ຊົມເຊີຍເຈົ້າໜ້າທີ່ຫຼວງນໍ້າທາ ທຳລາຍສິນຄ້າໝົດອາຍຸ ແລະ ສິນຄ້ານຳເຂົ້າບໍ່ຖືກຕ້ອງຫຼາຍລາຍການ

ຊົມເຊີຍເຈົ້າໜ້າທີ່ຫຼວງນໍ້າທາ ທຳລາຍສິນຄ້າໝົດອາຍຸ ແລະ ສິນຄ້ານຳເຂົ້າບໍ່ຖືກຕ້ອງຫຼາຍລາຍການ

20th December 2019 0 By Admin

ໃນວັນທີ 19 ທັນວາ 2019 ຜ່ານມາ ຢູ່ທີ່ສະຫນາມຂີ້ເຫຍື້ອ ແຂວງຫລວງນ້ຳທາ ໄດ້ທຳລາຍສິນຄ້າຫມົດອາຍຸ, ສິນຄ້າເສື່ອມຄຸນ, ສິນຄ້າປອມແປງລອກຮຽນແບບ ແລະ ສິນຄ້າທີ່ນຳເຂົ້າບໍ່ຖືກຕ້ອງ. ເຂົ້າຮ່ວມໂດຍ ທ່ານ ແສງພອນ ເຈື້ອຫລວງຄຳມີ ຫົວຫນ້າຂະແຫນງການຄ້າພາຍໃນ ພະແນກອຸດສາຫະກຳ ແລະ ການຄ້າແຂວງຫລວງນ້ຳທາ, ມີອຸດສາຫະກຳ ແລະ ການຄ້າເມືອງ 5 ເມືອງ ແລະ ພາກສ່ວນທີ່ກ່ຽວຂ້ອງພາຍໃນແຂວງເຂົ້າຮ່ວມ.

*

ທ່ານ ແສງພອນ ເຈື້ອຫລວງຄຳມີ ຫົວຫນ້າຂະແຫນງການຄ້າພາຍໃນ ພະແນກອຸດສາຫະກຳ ແລະ ການຄ້າ ໄດ້ລາຍງານວ່າ : ໃນໄລຍະຜ່ານມາ ພະແນກອຸດສາຫະກຳ ແລະ ການຄ້າ ໂດຍສະເພາະແມ່ນຂະ ແຫນງການຄ້າພາຍໃນ ໄດ້ເປັນເຈົ້າການເອົາໃຈ ໃສ່ປະສານສົມທົບກັບບັນດາຂະແຫນງການທີ່ກ່ຽວຂ້ອງ ແລະ ຫ້ອງການອຸດສາຫະກຳ ແລະ ການຄ້າເມືອງ ພ້ອມກັນເປັນເຈົ້າການ ຈັດຕັ້ງປະຕິບັດຕາມລະບຽບກົດຫມາຍ ທີ່ກ່ຽວຂ້ອງກັບການກວດກາສິນຄ້າທີ່ບໍ່ຖືກຕ້ອງ, ສິນຄ້າຫມົດອາຍຸການນຳໃຊ້ ແລະ ສິນຄ້າປອມແປງ ລອກຮຽນແບບ ທີ່ລະເມີດລິຂະສິດຂອງຜູ້ອື່ນເຂົ້າມາຈຳຫນ່າຍພາຍໃນແຂວງຫລວງນ້ຳທາ.

*

ຈຸດປະສົງການທຳລາຍສີນຄ້າໃນຄັ້ງນີ້ກໍ່ເພື່ອແນໃສ່ປົກປ້ອງຜູ້ດຳເນີນທຸລະກິດທີ່ຖືກຕ້ອງຕາມລະບຽບກົດຫມາຍ ແລະ ເປັນການປົກປ້ອງຜູ້ຊົມໃຊ້, ຜູ້ບໍລິໂພກໃນສັງຄົມໃຫ້ໄດ້ຊົມໃຊ້ສິນຄ້າທີ່ຖືກຕ້ອງ ແລະ ມີຄຸນນະພາບດີ. ສິນຄ້າທີ່ນຳມາທຳລາຍໃນຄັ້ງນີ້ປະກອບມີ: ສິນຄ້າອຸປະໂພກ-ບໍລິໂພກ ຫມົດອາຍຸການນຳໃຊ້ ກວດກາ ຈຳນວນ 240 ຮ້ານ. ໃນນີ້ ກວດພົບສິນຄ້າຫມົດອາຍຸການນຳໃຊ້ຈຳນວນ 47 ຮ້ານ, ມີ 82 ລາຍການ, ຈານດາວທຽມກວດພົບມີທັງຫມົດ 19 ຮ້ານ; ຍຶດຈານດາວທຽມໄດ້ 63 ແຜ່ນ, ກ່ອງຮັບສັນຍານ 81 ກ່ອງ ແລະ ຫົວດູດສັນຍານ 10 ຫົວ, ແຟັບແອັກແທັກອີຊີປອມ ກວດພົບຢູ່ເມືອງຫລວງນ້ຳທາ, ເມືອງສິງ ແລະ ເມືອງລອງ ມີ 22 ຮ້ານ ຍຶດໄດ້ທັງຫມົດ 279 ແກັດ ແລະ 242 ຖົງ, ເຄື່ອງດື່ມ M-150 ກວດພົບ ທັງຫມົດ 70 ຮ້ານ ທີ່ນຳເຂົ້າບໍ່ຖືກຕ້ອງຕາມກົດຫມາຍ 1000 ກວ່າແກັດ ລວມມູນຄ່າທັງຫມົດ 40 ລ້ານກວ່າກີບ.

*

ພ້ອມນີ້ເຈົ້າຫນ້າທີ່ ທີ່ລົງກວດກາພົບເຫັນສິນຄ້າຫມົດອາຍຸ, ສິນຄ້າເຊື່ອມຄຸນ, ສິນຄ້າປອມແປງລອກຮຽນແບບ ແລະ ສິນຄ້າທີ່ນຳເຂົ້າບໍ່ຖືກຕ້ອງ ກໍ່ໄດ້ສຶກສາອົບຮົມ ແລະ ກ່າວເຕືອນ ຕໍ່ຜູ້ປະກອບການຄ້າຂາຍ ຍ້ອນເປັນຄັ້ງທຳອິດ. ສ່ວນສິນຄ້າທີ່ຍຶດໄດ້ທາງເຈົ້າຫນ້າທີ່ໄດ້ນຳເອົາໄປທຳລາຍຖີ້ມ.