ທາງການລາວ! ແຈ້ງໂຈະຊົ່ວຄາວ ການອອກບັດວີຊ່າແກ່ນັກທ່ອງທ່ຽວຈີນ

ທາງການລາວ! ແຈ້ງໂຈະຊົ່ວຄາວ ການອອກບັດວີຊ່າແກ່ນັກທ່ອງທ່ຽວຈີນ

3rd February 2020 0 By Admin

ເນື່ອງຈາກສະຖານະການ ການລະບາດຂອງພະຍາດອັກເສບປອດ ຫຼື ໄວຣັສໂຄໂຣນາ ສາຍພັນໃໝ່ ເຊິ່ງປັດຈຸບັນລະບາດໜັກໃນ ນະຄອນອູຮ່ານ ຂອງສປ ຈີນ ແລະ ແແພ່ລາມໄປຍັງບັນດາປະເທດຕ່າງໆໃນໂລກ. ເຊິ່ງເຊື້ອພະຍາດນີ້ ສາມາດຕິດຕໍ່ຈາກຄົນສູ່ຄົນ ໂດຍຜ່ານການຫາຍໃຈ, ການສຳຜັດ ຫຼື ຢູ່ໃກ້ຊິດກັບຜູ້ປ່ວຍເປັນພະຍາດດັ່ງກ່າວ.


ສະນັ້ນ, ເພື່ອເປັນການປ້ອງກັນ ແລະ ຄວບຄຸມ ພ້ອມທັງກັກກັນເຊື້ອພະຍາດ ບໍ່ໃຫ້ແພ່ລາມສູ່ປະຊາຊົນລາວ, ລັດຖະບານ ໄດ້ມີການແຕ່ງຕັ້ງຄະນະສະເພາະກິດ ໂດຍສົມທົບກັບບັນດາພາກສ່ວນຕ່າງໆໃນການຄວບຄຸມ, ປ້ອງກັນ ແລະ ເຝົ້າລະວັງຢ່າງໃກ້ຊິດ.

ຫຼ້າສຸດ ກະຊວງການຕ່າງປະເທດ ໄດ້ອອກແຈ້ງການສະບັບເລກທີ 278/ກກສ. ລົງວັນທີ 2ກຸມພາ 2020 ກ່ຽວກັບ ການຊີ້ນໍາຂອງຂັ້ນເທິງກ່ຽວກັບການໂຈະການອອກວີຊາກັບດ່ານໃຫ້ບັນດານັກທ່ອງທ່ຽວທີ່ເດີນທາງມາຈາກ ສປ ຈີນ.


ເຊິ່ງໃນແຈ້ງການລະບຸວ່າ: ໃຫ້ໜ່ວຍງານວິຊາການກັບດ່ານ ປະຈໍາຢູ່ບັນດາດ່ານສາກົນ ທີ່ມີຊາຍແດນຕິດກັບຈີນ ໃຫ້ໂຈະການອອກວີຊາເຂົ້າ ສປປ ລາວ ປະເພດທ່ອງທ່ຽວເປັນການຊົ່ວຄາວ ໃຫ້ແກ່ບັນດານັກທ່ອງທ່ຽວ ທີ່ເດີນທາງມາຈາກ ສປ ຈີນ ໂດຍເລີ່ມຈັດຕັ້ງປະຕິບັດ ແຕ່ວັນທີ 2 ກຸມພາ 2020 ນີ້ ເປັນຕົ້ນໄປຈົນກວ່າຈະມີການຊີ້ນໍາການປ່ຽນແປງ.