ຍທຂ ຮ່ວມກັບ ບໍລິສັດດົງບູອິນຈິເນຍລິງຈຳກັດລົງນາມ MOU ກ່ຽວກັບໂຄງການປ້ອງກັນຕະຝັ່ງເຈື່ອນໃນແຂວງຄຳມ່ວນ

ຍທຂ ຮ່ວມກັບ ບໍລິສັດດົງບູອິນຈິເນຍລິງຈຳກັດລົງນາມ MOU ກ່ຽວກັບໂຄງການປ້ອງກັນຕະຝັ່ງເຈື່ອນໃນແຂວງຄຳມ່ວນ

20th December 2019 0 By Admin

ໃນຕອນບ່າຍຂອງວັນທີ 19 ທັນວາ 2019 ຢູ່ທີພະແນກໂຍທາທິການ ແລະ ຂົນສົ່ງແຂວງຄຳມ່ວນ ໄດ້ມີພິທີເຊັນບົດບັນທຶກຄວາມເຂົ້າໃຈ ( MOU ) ກ່ຽວກັບການສຶກສາຄວາມເປັນໄປໄດ້ເບື້ອງຕົ້ນຂອງໂຄງການຄຸ້ມ ຄອງແມ່ນໍ້າຂອງແບບລວມສູນ ( ປ້ອງກັນຕະຝັ່ງເຈື່ອນ ) ລະຫວ່າງ ທ່ານ ພິດສະໄໝ ກອງຊາເດດ ຫົວໜ້າພະແນກ ຍທຂ ( ເຈົ້າຂອງໂຄງການ ) ແລະ ທ່ານ ບ໋ອງ ຮິຣີ ປະທານບໍລິສັດດົງບູອິນຈິເນຍລິງຈຳກັດ ສສ ເກົາຫລີ ( ທີ່ປຶກສາ ).

.

ເຂົ້າຮ່ວມມີ ທ່ານ ຄຳຜົງ ວົງພະຈັນ ປະທານກວດກາພັກ – ລັດແຂວງ, ມີພະແນກການ, ເຈົ້້າເມືອງທີ່ກ່ຽວຂ້ອງຄື : ເມືອງທ່າແຂກ, ໜອງບົກ ແລະ ຫິນບູນ ຕະຫລອດຮອດພະນັກງານ – ວິຊາການທັງສອງພາກສ່ວນເຂົ້າຮ່ວມເປັນສັກຂີພິຍານ.

ຈຸດປະສົງ ແລະ ເນື້ອໃນທີທັງສອງຝ່າຍໄດ້ເຫັນດີເປັນເອກະພາບກັນມີຄື : ແຂວງຄຳມ່ວນກໍ່ຄືພະແນກ ຍທຂ ໄດ້ອະນຸຍາດໃຫ້ບໍລິສັດດົງບູອິນຈິເນຍລິງດຳເນີນການສຳຫລວດສຶກສາຄວາມເປັນໄປໄດ້ໃນພື້ນທີ່ລຽບແຄມຝັ່ງແມ່ນໍ້າຂອງໃນແຕ່ລະຈຸດຕ່າງໆ ທີ່ມີຄວາມຈຳເປັນຈະກໍ່ສ້າງປ້ອງກັນຕະຝັ່ງເຈື່ອນເຂດແຂວງຄຳມ່ວນ, ພ້ອມນີ້ທາງບໍລິສັດຍິນດີຈະເປັນຜູ້ຄົ້ນຄວ້າຊອກແຫລ່ງທຶນເພື່ອມາໃຊ້ຈ່າຍເຂົ້າໃນໂຄງການ ແລະ ການບໍລິຫານອື່ນໆ ທີ່ກ່ຽວຂ້ອງ.

ສ່ວນທາງ ຍທຂ ຈະໃຫ້ຄວາມຮ່ວມມືອຳນວຍຄວາມສະດວກທາງດ້ານການປະສານງານກັບອຳນາດການປົກຄອງແຕ່ລະຂັ້ນຕ່າງໆ, ສະໜອງຂໍ້ມູນດ້ານວິຊາການທີ່ຕິດພັນກັບບົດບັນທຶກຄວາມເປັນໄປໄດ້ເບື້ອງຕົ້ນຂອງໂຄງການ. ບົດບັນທຶກສະບັບນີ້ຈະມີຜົນສັກສິດໃນໄລຍະ 90 ວັນ ນັບແຕ່ມື້ລົງລາຍເຊັນ. ທັງນີ້ກໍ່ເພື່ອເປັນບ່ອນອີງໃຫ້ແກ່ການເຄື່ອນໄຫວກິດຈະກຳ ແລະ ຕາມເຈດຈຳນົງຂອງຜູ້ໃຫ້ທຶນ, ເປັນຂໍ້ມູນແກ່ການຕິດຕາມກວດກາກໍານົດໜ້າວຽກ, ກຳນົດຜົນສຳເລັດ ແລະ ເງື່ອນໄຂອື່ນໆ ໃຫ້ສອງຝ່າຍເພື່ອຈັດຕັ້ງປະຕິບັດໃຫ້ທັນຕາມກຳນົດເວລາ.

ຈາກ: https://khammouanenews.com/ ແຂວງຄຳມ່ວນ