ວາງສີລາລຶກ ໂຄງການກໍ່ສ້າງສະໜອງໄຟຟ້າເສັ້ນທາງລົດໄຟ ລາວ-ຈີນ

ວາງສີລາລຶກ ໂຄງການກໍ່ສ້າງສະໜອງໄຟຟ້າເສັ້ນທາງລົດໄຟ ລາວ-ຈີນ

2nd January 2020 0 By Admin

ພິທີວາງສີລາລຶກການກໍ່ສ້າງໂຄງການສະໜອງໄຟຟ້າໃຫ້ເສັ້ນທາງລົດໄຟລາວ-ຈີນ ຂອງບໍລິສັດ ລົງທຶນພະລັງງານໄຟຟ້າລາວ-ຈີນ ຈຳກັດ ຈັດຂຶ້ນວັນທີ 30 ທັນວາ 2019 ທີ່ສະຖານີໄຟຟ້າແຮງສູງໂຄກສະອາດ ເມືອງໄຊທານີ ນະຄອນຫຼວງວຽງຈັນ ໂດຍມີທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ບຸນອຸ້ມ ສີວັນເພັງ ຜູ້ອຳນວຍການໃຫຍ່ລັດວິສາຫະກິດ ໄຟຟ້າລາວ, ທ່ານ ເຊິນ ຢຸນ ເຜິງ ຮອງປະທານບໍລິສັດ ຕາຂ່າຍໄຟຟ້າພາກໃຕ້ຈີນ ພ້ອມດ້ວຍພາກສ່ວນກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.


ໃນພິທີ ທ່ານ ຢ້າງ ຢົ່ງ ຮຸຍ ປະທານບໍລິຫານບໍລິສັດ ລົງທຶນພະລັງງານໄຟຟ້າລາວ-ຈີນ ຈຳກັດ ໄດ້ຂຶ້ນກ່າວວ່າ: ພາຍໃຕ້ການສະໜັບສະໜູນຈາກກະຊວງພະລັງງານ ແລະ ບໍ່ແຮ່ ແລະ ພາກ¬ສ່ວນກ່ຽວຂ້ອງ ບໍລິສັດ ຕາຂ່າຍໄຟຟ້າຈີນພາກໃຕ້ ແລະ ລັດວິສາຫະກິດ ໄຟຟ້າລາວ ໄດ້ສ້າງຕັ້ງບໍລິສັດ ຮ່ວມລົງທຶນພະລັງງານໄຟຟ້າລາວ-ຈີນ ຈຳກັດ ຂຶ້ນ ໂດຍການຮ່ວມມືບໍລິສັດນີ້ມີໜ້າທີ່ພັດທະນາການກໍ່ສ້າງ ແລະ ການດຳເນີນທຸລະກິດຂອງໂຄງການກໍ່ສ້າງສາຍສົ່ງສະໜອງໄຟຟ້າໃຫ້ທາງລົດໄຟລາວ-ຈີນ ເຊິ່ງໂຄງການນີ້ຈະຜະລິດສາຍສົ່ງແຮງດັນ 115 ກິໂລໂວນ 20 ແລວສາຍ ແລະ ສ້າງຕັ້ງຂະຫຍາຍສະຖານີຍ່ອຍ 11 ແຫ່ງ ໂດຍກວມເອົາແຂວງຫຼວງນ້ຳທາ, ອຸດົມໄຊ, ຫຼວງພະບາງ, ວຽງຈັນ ແລະ ນະຄອນຫຼວງວຽງຈັນ ຄາດວ່າຈະສຳເລັດໃນເດືອນມີນາ 2021 ເພື່ອຮອງຮັບເປີດບໍລິການລົດໄຟລາວ-ຈີນ ໃນເດືອນທັນວາ 2021. ນອກນັ້ນ, ຍັງເປັນການຊຸກຍູ້ການພັດທະນາເສດຖະກິດ-ສັງຄົມຂອງລາວ ເພື່ອສ້າງຜົນປະໂຫຍດໃຫ້ປະຊາຊົນທີ່ອາໄສໃນເຂດດັ່ງກ່າວ.


ທ່ານ ທອງພັດ ອິນທະວົງ ກ່າວວ່າ: ໂຄງການນີ້ມີຄວາມສຳຄັນ ນອກຈາກຈະເປັນການກໍ່ສ້າງພື້ນຖານໂຄງລ່າງແລ້ວ ຍັງເພື່ອຮັບປະກັນໃຫ້ແກ່ການພັດທະນາໂຄງການລົດໄຟຄວາມໄວສູງ ເຊິ່ງແມ່ນໂຄງການທີ່ເປັນຍຸດທະສາດທີ່ພັກ ແລະ ລັດ ເຮົາໄດ້ຖືເປັນໂຄງການທີ່ມີຄວາມສຳຄັນຍິ່ງຕໍ່ການພັດທະນາເສດຖະກິດ-ສັງຄົມຢູ່ລາວ ທັງໃນສະເພາະໜ້າ ແລະ ໄລຍະຍາວ ພ້ອມນັ້ນ ໂຄງການນີ້ຖືວ່າແມ່ນໂຄງການພັດທະນາລະບົບສາຍສົ່ງໂຄງ¬ການໜຶ່ງທີ່ສຳ-ຄັນ ແລະ ໄດ້ຖືກກຳນົດຢູ່ໃນແຜນພັດທະນາວຽກງານພະລັງງານ ແລະ ບໍ່ແຮ່ ໄລຍະ 5 ປີ ຄັ້ງທີ VIII (2016-2020) ແນໃສ່ສະໜອງກະແສໄຟຟ້າຮັບໃຊ້ການພັດທະນາລົດໄຟຄວາມໄວສູງ ໂດຍລັດວິສາຫະກິດ ໄຟຟ້າລາວເປັນເຈົ້າຂອງໂຄງການ ມີຄວາມເຊື່ອໝັ້ນວ່າພາຍຫຼັງສຳເລັດການກໍ່ສ້າງໂຄງການນີ້ຈະເປັນເງື່ອນໄຂ ແລະ ສ່ວນປະກອບທີ່ສຳຄັນເຂົ້າໃນການພັດທະນາລະບົບສາຍສົ່ງ ກໍຄື ການພັດທະນາພື້ນຖານດ້ານວຽກງານຄົມມະນາຄົມໃຫ້ຂະຫຍາຍຕົວຢ່າງໜັກແໜ້ນ ແລະ ນຳເອົາຜົນປະໂຫຍດຢ່າງຫຼວງຫຼາຍມາໃຫ້ປະເທດຊາດໃນອະນາຄົດ.

ທີ່ມາ: ພະລັງງານ ແລະ ບໍ່ແຮ່