ຊົມພາບອະດີດ ບ້ານຜານົມ ເມືອງຫຼວງພະບາງ ເມື່ອປີ 1957

ຊົມພາບອະດີດ ບ້ານຜານົມ ເມືອງຫຼວງພະບາງ ເມື່ອປີ 1957

28th December 2019 0 By Admin

ບ້ານຜານົມ ເປັນບ້ານທີມີບັນພະບູຣຸດເປັນຄົນລື້ ທີອົບພະຍົກມາແຕ່ດິນແດນສິບສອງປັນນາ ເທື່ອທຳອິດທີອົບພະຍົກມາ ເມື່ອໃນ ຄ.ສ 1847 ເຊິ່ງໃນຕອນນັ້ນ ລາວເຮົາຍັງເປັນປະເທດສະຣາດຂອງໄທຢູ່ ໃນເທື່ອນັ້ນ ກອງທັບໄທ ຍົກທັບຂຶ້ນໄປປາບຈະລາຈົນ ເຊຶ່ງເກີດຂຶ້ນໃນເມືອງຫລວງຊຽງຮຸ່ງ ຂອງແຄວ້ນສິບສອງປັນນາ ໂດຍມາເກນກອງທັບຈາກເມືອງຫລວງພຣະບາງ ເຊຶ່ງພຣະເຈົ້າສຸກກະເສີມ ຜູ້ເປັນເຈົ້າຄອງນະຄອນຫລວງພຣະບາງ ໃຫ້ຂຶ້ນໄປຊ່ວຍ ຫລັງປາບຈະລາຈົນຮຽບຮ້ອຍແລ້ວ ໄດ້ກວາດຕ້ອນຄອບຄົວ ອຸປະຣາດຊຽງຮຸ່ງ ຜູ້ຄົນລື້ ມາໄວ້ໃນເຂດເມືອງຫລວງພຣະບາງ.

*
ເທື່ອທີ່ສອງເກີດຂຶ້ນໃນປີ ຄ.ສ 1852 ສະໄໝພຣະເຈົ້າຈັນທະຣາຊ ອະນຸຊາ ຂອງພຣະເຈົ້າສຸກກະເສີມ ເປັນເຈົ້າຄອງນະຄອນຫລວງພຣະບາງ ເມື່ອພຣະບາດສົມເດັດພະຈອມເກົ້າເຈົ້າຢູ່ຫົວ ຣາຊະການທີ 4 ຂອງສະຫຍາມ ໂປຣດໃຫ້ພຣະເຈົ້ານ້ອງຢາເທີ ກົມມະຫລວງວົງສາທິຣາຊສະນິດ ເປັນແມ່ທັບໃຫຍ່ ຍົກໄປຕີເມືອງຊຽງຕຸງ ພຣະເຈົ້າຈັນທະຣາຊ ແຫ່ງຫລວງພຣະບາງ ກໍ່ໂປຣດໃຫ້ເຈົ້າສິຣິສາ ໂອຣົສ ຂອງເຈົ້າອຸ່ນແກ້ວ ອະດິດເຈົ້າອຸປະຣາຊ ( ພໍ່ຂອງເຈົ້າມະຫາອຸປະຣາຊບຸນຄົງ ເຈົ້າມະຫາອຸປະຣາຊບຸນຄົງ ກໍ່ເປັນພໍ່ຂອງເຈົ້າມະຫາອຸປະຣາຊເພັຊຣາຊ).

ໃນສະໄໝພຣະເຈົ້າສຸກກະເສີມ ຍົກກອງທັບເມືອງຫລວງພຣະບາງໄປຊ່ວຍຮົບ ໂດຍທັບຫລວງພຣະບາງເດີນທັບ ຜ່ານເຂດສິບສອງປັນນາ ເພື່ອຕີໂອບເມືອງຊຽງຕຸງ ທາງທິດຕະເວັນອອກ ການສູ້ຮົບຄັ້ງນັ້ນ ແມ່ນແມ່ທັບໄທ ແລະ ຫລວງພຣະບາງ ຈະພ່າຍແພ້ກັບຄືນມາ ຈົນເຖິງຂະໜາດເຈົ້າສິຣີສາ ແມ່ທັບຝ່າຍຫລວງພຣະບາງສິ້ນພຣະຊົນໃນການຮົບ ແຕ່ໃນການເດີນທັບກັບ ກໍໄດ້ກວາດຕ້ອນຄອບຄົວລື້ ຈາກເມືອງຫຼ້າ ໃນເຂດສິບສອງປັນນາ ລົງມານຳ ສ່ວນຫນຶ່ງມາຢູ່ໃນເຂດບໍລິເວນເມືອງເງີນ ແຂວງໄຊຍະບູລີ ແລະບາງສ່ວນເຂົ້າມາເຖິງປະເທດສະຫຍາມ ຕັ້ງບ້ານເຮືອນຢູ່ແຖບ ອຳເພີປົວ ແຂວງນ່ານ ແລະ ອຳເພີຊຽງຄຳ ແຂວງພະເຍົາ.

*

ສຳລັບໄທລື້ທີ່ຫລວງພຣະບາງ ຖືກໃຫ້ຍ້າຍໄປຕັ້ງບ້ານເຮືອນຢູ່ແຄມແມ່ນ້ຳຄານ ນອກເມືອງຫລວງພະບາງ ແລະ ຮຽກບ້ານຂອງຕົນວ່າ ບ້ານຜານົມ ໃຊ້ສີມືຕຳແຜ່ນຊຶ່ງມີມາແຕ່ຕອນຢູ່ໃນດິນແດນສິບສອງປັນນາ ຮັບໃຊ້ຣາຊະສຳນັກຫລວງພຣະບາງ ໂດຍເປັນຜູ້ຕຳແຜ່ນສົ່ງໃຫ້ເຈົ້ານາຍໃນຣາຊະສຳນັກ ໃຊ້ນຸ່ງໃນຣາຊະພິທີຕ່າງໆ.

*
ທີ່ມາ: ນະຄອນຫລວງພຣະບາງ #LuangprabangCity ຂອບໃຈຮູບພາບຈາກ : Halpern, Joel M. (Joel Martin)