ພົບຜູ້ຕິດເຊື້ອແລ້ວ 830 ລາຍ ຈາກໄວຣັສສາຍພັນໃໝ່ “ໂຄໂຣນາ”

ພົບຜູ້ຕິດເຊື້ອແລ້ວ 830 ລາຍ ຈາກໄວຣັສສາຍພັນໃໝ່ “ໂຄໂຣນາ”

24th January 2020 0 By Admin

ໄວຣັສໂຄໂຣນາສາຍພັນໃໝ່ ທີ່ກຳລັງລະບາດຢູ່ເມືອງ ອູຮ່ານ ແຂວງ ຫູເປີ່ຍ ສປ ຈີນ ນັບວ່າເປັນໄວຣັສທີ່ເຮັດໃຫ້ເກີດພາວະອັກເສບປອດຢ່າງຮຸນແຮງ ສົ່ງຜົນໃຫ້ມີຜູ້ເສຍຊີວິດ ເພີ່ມຂຶ້ນເປັນ 26 ຄົນແລ້ວ ຈາກມື້ວານນີ້ 6 ຄົນ ນັບແຕ່ມີການພົບເຊື້ອໄວຣັສນີ້ໃນຈີນ ເມືອເດືອນ ທັນວາ 2019 ຜ່ານມາ.


ປັດຈຸບັນ ທາງການຈີນ ໄດ້ເພີ່ມມາດຕະການຄວບຄຸມກນເດີນທາງເຂົ້າອອກ ຫຼື ປິດເມືອງ ໃນເມືອງທາງຕອນກາງຂອງປະເທດຢ່າງນ້ອຍ 10 ເມືອງ ສົ່ງຜົນກະທົບປະຊາຊົນປະມານ 20 ລ້ານຄົນ ທີ່ອາໄສຢູ່ບໍລິເວນເມືອງດັ່ງກ່າວ.


ຫຼ້າສຸດ, ມີລາຍງານຜູ້ຕິດເຊື້ອແລ້ວປະມານ 830 ຄົນ ຕາມເມືອງສຳຄັນຕ່າງໆໃນຈີນ ແຕ່ຜູ້ຊ່ຽວຊານດ້ານສາທາລະນະສຸກປະເມີນວ່າ ຕົວເລກທີ່ແທ້ຈິງອາດຈະສູງເຖິງ 1.700 ລາຍ ເຮັດໃຫ້ທາງການຈີນ ຕ້ອງອອກມາດຕະການກັກກັນຜູ້ຄົນພາຍໃນເມືອງໃນຊ່ວງກ່ອນກຸດຈີນ.


ພ້ອມນີ້, ທາງການຈີນ ຍັງວາງມາດຕະການຢ່າງເຂັມງວດທາງດ້ານການທ່ອງທ່ຽວ ແລະ ເດີນທາງຂ້າມເມືອງມີຂຶ້ນ ໃນຫຼາຍຮູບແບບ. ໃນຂະນະທີ່ຫຼາຍເມືອງ ໄດ້ສັ່ງລະງັບດ້ານຄົມມະນາຄົມໄປແລ້ວເຊັ່ນ: ເມືອງອູຮ່ານ ເມືອງເອກຂອງ ແຂວງ ຫູເປີ່ຍ ແລະ ເປັນແຫຼ່ງພົບເຊື້ອໄວຣັສ, ສັ່ງປິດລົດໂດຍສານປະຈຳທາງ (ລົດເມ) ລົດໄຟໃຕ້ດິນ, ບໍລິການທ່າເຮືອກໍ່ຖືກປິດເຊັ່ນດຽວກັນກັບ ທ້ຽວບິນພານິດ ແລະ ລົດໄຟຂາອອກ ກໍ່ຖືກລະງັບການໃຫ້ບໍລິການ ແລະ ທາງການກໍ່ອອກຄໍາເຕືອນປະຊາຊົນຫ້າມອອກຈາກບ້ານເຮືອນເດັດຂາດ.


ໄວຣັສໂຄໂຣນາ ບໍ່ໄດ້ສົ່ງຜົນສະເພາະໃນເມືອງອູຮ່ານ ແຂວງຫູເປີ່ຍ ເທົ່ານັ້ນ, ທາງການຈີນຍັງສັ່ງຢຸດຕິການເຮັດກິດຈະກຳສາທາລະນະໃນສ່ວນອື່ນໆຂອງປະເທດອີກເຊັ່ນ: ສັ່ງປິດພາລາດຊະວັງຕ້ອງຫ້າມ, ສະຖານທີ່ທ່ອງທ່ຽວຊື່ດັງໃນເມືອງປັກກິ່ງ; ສັ່ງປິດເທດສະການທາງປະເພນີຕ່າງໆ ໃນເມືອງປັກກິ່ງ; ສັ່ງລະງັບງານເທດສະການຄານີວັນນານາຊາດ ຢູ່ເກາະຮ່ອງກົງ; ສັ່ງຢຸດຕິການແຂ່ງຂັນບານເຕະປະຈຳປີ ຢູ່ຮ່ອງກົງ ແລະ ສັ່ງຢຸດຕິການຈັດງານສະເຫຼີມສະຫຼອງເທດສະການກຸດຈີນ ໃນທີ່ສາທາລະນະທັງໝົດຢູ່ເກາະມາເກົ໊ານຳອີກ.