ດີໃຈ ! ເປີດນໍາໃຊ້ແລ້ວເສັ້ນທາງເລກ 4B ຈາກເມືອງຫົງສາ-ຊຽງແມນ

ດີໃຈ ! ເປີດນໍາໃຊ້ແລ້ວເສັ້ນທາງເລກ 4B ຈາກເມືອງຫົງສາ-ຊຽງແມນ

14th January 2020 0 By Admin

ໂຄງການກໍ່ສ້າງເສັ້ນທາງ (4B) ຈາກເມືອງຫົງສາ ແຂວງໄຊຍະບູລີ ຫາ ບ້ານຊຽງແມນ ເມືອງຈອມເພັດ ແຂວງຫຼວງພະບາງ, ໂດຍມີຄວາມຍາວທັງໝົດ 114 ກິໂລແມັດໄດ້ສຳເລັດ 100% ລວມມູນຄ່າທັງໝົດ 60 ລ້ານໂດລາສະະຫັດ ແລະ ໄດ້ເປີດນໍາໃຊ້ຢ່າງເປັນທາງການໃນວັນທີ 14 ມັງກອນ 2020 ນີ້. ໂດຍເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີທ່ານ ບຸນຈັນ ສິນທະວົງ ລັດຖະມົນກະຊວງໂຍທາທິການ ແລະ ຂົນສົ່ງ, ທ່ານ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ, ຜູ້ອໍານວຍການບໍລິສັດຮັບ ເໝົາກໍ່ສ້າງ ແລະ ພາກສ່ວນກ່ຽວຂ້ອງເຂົ້າຮ່ວມ.


ໂຄງການກໍ່ສ້າງເສັ້ນທາງເລກ 4B ເປັນເສັ້ນທາງຫຼວງແຫ່ງຊາດມີຄວາມຍາວ 114 ກິໂລແມັດ, ຊຶ່ງໄດ້ຮັບທຶນກູ້ຢືມຈາກອົງການ NEDA ປະເທດໄທມູນຄ່າສັນຍາປະມານ 60 ລ້ານໂດລາສະຫະລັດ. ໃນນັ້ນ 20% ແມ່ນທຶນຊ່ວຍເຫຼືອລ້າ. ເສັ້ນທາງປູຢາງສອງຊັ້ນເລກ 4B ຈາກບ້ານນາປຸ່ງ ເມືອງຫົງສາ ແຂວງໄຊຍະບູລີ ຫາ ບ້ານຊຽງແມນ ເມືອງຈອມເພັດ ແຂວງຫລວງພະບາງໂດຍແມ່ນ ບໍລິສັດ ຊໍທະວີ ຄອນສະຕຣັກຊັນ ຈໍາກັດ ຜູ້ຮັບເໝົາການກໍ່ສ້າງແຫ່ງປະເທດໄທ, ຊຶ່ງໄດ້ໄດ້ລົງນາມເຊັນສັນຍາໃນວັນທີ 14 ສິງຫາ 2015 ທີ່ນະຄອນຫຼວງພະບາງ ແລະ ໄດ້ລົງມືກໍ່ສ້າງຕົວຈິງນັບແຕ່ວັນທີ 01 ກັນຍາ 2015 ລວມໄລະຍະເວລາການກໍ່ສ້າງ 42 ເດືອນ.


ຫຼັງຈາກທີ່ໄດ້ລົງມືການກໍ່ສ້າງແຕ່ມື້ເຊັນສັນຍາສ້າງຕາມສັນຍາໂຄງການແມ່ນ 32 ເດືອນໃຫ້ສໍາເລັດແຕ່ອີງໃສ່ເງື່ອນໄຂການຍົກຍ້າຍສິ່ງກີດຂວາງ ແລະ ການນໍາເຂົ້າອຸປະກອນການກໍ່ສ້າງຕ່າງໆບໍ່ເປັນໄປຕາມກໍານົດ, ຈຶ່ງເຮັດໃຫ້ການກໍ່ສ້າງລ້າຊ້າໄປເກີນກໍານົດ 12 ເດືອນກວ່າມາຮອດປະຈຸບັນແມ່ນສໍາເລັດ 100% ແລະ ໄດ້ເປີດນໍາໃຊ້ຢ່າງເປັນທາງການໃນວັນທີ 14 ມັງກອນ 2020 ນີ້.

ໂຄງການກໍ່ສ້າງເສັ້ນທາງດັ່ງກ່າວແມ່ນໄດ້ຮັບການສະຫນັບສະຫນູນດ້ານການເງີນຈາກລັດຖະບານແຫ່ງ ຣາດຊະອານາຈັກໄທກໍຄືສໍານັກງານຄວາມຮ່ວມມືພັດທະນາເສດຖະກິດກັບປະເທດເພື່ອນບ້ານ (ອົງການມະຫາຊົນ ຫລື NEDA ແຫ່ງປະເທດໄທ)ຈໍານວນເງີນ 1.977 ລ້ານບາດ, ໃນນີ້ເປັນເງີນກູ້ຈໍານວນ 1.581.600.000 ບາດໄທ, ເງີນຊ່ວຍເຫຼືອລ້າ 395.400.000 ບາດໄທ.

ເສັ້ນທາງ (4B) ເປັນທາງປູຢາງສອງຊັ້ນ, ໜ້າທາງລົດແລ່ນມີ 2 ຊ່ອງຈະລາຈອນ, ຄວາມກວ້າງໜ້າທາງເຂດທົ່ງພຽງແມ່ນ 9 ແມັດ, ເຂດຫຼຸບໂນນແມ່ນ 8 ແມັດ ແລະ ເຂດພູດອຍແມ່ນ 7 ແມັດ, ມີບ່າທາງເບື້ອງລະ 1 ແມັດ. ພ້ອມນັ້ນຍັງໄດ້ກໍ່ສ້າງຂົວຂ້າມທັງຫມົດ 8 ແຫ່ງ, ໃນນັ້ນຢູ່ເຂດແຂວງໄຊຍະບູລີມີ 1 ແຫ່ງ, ຢູ່ເຂດແຂວງຫຼວງພະບາງມີ 7 ແຫ່ງ.

ຂ່າວ-ພາບ: ກະຊວງການເງິນ