ການເງິນສາລະວັນ ວາງເປົ້າ 2020 ເກັບລາຍຮັບໃຫ້ບັນລຸກວ່າ 100 ຕື້ກີບ

ການເງິນສາລະວັນ ວາງເປົ້າ 2020 ເກັບລາຍຮັບໃຫ້ບັນລຸກວ່າ 100 ຕື້ກີບ

14th January 2020 0 By Admin

ປີ 2019 ແຂວງສາລະວັນສາມາດເກັບລາຍຮັບໄດ້ທັງໝົດ 165,66 ຕື້ກີບເທົ່າກັບ 87% ຂອງແຜນການປີ, ສ່ວນປີ 2020 ຕັ້ງເປົ້າເກັບລາຍຮັບໃຫ້ໄດ້ 188 ຕື້ກວ່າກີບເພີ່ມຂຶ້ນຈາກປີຜ່ານມາ 1,57%.


ທ່ານ ຂັນທະລັກ ໂພໄຊ ຫົວໜ້າພະແນກການເງິນແຂວງສາລະວັນ ໄດ້ລາຍງານຕໍ່ກອງປະຊຸມຄົບຄະນະບໍລິຫານງານພັກແຂວງເປີດກວ້າງ ຄັ້ງທີ 11 ສະໄໝທີ 8 ວ່າ: ໃນປີ 2020 ນີ້ແຂວງສາລະວັນຈະຕ້ອງສູ້ຊົນເກັບລາຍຮັບໃຫ້ໄດ້ທັງໝົດ 188 ຕື້ກີບເພີ່ມຂຶ້ນ 1,57% ທຽບໃສ່ລາຍຮັບປີຜ່ານມາ, ຄຸ້ມຄອງລາຍຮັບພູດສູນກາງ 70 ຕື້ກີບເພີ່ມຂຶ້ນ 12,37% ທຽບໃສ່ການຈັດຕັ້ງປະຕິບັດປີຜ່ານມາ. ໃນນັ້ນ, ລາຍຮັບຈາກພາສີ – ສ່ວຍສາອາກອນ 68 ຕື້ ກວ່າກີບ ແລະ ລາຍຮັບທີ່ບໍ່ແມ່ນພາສີ – ສ່ວຍສາອາກອນ 1 ຕື້ກວ່າກີບ, ສ່ວນລາຍຮັບພູດທ້ອງຖິ່ນໃຫ້ໄດ້ 118 ຕື້ກີບ.


ໃນນັ້ນ, ລາຍຮັບຈາກສ່ວຍສາອາກອນລວມທັງລາຍຮັບວິຊາການໃຫ້ໄດ້ 13 ຕື້ກວ່າກີບ, ຮັບຈາກຊັບສິນໃຫ້ໄດ້ 7,8 ຕື້ກີບ ແລະ ລາຍຮັບຈາກຄຸ້ມຄອງລັດວິສາຫະກິດໃຫ້ໄດ້ 202 ລ້ານກີບ ແລະ ຄຸ້ມຄອງລາຍຈ່າຍງົບປະມານບໍ່ໃຫ້ເກີນ 398,49 ຕື້ກີບ. ເພື່ອຮັບປະກັນການຈັດຕັ້ງປະຕິບັດແຜນງົບປະມານໃນປີ 2020 ໄດ້ຮັບຜົນສຳເລັດຕາມຄາດໝາຍຕ້ອງເອົາໃຈໃສ່ສຶກສາອົບຮົມການເມືອງແນວຄິດ, ຈັດຕັ້ງຜັນຂະຫຍາຍບັນດາໜ້າວຽກຕ່າງໆໃຫ້ແກ່ພະນັກງານຢ່າງເປັນປະຈຳ ແລະ ຕໍ່ເນື່ອງ.


ພ້ອມທັງນຳເອົາແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດມາເຜີຍແຜ່ແນະນຳໃຫ້ແກ່ພະນັກງານລັດຖະກອນໄດ້ຮັບຮູ້ – ເຂົ້າໃຈ, ແກ້ໄຂບັນດາກະແສແນວຄິດຫາງສຽງຂອງສັງຄົມ, ປາກົດການຫຍໍ້ທໍ້ໃຫ້ຖືກຕ້ອງທັນການດ້ວຍການຕິດຕາມກວດກາ, ອັດຊ່ອງຫວ່າງການຮົ່ວໄຫຼ,ສະກັດກັ້ນການສໍ້ລາດບັງຫຼວງ, ປັບປຸງກົນໄກແບບແຜນວິທີເຮັດວຽກ, ນຳໃຊ້ເຕັກໂນໂລຊີທີ່ທັນສະໄໝໃນການຈັດເກັບລາຍຮັບ, ປັບປຸງຖານລາຍຮັບອາ ກອນຄືນໃໝ່ໃຫ້ສອດຄ່ອງກັບສະພາບການຂະຫຍາຍຕົວຂອງເສດຖະກິດຕົວຈິງ, ປະສານສົມທົບກັບພາກສ່ວນທີ່ກ່ຽວຂ້ອງ ແລະ ຂະແໜງການອື່ນໆຕະຫຼອດຮອດອຳນາດການປົກຄອງທ້ອງຖິ່ນຢ່າງແໜ້ນແຟ້ນໃນການຈັດຕັ້ງປະຕິບັດ.


ສຳລັບປີ 2019 ທີ່ຜ່ານມານີ້ສາມາດເກັບລາຍຮັບໄດ້ທັງໝົດ 165,66 ຕື້ກີບເທົ່າກັບ 87% ຂອງແຜນການປີ, ລາຍຮັບພູດສູນກາງຕາມແຜນ 70 ຕື້ກີບແຕ່ປະຕິບັດໄດ້ 62,29 ຕື້ກີບເທົ່າກັບ 83% ຂອງແຜນການປີ. ໃນນັ້ນ, ກວດກາພາສີປະຕິບັດໄດ້ 9,1 ຕື້ກີບ, ດ່ານພາສີສາກົນປະຕິບັດໄດ້ 51,93 ຕື້ກີບ ແລະ ດ່ານພາສີທ້ອງຖິ່ນປາກຕະພານປະຕິບັດໄດ້ 1,25 ຕື້ກີບ, ສ່ວນພູດຂອງແຂວງຕາມແຜນລາຍຮັບທັງໝົດ 110,08 ຕື້ກີບແຕ່ປະຕິບັດໄດ້ 102,99 ຕື້ກີບເທົ່າກັບ 93,56 %.


ໃນນັ້ນ, ຮັບຈາກສ່ວຍສາອາກອນປະຕິບັດໄດ້ 92,93 ຕື້ກີບ, ຮັບຈາກຊັບສິນຂອງລັດປະຕິບັດໄດ້ 9,58 ຕື້ກີບ ແລະ ລາຍຮັບຄຸ້ມຄອງລັດວິສາຫະກິດປະຕິບັດໄດ້ 200,03 ລ້ານກີບ,ດ້ານລາຍຈ່າຍຕາມແຜນແມ່ນ 443,26 ຕື້ກີບ, ປະຕິບັດລາຍຈ່າຍຕົວຈິງ 417,03 ຕື້ກີບ ເທົ່າກັບ 94% ຂອງແຜນການ.

ທີ່ມາ: ກະຊວງການເງິນ