີ້ກໍຕິດຕາມກຸ່ມເປົ້າໝາຍຄວາມສ່ຽງທີ່ມີປະຫວັດເດີນທາງມາຈາກ ສປຈີນ ໂດຍສະເພາະຈາກເມືອງທີ່ເກີດລະບາດ ເຂົ້າມາ ສປປລາວ ເປັນກໍລະນີພິເສດ,ໄດ້ແນະນໍາປະຊາຊົນເອົາໃຈໃສ່ໃນການປ້ອງກັນເຊັ່ນ: ສວມໃສ່ຜ້າອັດປາກ ອັດດັງໃນເວລາເດີນທາງໃນເຂດຊຸມຊົນແອອັດທີ່ມີຄົນຈໍານວນຫຼາຍ,ໝັ່ນລ້າງມືໃຫ້ສະອາດ,ຮັບປະທານອາຫານທີ່ສຸກດີ ແລະສະອາດ ສະເໝີເພື່ອປ້ອງກັນການຕິດເຊື້ອ.


ທ່ານ ດຣ ວຽງສີ ສຸພັກດີ ກ່າວຕື່ມວ່າ ພະຍາດປອດອັກເສບທີ່ເກີດຈາກເຊື້ອ ໄວຣັດ ໂຄໂຣນາ(Novel Corona Virus) ເກີດຈາກການກິນອາຫານປະເພດສັດທີ່ຂາດຫຼັກສຸກຂະອະນາໄມ ເຊັ່ນ ກິນຊີ້ນສສຸກໆດິບໆ,ສ່ວນການຕິດຕໍ່ພະຍາດນີ້ສາມາດຕິດຈາກສັດສູ່ຄົນ ແລະຈາກຄົນສູ່ຄົນໄດ້ດ້ວຍການສໍາພັດ,ນໍ້າລາຍ,ໄອ-ຈາມ.ແຕ່ໃຖ້າທຽບໃສ່ພະຍາດຊາ ຖືວ່າຍັງບໍ່ຮຸນແຮງເທົ່າ ແລະ ພະຍາດນີ້ກໍສາມາດປ້ອງກັນໄດ້ດ້ວຍທີ່ກາວມາ. ດັ່ງນັ້ນ ປະຊາຊົນບໍ່ຄວນແຕກຕື່ນຈົນເກີນໄປຄືກັບສັງຄົມອອນລາຍບາງພາກສ່ວນທີ່ນໍາສະເໜີພາບ ແລະຂໍ້ມູນທີ່ບໍ່ມີມູນຄວາມຈິງ.


ທ່ານ ດຣ ວຽງສີ ສຸພັກດີ ຮອງຫົວໜ້າພະແນກສາທາລະນະສຸກແຂວງຈໍາປາສັກຍັງກ່າວຢືນຢັນວ່າ ດ້ວຍຄວາມເອົາໃຈໃສ່ໃນການປ້ອງກັນ ຢູ່ແຂວງຈໍາປາສັກ ສປປລາວ ຍັງບໍ່ມີຄົນເຈັບທີ່ເປັນພະຍາດປອດອັກເສບຈາກ ໄວຣັດໂຄໂຣນາແຕ່ຢ່າງໃດ ແຕ່ທັງນີ້ທັງນັ້ນທາງພະແນກສາທາລະນະສຸກກໍບໍ່ໄດ້ປະໝາດຍັງຄົງຮ່ວມກັບທຸກພາກສ່ວນຕິດຕາມເຝົ້າລະວັງປ້ອງກັນຢ່າງເຂັ້ມງວດເພື່ອບໍ່ໃຫ້ພະຍາດປອດອັກເສບ ຈາກໄວຣັດໂຄໂຣນາເກີດຂຶ້ນ.