ໄຊຍະບູລີມີລາຍຮັບຈາກການທ່ອງທ່ຽວ 7 ລ້ານ 7 ແສນກວ່າໂດລາສະຫະລັດ ໃນປີ 2019

ໄຊຍະບູລີມີລາຍຮັບຈາກການທ່ອງທ່ຽວ 7 ລ້ານ 7 ແສນກວ່າໂດລາສະຫະລັດ ໃນປີ 2019

14th January 2020 0 By Admin

ໄຊຍະບູລີໄດ້ກໍານົດເອົາວຽກງານທ່ອງທ່ຽວເປັນບູລິມະສິດໜຶ່ງໃນສາມເສົາຄໍ້າໃນການພັດທະນາເສດຖະກິດ – ສັງຄົມຂອງແຂວງໄຊຍະບູລີ. ໂດຍສ້າງເງື່ອນໄຂອໍານວຍຄວາມສະດວກໃຫ້ແກ່ການພັດທະນາ ແລະ ສົ່ງເສີມການທ່ອງທ່ຽວ ໃຫ້ມີການຂະຫຍາຍຕົວຂຶ້ນຢ່າງຕໍ່ເນື່ອງ. ຍ້ອນວ່າຈຸດພິເສດຂອງແຂວງໄຊຍະບູລີ ມີດ່ານສາກົນເຂົ້າອອກແລ້ວ 3 ດ່ານ ແລະ ດ່ານປະເພນີ 10 ດ່ານ ແລະ ມີເສັ້ນທາງເຊື່ອມຈອດກັບບັນດາແຂວງຕ່າງໆ ແລະ ມີຊາຍແດນຕິດຈອດກັບປະເທດໃກ້ຄຽງຍາວ 647 ກິໂລແມັດ.

ທ່ານ ບຸນທະວີ ບຸນຊູຮັກ ຮອງຫົວໜ້າພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ ຜູ້ຮັບຜິດຊອບ ຊີ້ນໍາວຽກທ່ອງທ່ຽວໄດ້ໃຫ້ຮູ້ວ່າ: ໃນໄລຍະຜ່ານມາຂະແໜງທ່ອງທ່ຽວໄດ້ເອົາໃຈໃສ່ໃນການຊຸກຍູ້ ແລະ ສົ່ງເສີມ ພັດທະນາແຂວງໄຊຍະບູລີ ໃຫ້ກາຍເປັນສະຖານທີ່ບໍລິການ ນັກທ່ອງທ່ຽວ ເປັນຕົ້ນທ່ອງທ່ຽວຍ່າງປ່າ, ຂີ່ຊ້າງ, ຂີ່ເຮືອລ່ອງນໍ້າຮຸ່ງ,

ທ່ຽວຊົມນໍ້າຕົກຕາດ, ເຂື່ອນໄຟຟ້າ ແລະ ຖໍ້າທໍາມະຊາດຕ່າງໆ. ສົ່ງເສີມງານບຸນເທດສະການ ປະເພນີທີ່ເປັນເອກະລັກສະເພາະທີ່ພົ້ນເດັ່ນຂອງແຕ່ລະທ້ອງຖິ່ນເຊັ່ນ: ງານມະຫາກໍາບຸນຊ້າງ, ບຸນຊ່ວງເຮືອປະຈໍາປີ ໃຫ້ກາຍເປັນບຸນລະດັບຊາດ.

ໃນປີ 2019 ຜ່ານມາມີນັກທ່ອງທ່ຽວເຂົ້າມາທ່ຽວ ແລະ ຜ່ານແຂວງໄຊຍະບູລີ ທັງໝົດ 146.390 ກວ່າຄົນ ສາມາດສ້າງລາຍຮັບ ຈາກການທ່ອງທ່ຽວ ໃນຮູບແບບກະຈາຍທົ່ວສັງຄົມ ໄດ້ທັງໝົດ 7 ລ້ານ 7 ແສນ ກວ່າໂດລາ, ທຽບໃສ່ແຜນການປີເພີ່ມຂຶ້ນ 8,4% ເມື່ອທຽບໃສ່ປີຜ່ານມາຫຼຸດ 8,74% ນັກທ່ອງທ່ຽວເຂົ້າມາທ່ຽວແຂວງສ່ວນຫຼາຍຈະແມ່ນນັກທ່ອງທ່ຽວໄທ ແລະ ຈາກປະເທດຕ່າງໆຈໍານວນໜຶ່ງ. ໂດຍເຂົ້າມາທາງດ່ານສາກົນນໍ້າເຫືອງ, ດ່ານພູດູ່ ແລະ ດ່ານນໍ້າເງິນ.

ທົ່ວແຂວງໄຊຍະບູລີມີແຫຼ່ງທ່ອງທ່ຽວ ທີ່ຂຶ້ນບັນຊີແລ້ວມີ 96 ແຫ່ງ, ມີແຫຼ່ງທ່ອງທ່ຽວທໍາມະຊາດ 71 ແຫ່ງ, ແຫຼ່ງທ່ອງທ່ຽວວັດທະນະທໍາ 18 ແຫ່ງ, ແຫຼ່ງທ່ອງທ່ຽວປະຫວັດສາດມີ 7 ແຫ່ງ, ປະຈຸບັນແຂວງໄຊຍະບູລີ ມີບໍລິສັດທ່ອງທ່ຽວ 13 ບໍລິສັດ ມູນຄ່າການລົງທຶນ 3 ຕື້ 975 ລ້ານກວ່າກີບ, ມີໂຮງແຮມ 7 ແຫ່ງ, ມີ 241 ຫ້ອງ, ເຮືອນພັກ 173 ແຫ່ງ ມີ 2184 ຫ້ອງ, ລີສອດ 6 ແຫ່ງ ມີ 79 ຫ້ອງ, ຮ້ານອາຫານ 89 ຮ້ານ ສາມາດຮັບແຂກໄດ້ 4.608 ຄົນ/ຄັ້ງ, ຮ້ານບັນເທີງ 22 ແຫ່ງ, ຮ້ານກິນດື່ມ 33 ແຫ່ງ. ທ່ານຍັງໄດ້ກ່າວຕື່ມວ່າ, ໃນປີ 2020 ຄາດວ່າຈະມີນັກທ່ອງທ່ຽວເຂົ້າມາທ່ຽວ ແລະ ຜ່ານແຂວງໄຊຍະບູລີໄປຫາແຂວງໃກ້ຄຽງ ໂດຍສະເພາະແມ່ນງານມະຫາກໍາບຸນຊ້າງ ທີ່ຈະໄດ້ຈັດຂຶ້ນໃນກາງເດືອນກຸມພາ 2020 ນີ້.

ຈະມີນັກທ່ອງທ່ຽວເຂົ້າມາ 1 ແສນ 50000 ພັນກວ່າຄົນ, ຈະສ້າງລາຍຮັບກະຈາຍທົ່ວສັງຄົມໄດ້ປະມານ 7 ລ້ານ 2 ແສນກວ່າໂດລາສະຫະລັດ.


ຂ່າວ:ບຸນທີ, News.XBL.