4 ພັນກວ່າຄົນທີ່ປະສົບໄພປີຜ່ານມາຢູ່ອັດຕະປື ໄດ້ຮັບເງິນ ພ້ອມເຂົ້າສານ 20 ກິໂລ/ຄົນ/ເດືອນ

4 ພັນກວ່າຄົນທີ່ປະສົບໄພປີຜ່ານມາຢູ່ອັດຕະປື ໄດ້ຮັບເງິນ ພ້ອມເຂົ້າສານ 20 ກິໂລ/ຄົນ/ເດືອນ

9th November 2019 0 By Admin

ອຳນາດການປົກຄອງແຂວງ ອັດຕະປື ໄດ້ສືບຕໍ່ຊ່ວຍເຫຼືອເງິນ 250. 000 ກີບ ແລະ ເຂົ້າສານ 20 ກິໂລ ຕໍ່ເດືອນ ໃຫ້ແຕ່ລະຄົນ ໃນຈຳນວນທັງໝົດ 4.607 ຄົນ ທີ່ຂາດທີ່ຢູ່ອາໄສ ຈາກ ເຫດການອຸປະຕິເຫດ ຄູກັ້ນນ້ຳເຂື່ອນເຊປຽນ-ເຊນ້ຳນ້ອຍ ແຕກ ປີທີ່ຜ່ານມາ ຢູ່ເມືອງ ສະໜາມໄຊ ແຂວງ ອັດຕະປື.

ທ່ານ ເລັດ ໄຊຍະພອນ ເຈົ້າແຂວງ ອັດຕະປື ໄດ້ລາຍງານກ່ຽວກັບການໃຫ້ ການຊ່ວຍເຫຼືອດັ່ງກາວໃຫ້ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ທັງເປັນປະທານ ຄະນະກຳມະການແຫ່ງຊາດ ຮັບຜິດຊອບການຕອບໂຕ້ໄພພິບັດ, ຢູ່ໃນກອງປະຊຸມທີ່ຈັດຂຶ້ນ ທີ່ແຂວງ ອັດຕະປື ເມື່ອບໍ່ດົນມານີ້ວ່າ: ຫຼັງຈາກເກີດໄພພິບັດນໍ້າຖ້ວມ ຄັ້ງໃຫຍ່ຈາກຄູກັ້ນນ້ຳເຂື່ອນເຊປຽນ-ເຊນ້ຳນ້ອຍແຕກໃນເດືອນກໍລະກົດປີກາຍ, ນັບແຕ່ເດືອນກັນຍາປີນີ້ ຈົນເຖິງເດືອນທັນວາປີ 2021 ອຳນາດການປົກຄອງ ສືບຕໍ່ໃຫ້ການຊ່ວຍເຫຼືອ 250,000 ກີບ ແລະ ເຂົ້າສານ 20 ກິໂລ ຕໍ່ ເດືອນ ກັບທຸກໆຄົນທີ່ໄດ້ ຮັບຜົນກະທົບໂດຍສະເພາະຜູ້ຂາດທີ່ຢູ່ອາໄສ.

 

ປະຊາຊົນອີກ 3.123 ຄົນ ຈາກ 13 ບ້ານ ທີ່ໄດ້ ຮັບຄວາມເດືອດຮ້ອນໃນລະດັບຕໍ່າກວ່າ ນັ້ນແມ່ນຈະໄດ້ຮັບເຂົ້າ 18 ກິໂລ ຕໍ່ຄົນຕໍ່ເດືອນ. ນອກຈາກນີ້, ປະຊາຊົນ ໃນເຂດທີ່ປະສົບໄພນໍ້າ ຖ້ວມໄດ້ເຂົ້າເຖິງການບໍລິການຮັກສາສຸຂະພາບ ແລະເດັກນ້ອຍກໍ່ສາມາດກັບຄືນໄປເຂົ້າໂຮງຮຽນໄດ້.

ທ່ານ ບູນໂຮມ ພົມມະສານ ເຈົ້າເມືອງເມືອງ ສະໜາມໄຊ ກ່າວຕໍ່ ນັກຂ່າວ ໜັງ ສືພິມວຽງຈັນທາຍ ໃນອາທິດຜ່ານມາວ່າ: ປະຈຸບັນ ຜູ້ທີ່ຖືກຍົກຍ້າຍແມ່ນອາໄສ ຢູ່ໃນບ້ານ ດົງບາກ, ຫາດຢາວ, ດອນບົກ, ປິນດົງ ແລະ ບ້ານ ຕາມາຍອດ.

 

ທ່ານ ໄດ້ກ່າວຕື່ມອີກວ່າ: ພວກເຮົາກຳລັງເລັ່ງ ປັບປຸງການກໍ່ສ້າງເຮືອນຖາວອນ ຈຳນວນ 36 ຫຼັງຢູ່ບ້ານດົງບາກ ແລະ ທ່າສາງຈັນທາ, ເຊິ່ງປະຈຸບັນ ສຳເລັດແລ້ວ 30%,” ພາຍຫລັງຄູກັ້ນນ້ຳຂອງເຂື່ອນດັ່ງກ່າວແຕກ, ປະຊາຊົນທັງໝົດ 13.067 ຄົນໃນ 13 ບ້ານໄດ້ຮັບຜົນກະທົບ. ປະຊາຊົນທີ່ຍົກຍ້າຍຖິ່ນຖານຫຼາຍກວ່າ 7,000 ຄົນ ກຳລັງພັກເຊົາຢູ່ເຮືອນຊົ່ວຄາວໃນເມືອງ ສະໜາມໄຊ. ປະຊາຊົນ 70 ຄົນໄດ້ເສຍຊີວິດ ຍ້ອນໄພນໍ້າຖ້ວມ ແລະ ຈໍານວນໜຶ່ງຍັງຫາຍ ສາບສູນຢູ່.

ຂ່າວ: ບົວຜັນ