ຂ່າວດີ! ກຽມສ້າງສະຖານີລົດເມນະຄອນຫຼວງວຽງຈັນແຫ່ງໃໝ່ ທີ່ສູນການຄ້າລາວ-ໄອເຕັກ

ຂ່າວດີ! ກຽມສ້າງສະຖານີລົດເມນະຄອນຫຼວງວຽງຈັນແຫ່ງໃໝ່ ທີ່ສູນການຄ້າລາວ-ໄອເຕັກ

20th December 2019 0 By Admin

ເນື່ອງຈາກການເພີ່ມຂຶ້ນຂອງປະຊາກອນ ແລະ ຍານພາຫະນະຂອງປະເທດລາວເວົ້າລວມ, ເວົ້າສະເພາະ ໃນນະຄອນຫຼວງວຽງຈັນ ອັນເປັນສາເຫດ ເຮັດໃຫ້ຄວາມແອອັດຂອງການສັນຈອນບົນທ້ອງຖະໜົນເພີ່ມຂຶ້ນ.

ພາບຈຳລອງສະຖານີລົດເມ

ໃນໂອກາດທີ່ ນະຄອນກຽວໂຕ(ປະເທດຍີ່ປຸນ) ໄດ້ສະເໜີໃຫ້ການຊ່ວຍເຫຼືອລ້າ ລົດເມຈຳນວນ 25 ຄັນໃຫ້ແກ່ ລັດວິສາຫະກິດລົດເມນະຄອນຫຼວງວຽງຈັນ, ໃນຄະນະດຽວກັນ ບໍລິສັດ ລາວເວີນ ມະຫາຊົນ ກໍ່ໄດ້ມີແຜນຢາກໃຫ້ລົດເມແລ່ນເຂົ້າຜ່ານ ສູນການຄ້າລາວ-ໄອເຕັກ. ສະນັ້ນ, ຈຶ່ງໄດ້ໃຫ້ການຊ່ວຍເຫຼືອດ້ານງົບປະມານ ໃນການນຳເຂົ້າລົດເມຈຳນວນດັ່ງກ່າວ ແລະ ຕໍ່ມາກໍ່ໄດ້ໃຫ້ການຊ່ວຍເຫຼືອດ້ານງົບປະມານໃນການປັບປ່ຽນປະຕູລົດເມ ຈາກດ້ານຊ້າຍມາເປັນດ້ານຂວາ ເປັນລະບົບໄຮໂດຣລິກ.

ພາບຈຳລອງສະຖານີລົດເມ

ຕໍ່ມາ ບໍລິສັດ ລາວເວີນ ມະຫາຊົນ ເຫັນດີໃຫ້ຄວາມຊ່ວຍເຫຼືອດ້ານສະຖານທີເພື່ອເປັນສະຖານີລົດເມຊົ່ວຄາວ ບາງສາຍທາງທີ່ມີຈຸດເລີ່ມຕົ້ນຈາກສູນການຄ້າລາວ-ໄອເຕັກ ເຊັ່ນ: ສາຍທາງໄອເຕັກ-ຕະຫຼາດເຊົ້າ-ສະໜາມບິນວັດໄຕ; ສາຍທາງໄອເຕັກ-ຕະຫຼາດໄຮ່ຄຳ; ສາຍທາງໄອເຕັກ-ດົງໂດກ ແລະ ສາຍທາງອື່ນອີກຈຳນວນໜຶ່ງ.

ພາບຈຳລອງສະຖານີລົດເມ

ເມື່ອເຫັນໄດ້ວ່າມີປະສິດທິຜົນ ແລະ ມີຄວາມພ້ອມໃນການໃຫ້ບໍລິການແບບເຕັມໂຕ ບໍລິສັດ ລາວເວີນ ມະຫາຊົນ ຈຶ່ງໄດ້ສະເໜີຂໍສ້າງສະຖານີລົດເມນະຄອນຫຼວງວຽງຈັນ ທີ່ສູນການຄ້າລາວ-ໄອເຕັກ ເພື່ອຊ່ວຍຫຼຸດຜ່ອນຄວາມແອອັດຂອງການສັນຈອນຍານພະຫະນະບົນທ້ອງຖະໜົນ, ຮອງຮັບສາຍທາງລົດເມທີ່ຈະເພີ່ມຂຶ້ນໃນຕໍ່ໜ້າ ແລະ ດຶງດູດເອົາມ່ວນຊົນເຂົ້າມາສູນການຄ້າລາວ-ໄອເຕັກ.

ພາບຈຳລອງສະຖານີລົດເມ

ຫຼັງຈາກການຕົກລົງເຫັນດີຈາກຂັ້ນເທິງ ແລະ ທຸກພາກສ່ວນທີ່ກ່ຽວຂ້ອງແລ້ວ ລັດວິສາຫະກິດລົດເມ ນະຄອນຫຼວງວຽງຈັນ ແລະ ບໍລິສັດ ລາວເວີນ ມະຫາຊົນ ຈຶ່ງໄດ້ແຕ່ງຕັ້ງຄະນະຮັບຜິດຊອບວຽກງານຮ່ວມກັນຢ່າງໃກ້ຊິດ ເພື່ອໃຫ້ການກະກຽມ ແລະ ການຈັດຕັ້ງປະຕິບັດ ການສ້າງສະຖານີລົດເມນະຄອນຫຼວງວຽງຈັນ ທີ່ສູນການຄ້າລາວ-ໄອເຕັກ ໃຫ້ເປັນໄປຕາມແຜນທີ່ກຳນົດນົດໄວ້, ເຊິ່ງໂຄງການດັ່ງກ່າວ ຄາດວ່າຈະສຳເລັດການກໍ່ສ້າງ ແລະ ສາມາດເປີດນຳໃຊ້ໄດ້ພາຍໃນເວລາ 18 ເດືອນ.

ພາບຈຳລອງສະຖານີລົດເມ

ເພື່ອເຮັດໃຫ້ໂຄງການສ້າງສະຖານີລົດເມນະຄອນຫຼວງວຽງຈັນ ທີ່ສູນການຄ້າລາວ-ໄອເຕັກ ໄດ້ຮັບການຈັດຕັ້ງປະຕິບັດຢ່າງເປັນທາງການ ລັດວິສາຫະກິດລົດເມນະຄອນຫຼວງວຽງຈັນ ແລະ ບໍລິສັດ ລາວເວີນ ມະຫາຊົນ ຈຶ່ງໄດ້ຈັດຕັ້ງພິທີສັນຍາໂຄງການດັ່ງກ່າວນີ້ຂຶ້ນ.

*

ພາບຈຳລອງສະຖານີລົດເມ

ທີ່ມາ: AeroLaos