ຄຳມ່ວນ ຫາລືກັບພາກລັດສ້າງຄວາມເຂັ້ມແຂງໃຫ້ພາກທຸລະກິດ

ຄຳມ່ວນ ຫາລືກັບພາກລັດສ້າງຄວາມເຂັ້ມແຂງໃຫ້ພາກທຸລະກິດ

6th November 2019 0 By Admin

ໃນວັນທີ 6 ພະຈິກ 2019 ຢູ່ທີ່ໂຮງແຮມທ່າແຂກໃໝ່ໄດ້ຈັດກອງປະຊຸມປຶກສາຫາລື ເພື່ອສ້າງຄວາມເຂັ້ມແຂງໃຫ້ພາກທຸລະກິດ. ເປັນກຽດເຂົ້າຮ່ວມເປັນປະທານໂດຍ ທ່ານ ໄຊບັນດິດ ຣາຊຊະພົນ ຮອງປະທານສະ ພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ສຸລະພົງ ສີສຸວັນ ປະທານສະພາການຄ້າ ແລະ ອຸດສາຫະກຳ ພ້ອມຄະນະ ພ້ອມດ້ວຍບັນດາວິສາຫະກິດ – ທຸລະກິດ ພາຍໃນແຂວງເຂົ້າຮ່ວມ.


ກອງປະຊຸມປຶກສາຫາລື ໃນຄັ້ງນີ້ກໍ່ເພື່ອແນໃສ່ໃຫ້ບັນດາຜູ້ເຂົ້າຮ່ວມໄດ້ຫາລືປະກອບຄຳຄິດເຫັນ ແລະ ແລກປ່ຽນບົດຮຽນກ່ຽວກັບອຸປະສັກການດຳເນີນທຸລະກິດຂອງຕົນທີ່ຕິດພັນກັບການບໍລິການຂອງພາກລັດ ເພື່ອຊອກຫາວິທີທາງໃນການສ້າງຄວາມເຂັ້ມແຂງໃຫ້ພາກທຸລະກິດ ແລະ ສັງລວມຄຳຄິດເຫັນຂອງພາກທຸລະກິດພາຍໃນແຂວງຄຳມ່ວນ ນຳສະເໜີຕໍ່ຂັ້ນເທິງ ໂດຍສະເພາະບັນດາສິ່ງກີດຂວາງໃນການດຳເນີນທຸລະກິດ ແລະ ດ້ານນິຕິກຳທີ່ຕິດພັນກັບຂົງເຂດເສດຖະກິດທີ່ເຫັນວ່າຍັງບໍ່ເອື້ອຍອຳນວຍໃນການສ້າງທຸລະກິດໃຫ້ມີຄວາມຍືນຍົງ.

ກອງປະຊຸມບັນດາຜູ້ເຂົ້າຮ່ວມຍັງໄດ້ຮັບຟັງສະພາບເສດຖະກິດຂອງໂລກ ແລະ ສິ່ງທ້າທາຍຜູ້ປະກອບການທຸລະກິດລາວທີ່ກຳລັງຜະເຊີນໃນປັຈຸບັນ, ການນຳສະເໜີໂຄງການຄົ້ນຄວ້າກ່ຽວກັບດັດສະນີ ການສ້າງສິ່ງອຳນວຍຄວາມສະດວກສຳລັບການຄ້າ ແລະ ການລົງທຶນ. ພ້ອມທັງຕອບແບບຟອມສອບຖາມກ່ຽວກັບດັດສະນີການສ້າງສິ່ງອຳນວຍຄວາມສະດວກທາງດ້ານການຄ້າແລະການລົງທຶນຂັ້ນແຂວງ.

ທີ່ມາ: Khammouane News