ບ້ານແບບຢ່າງ!! 3 ບ້ານ ໃນເມືອງໂພນທອງ ໄດ້ຮັບນາມມະຍົດເປັນບ້ານປ້ອງກັນຊາດເຂັ້ມແຂງ

ບ້ານແບບຢ່າງ!! 3 ບ້ານ ໃນເມືອງໂພນທອງ ໄດ້ຮັບນາມມະຍົດເປັນບ້ານປ້ອງກັນຊາດເຂັ້ມແຂງ

6th November 2019 0 By Admin

ໃນລະຫ່ວາງວັນທີ 1 – 3 ພະຈິກ ປີ 2019 ຜ່ານມານີ້ ເມືອງໂພນທອງ ແຂວງ ຫຼວງພະບາງ ໄດ້ຈັດພິທີປະກາດຮັບຮອງເອົາ 3 ບ້ານ ພາຍໃນ 2 ກຸ່ມຂອງເມືອງໂພນທອງຶເປັນບ້ານປ້ອງກັນຊາດເຂັ້ມແຂງ ໂດຍການເຂົ້າຮ່ວມເປັນປະທານຂອງ ທ່ານ ຄໍາຜາຍ ແກ້ວລາວັນ ຮອງເລຂາຄະນະບໍລິຫານງານພັກເມືອງໂພນທອງ, ມີສະຫາຍ ພັນຕີ ສູນທອນ ສອນມະນີ ຮອງເລຂາຄະນະພັກຮາກຖານ, ຫົວໜ້າການເມືອງກອງບັນຊາການທະຫານເມືອງໂພນທອງ, ມີຫ້ອງການ ແລະ ພະແນກການທີ່ກ່ຽວຂ້ອງ, ອໍານາດການປົກຄອງບັນດາບ້ານ ຕະຫຼອດຮອດພໍ່ແມ່ປະຊາຊົນພາຍບ້ານດັ່ງກ່າວເຂົ້າຮ່ວມ.

ສະຫາຍ ຄຳສິງ ໄຊຍະສິດ ເລຂາພັກບ້ານ, ນາຍບ້ານໆເມືອງຮືບ ໄດ້ຂຶ້ນຜ່ານບົດລາຍງານການລົງກໍ່ສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງວ່າ: ບ້ານເມືອງຮືບທີ່ຂື້ນກັບກຸ່ມເມືອງຮຶບ ແລະ ບ້ານທອງສີ, ບ້ານຫ້ວຍເຮ້ຍທີ່ຂຶ້ນກັບກຸ່ມທອງສີ, ປະກອບມີ 30 ໜ່ວຍ, ມີ 325 ຄອບຄົວ, ມີພົນລະເມືອງທັງໝົດ 2.491 ຄົນ ຍິງ 1.166 ຄົນ, ເຜົ່າລາວລຸ່ມ 453 ຄົນ ຍິງ 172 ຄົນ, ເຜົ່າກືມມຸ 359 ຄົນ ຍິງ 192 ຄົນ, ເຜົ່າມົ້ງ 1.697 ຄົນ, ຍິງ 788 ຄົນ.  ຈາກການລົງກໍ່ສ້າງ ແລະ ປະເມີນຕາມ 6 ມາດຖານເງື່ອນໄຂ ທີ່ກະຊວງປ້ອງກັນປະເທດວາງອອກ ສາມາດຢັ້ງຢືນຮັບຮອງເອົາເປັນຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ທັງໝົດ 289 ຄອບຄົວ, ເທົ່າກັບ 88,92% ຍັງບໍ່ທັນຜ່ານເງື່ອນໄຂມີ 36 ຄອບຄົວເທົ່າກັບ 11,07%.

ພິທີຍັງໄດ້ຜ່ານຂໍ້ຕົກລົງຂອງທ່ານເຈົ້າເມືອງໂພນທອງ ແລະ ຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການອະນຸມັດຮັບຮອງເອົາບ້ານເມືອງຮືບ, ບ້ານທອງສີ ແລະ ຫ້ວຍເຮ້ຍ ເປັນຄອບຄົວ ແລະ ບ້ານປ້ອງກັນຊາດເຂັ້ມແຂງ, ພ້ອມທັງມອບໃບຢັ້ງຢືນໃຫ້ບັນດາບ້ານ ແລະ ຄອບຄົວ ໂດຍແມ່ນ ທ່ານ ຄໍາຜາຍ ແກ້ວລາວັນ ແລະ ສະຫາຍ ພັນຕີ ສູນທອນ ສອນມະນີ ເປັນຜູ້ກ່າວມອບ.

ສະຫາຍ ພັນຕີ ສູນທອນ ສອນມະນີ ໄດ້ກ່າວວ່າ: ການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງແມ່ນອິງໃສ່ຄຳສັ່ງແນະນຳຂອງກົມໃຫຍ່ການເມືອງກອງທັບສະບັບເລກທີ 3430/ກມທ,ລົງວັນທີ 11 ກັນຍາ 2014. ເພື່ອແນໃສ່ເຮັດໃຫ້ບ້ານມີຄວາມສະຫງົບປອດໄພ 100% ພ້ອມທັງຮຽກຮ້ອງໃຫ້ອໍານາດການປົກຄອງຕະຫຼອດຮອດປະຊາຊົນທີ່ໄດ້ກາຍເປັນຄອບຄົວ ແລະ ບ້ານປ້ອງກັນຊາດເຂັ້ມແຂງຕ້ອງໄດ້ ເປັນເຈົ້າການສືບຕໍ່ປະກອບສວ່ນເຂົ້າຮ່ວມການຈັດຕັ້ງເຄື່ອນໄຫວເຮັດວຽກງານ ປ້ອງກັນຊາດ – ປ້ອງກັນຄວາາມສະຫົງບໃນການປົກປັກຮັກສາບ້ານຊ່ອງຂອງຕົນ, ປັບປຸງຕາໜ່າງກອງຫຼອນຂັ້ນບ້ານໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ຮູ້ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນເປັນເຈົ້າການປະສານສົມທົບກັບເທີງ ແລະ ພາກສ່ວນກ່ຽວຂ້ອງ ໃນເວລາມີສະພາບການໃຫ້ທັນກັບເວລາ, ຕ້ານ ແລະ ສະກັດກັ້ນປະກົດການຕ່າງໆ ໜໍ່ແໜງທີ່ຈະກໍ່ໃຫ້ເກີດຄວາມບໍ່ສະຫງົບ.

ພ້ອມກັນນີ້, ກໍ່ຕ້ອງໄດ້ເອົາໃຈໃສ່ໃນການສ້າງເສດຖະກິດປູກຝັງ – ລ້ຽງສັດເພື່ອຍົກລະດັບຊີວິດການເປັນຢູ່ຄອບຄົວໃຫ້ນັບມື້ດີຂື້ນ. ສັງລວມແລ້ວເຮັດວຽກງານ ປກຊ – ປກສ ໄດ້ດີ ຈຶ່ງເຮັດໃຫ້ບ້ານກໍ່ຄື: ປະຊາຊົນມີຄວາມສະຫົງບ ແລະ ມີຊີວິດການເປັນຢູ່ທີ່ດີ, ຄອບຄົວມີຄວາມອົບອຸ່ນຮັ່ງມີຜາສຸກຈະເລີນກ້າວໜ້າ ກາຍເປັນຄອບຄົວ ແລະ ບ້ານປ້ອງກັນຊາດເຂັ້ມແຂງ.

 

ທີ່ມາ: ຫ້ອງການຖວທເມືອງໂພນທອງ