ບໍ່ແກ້ວ ອະນຸມັດໃຫ້ເອກະຊົນ ສຳປະທານດິນລັດໄລຍະ 30 ປີ ຢູ່ເມືອງເມິງ ປູກຢາງພາລາ

ບໍ່ແກ້ວ ອະນຸມັດໃຫ້ເອກະຊົນ ສຳປະທານດິນລັດໄລຍະ 30 ປີ ຢູ່ເມືອງເມິງ ປູກຢາງພາລາ

10th January 2020 0 By Admin

ບໍ່ແກ້ວ ອະນຸຍາດໃຫ້ບໍລິສັດເອກະຊົນ ສຳປະທານດິນລັດ 2 ໂຄງການ ເພື່ອປູກຢາງພາລາ ຢູ່ເມືອງເມິງ ຢູ່ບ້ານຫ້ວຍອໍ້ ມີເນື້ອທີ່ 320 ກວ່າແຮັກຕາ, ມູນຄ່າການລົງທຶນ 3 ລ້ານໂດລາສະຫະລັດ ແລະ ບ້ານປຸງເລາະ ມີເນື້ອທີ່ 463 ກວ່າແຮັກຕາ, ມູນຄ່າການລົງທຶນ 5 ແສນ ໂດລາສະຫະລັດ ໂດຍມີອາຍຸສຳປະທານ 30 ປີ.

ພິທີເຊັນບົດບັນທຶກ ໂຄງການສຳປະທານທີ່ດິນຂອງລັດ 2 ໂຄງການເຂົ້າໃນປູກຢາງພາລາ ຢູ່ ເມືອງເມິງ ແຂວງບໍ່ແກ້ວ ໄດ້ມີຂຶ້ນໃນວັນທີ 09 ມັງກອນ 2020 ຢູ່ພະແນກແຜນການ ແລະ ການລົງທຶນ ແຂວງບໍ່ແກ້ວ ລະຫວ່າງ ທ່ານ ບົວສະຫວາດ ອິນທະວັນ ຫົວໜ້າພະແນກແຜນການ ແລະ ການທຶນແຂວງ ກັບ ທ່ານ ລິວ ຈຽນ ອຳນວຍການບໍລິສັດ ເປົາເຊິງ ຢາງພາລາ ບໍ່ແກ້ວ ຈຳກັດຜູ້ດຽວ, ມີທ່ານ ອິນທະໜອມ ໄຊວິທູນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ສົມສັກ ປິ່ນແກ້ວ ເຈົ້າໆເມືອງເມິງ, ທ່ານ ກອງ ໃຫ້ຢິງ ອໍານວຍການບໍລິສັດ ພັດທະນາກະສິກໍາ ຮາວໂບ ບໍ່ແກ້ວ ຈຳກັດຜູ້ດຽວ, ໃຫ້ກຽດເຂົ້າຮ່ວມເປັນສັກຂີພິຍານໂດຍທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ, ມີການນຳແຂວງ, ເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ໂຄງການປູກຢາງພາລາຢູ່ບ້ານຫ້ວຍອໍ້ ມີເນື້ອທີ່ 320 ກວ່າແຮັກຕາ, ມູນຄ່າການລົງທຶນ 3 ລ້ານໂດລາສະຫະລັດ ໂດຍແມ່ນ ບໍລິສັດ ພັດທະນາກະຊິກຳຫາວໂບ ບໍ່ແກ້ວ ຈຳກັດຜູ້ດຽວ ເປັນຜູ້ສຳປະທານ ແລະ ກຸ່ມບ້ານຜາດຳ, ບ້ານຜາຂາວ, ບ້ານດອນມູນ, ບ້ານຫ້ວຍສ້ານ, ບ້ານຈອມແຈ້ງ ແລະ ບ້ານປຸງເລາະ ມີເນື້ອທີ່ 463 ກວ່າແຮັກຕາ, ມູນຄ່າການລົງທຶນ 5 ແສນ ໂດລາສະຫະລັດ ບໍລິສັດ ເປົາເຊິງ ຢາງພາລາບໍ່ແກ້ວ ຈຳກັດຜູ້ດຽວ ເປັນຜູ້ສຳປະທານ ທັງ 2 ໂຄງການເປັນການລົງທຶນຂອງເອກະຊົນຕ່າງປະເທດ 100%, ມີອາຍຸການ ສຳປະທານ 30 ປີ.


ໂອກາດນີ້, ທ່ານ ກອງຫາຍຍິງ ໄດ້ເວົ້າວ່າ: ການປະຕິບັດ ໂຄງການຢາງພາລານີ້ ຈະເປັນໂຄງການ ໜຶ່ງທີ່ຈະສ້າງວຽກເຮັດງານທຳ ໃຫ້ແກ່ພໍ່ແມ່ປະຊາຊົນເຂດດັ່ງກ່າວ ຫຼັງຈາກຜະລິດນໍ້າຢາງໄດ້ ປະຊາຊົນຈະໄດ້ຮັບຜົນປະໂຫຍດ 73% ແລະ 27 ເປັນຂອງບໍລິສັດ.


ຂ່າວ – ພາບ: ບຸນເພັດ ໄຊຍະວົງ