ຊົມເຊີຍເຈົ້າໜ້າທີ່! ທຳລາຍຢາສູບນໍາເຂົ້າຜິດກົດໝາຍ 35 ແກັດ ມູນຄ່າ 80 ລ້ານກວ່າກີບ

ຊົມເຊີຍເຈົ້າໜ້າທີ່! ທຳລາຍຢາສູບນໍາເຂົ້າຜິດກົດໝາຍ 35 ແກັດ ມູນຄ່າ 80 ລ້ານກວ່າກີບ

15th December 2019 0 By Admin

ໃນວັນທີ 12 ທັນວາ 2019 ພະແນກຕຳຫຼວດປ້ອງກັນເສດຖະກິດ ຫ້ອງຕຳຫຼວດ ປກສ ນວ ໄດ້ທຳລາຍສິນຄ້າປະເພດຢາສູບທີ່ນຳເຂົ້າຈາກປະເທດໃກ້ຄຽງ ໂດຍບໍ່ມີເອກະສານອະນຸຍາດນຳເຂົ້າຈາກພາກສ່ວນທີ່ກ່ຽວຂ້ອງ ໂດຍມີ ພັທ ຄຳພອນ ພົມມະຈັນ ຮອງຫົວໜ້າພະແນກຕຳຫຼວດປ້ອງກັນເສດຖະກິດ ຜູ້ຊີ້ນໍາວຽກງານຕ້ານການຄ້າຂາຍເຖື່ອນ ຫ້ອງຕຳຫຼວດ ປກສ ນະຄອນຫຼວງວຽງຈັນ, ມີບັນດາພະນັກງານທີ່ກ່ຽວຂ້ອງເຂົ້າຮ່ວມ.

*
ຢາສູບຈຳນວນດັ່ງກ່າວ ໄດ້ນຳໄປຖິ້ມທີ່ສາງຖິ້ມຂີ້ເຫຍື້ອ ຫຼັກ 32 ເມືອງໄຊທານີ ນະຄອນຫຼວງວຽງຈັນ, ພັທ ຄຳພອນ ພົມມະຈັນ ໃຫ້ຮູ້ວ່າ: ສິນຄ້າທີ່ນຳມາທຳລາຍຄັ້ງນີ້ ແມ່ນສິນຄ້າທີ່ລັກລອບນຳເຂົ້າມາຈຳໜ່າຍ ໂດຍບໍ່ມີເອກະສານອະນຸຍາດນຳເຂົ້າຈາກພາກສ່ວນທີ່ກ່ຽວຂ້ອງ; ເຊິ່ງໃນວັນທີ 25 ພະຈິກ 2019 ເວລາ 15 ໂມງ ໄດ້ຮັບລາຍງານຈາກພົນລະເມືອງດີວ່າ: ມີລົດກະບະຮຸ່ນໄດ ໝາຍເລກທະບຽນ ກຈ 0065 ໄດ້ເຄື່ອນຍ້າຍສິນຄ້ານຳເຂົ້າທີ່ຜິດກົດໝາຍ ອອກຈາກຄິວລົດເມສາຍໃຕ້ ມຸ່ງໜ້າມານະຄອນຫຼວງວຽງຈັນ.

ຈາກນັ້ນ, ເຈົ້າໜ້າທີ່ຕຳຫຼວດປ້ອງກັນເສດຖະກິດ ໄດ້ອອກຕິດຕາມກວດກາ ຈິ່ງພົບເຫັນລົດເປົ້າໝາຍຢູ່ເຂດບ້ານດົງຊຽງດີ ເມືອງນາຊາຍທອງ ນະຄອນຫຼວງວຽງຈັນ ຜ່ານການກວດກາສິນຄ້າ ຂອງເຈົ້າໜ້າທີ່ຕຳຫຼວດ ພົບເຫັນສິນຄ້າບໍ່ໄດ້ເສຍພາສີນຳເຂົ້າຈາກພາກສ່ວນທີ່ກ່ຽວຂ້ອງມີ: ຢາສູບຍີ່ຫໍ້ເອເຊ່ຊອງສີຟ້າ 3 ແກັດ, ຍີ່ຫໍ້ເອເຊ່ຊອງສີດຳ 13 ແກັດ, ຍີ່ຫໍ້ປິ່ນຟາຍ ຊອງສີຟ້າ 5 ແກັດ, ຍີ່ຫໍ້ແອວແອນເອັມ 1 ແກັດ, ຍີ່ຫໍ້ມາລູນາ 11 ແກັດ, ຍີ່ຫໍ້ປີລາມິດ 2 ແກັດ ລວມທັງໝົດ 35 ແກັດ, ເປັນເງິນ 80 ລ້ານກວ່າກີບ.