ສຳຜັດຄວາມງົດງາມທີ່ເປັນເອກະລັກ ຖໍ້າຈອມອອງ ແຂວງ ອຸດົມໄຊ

ສຳຜັດຄວາມງົດງາມທີ່ເປັນເອກະລັກ ຖໍ້າຈອມອອງ ແຂວງ ອຸດົມໄຊ

13th December 2019 0 By Admin

ອຸດົມໄຊ ເປັນແຂວງທີ່ຕັ້ງຢູ່ ຈຸດໃຈກາງພາກເໜືອຂອງລາວ ເຊິ່ງນັກທ່ອງທ່ຽວທີ່ຈະເດີນທາງໄປທາງໃດກໍຕາມ ບໍ່ວ່າໄປແຂວງຜົ້ງສາລີ ຫຼື ຫຼວງນ້ຳທາ ແລະ ບໍ່ແກ້ວ ຈຳເປັນຕ້ອງໄດ້ຜ່ານ ແລະ ແວ່ພັກທີ່ນີ້ຈົນໄດ້ຊື່ວ່າ “ ຈຸດນັດພົບ ” ເປັນ ແຂວງທີ່ມີພູຜາປ່າດົງ, ຫ້ວຍນໍ້າລໍາເຊ ແລະ ທິວທັດທຳມະຊາດອັນອຸດົມສົມບູນ, ແຂວງປະກອບມີ 12 ຊົນເຜົ່າ ທີ່ມີວັດທະນະທຳແຕກຕ່າງກັນໄປ, ອາໄສຢູ່ຢ່າງສາມັກຄີຮັກແພງ ແລະ ມີນໍ້າໃຈດີງາມເອື້ອເຟື້ອເພື່ອແຜ່ ແລະ ຍິນດີຕ້ອນຮັບນັກທ່ອງທ່ຽວທີ່ມາທ່ຽວ.

ອຸດົມໄຊ ເປັນແຂວງທີ່ມີສະຖານທີ່ທ່ອງທ່ຽວທຳມະຊາດ ແລະ ປະຫວັດສາດທີ່ສວຍງາມ ທີ່ນັກທ່ອງທ່ຽວໃຫ້ ຄວາມສົນໃຈ ເປັນຕົ້ນແມ່ນປ່າສະຫງວນແຫ່ງຊາດນໍ້າກັດຢໍລະປາ, ຖໍ້າຈອມອອງ, ຕາດຕະແລ, ຕາດນໍ້າແຮງ, ອ່າງນໍ້າຫີນ, ນໍ້າລອດພູ, ປ່າໄມ້ລໍາທຽນ ບ້ານຈອມແລງ, ຕາດນໍ້າແຈ່, ຖໍ້າມົກແຟກ, ວັດພະເຈົ້າສິງຄຳ ແລະ ອີກຫຼາຍສະຖານທີ່. ນອກຈາກນັ້ນ, ແຂວງຍັງເປັນທີ່ລືນາມທາງດ້ານອາຫານທີ່ເປັນເອກະລັກຂອງທ້ອງຖິ່ນ ເຊິ່ງປະກອບດ້ວຍອາຫານ 3 ຊົນເຜົ່າຫຼັກ ເຊັ່ນ: ເຜົ່າລື້, ເຜົ່າກຶມມຸ ແລະ ເຜົ່າມົ້ງ ເປັນທີ່ນິຍົມຂອງນັກທ່ອງທ່ຽວທີ່ໄດ້ມາທ່ຽວພາຍໃນແຂວງ ເປັນຕົ້ນແມ່ນຊຸບຜັກແກບ, ເອາະໂອດໂລດ, ເຂົ້າປຸ້ນນາແລ, ແຈ່ວນໍ້າປູ, ຫຼາມບອນ, ລາບຊີ້ນ, ໄສ້ອົ່ວເພ້ຍຄວາຍ, ສົ້ມຊີ້ນຄວາຍໃສ່ໝາກມາດ, ໝົກບອນ ແລະ ອື່ນໆອີກຫຼາຍລາຍການທີ່ມີລົດຊາດແຊບ.

ດັ່ງນັ້ນ, ໃນມື້ນີ້ຜູ້ຂຽນຈະພາທ່ານຜູ້ອ່ານໄປຮັບຮູ້, ທ່ຽວຊົມກ່ຽວກັບຖໍ້າຈອມອອງ ເຊິ່ງເປັນຖໍ້າທີ່ໃຫຍ່ທີ່ສຸດຂອງ ແຂວງ ເພື່ອເປັນບົດຮຽນແກ່ທ່ານຜູ້ອ່ານໃນການສຶກສາ ກໍຄືເປັນການປູທາງພື້ນຖານອຳນວຍຄວາມສະດວກເບື້ອງຕົ້ນແກ່ທ່ານທີ່ກຳລັງຈະມີແຜນໄປທ່ຽວຖໍ້ານີ້ໃນອະນາຄົດອັນໃກ້ນີ້.

ຖໍ້າຈອມອອງ ຕັ້ງຢູ່ບ້ານຈອມອອງ ເມືອງໄຊ ຫ່າງຈາກເທສະບານເມືອງໄປປະມານ 45 ກິໂລແມັດ ໄປຕາມເສັ້ນທາງ 13 ເໜືອ ຫາ ແຂວງຫຼວງນໍ້າທາ ຕະຫຼອດເສັ້ນທາງໄປຫາຖໍ້າຈະມີບັນດາບ້ານວັດທະນະທໍາຂອງຊົນເຜົ່າຕ່າງໆ ມີສວນໄຮ່ນາຂອງພໍ່ແມ່ປະຊາຊົນ ແລະ ທິວທັດທຳມະຊາດອັນສວຍສົດງົດງາມ ເປັນອີກໜຶ່ງຄວາມປະທັບໃຈທີ່ຫາໄດ້ຍາກ ເມື່ອເດີນທາງໄປປະມານ 24 ກິໂລແມັດ. ຫຼັງຈາກນັ້ນ, ລ້ຽວຊ້າຍມືໄປຕາມທາງດິນແດງແຄບໆ. ສະນັ້ນ, ການຂັບຂີ່ຕ້ອງລະມັດລະວັງພໍສົມຄວນ, ເດີນທາງໄປປະມານ 21 ກິໂລແມັດ ກໍຈະຮອດບ້ານຈອມອອງ ເຊິ່ງເປັນບ້ານຊົນເຜົ່າກຶມມຸ.

ຕາມການບອກເລົ່າຂອງຊາວບ້ານ ຄຳວ່າ ຈອມອອງ ແມ່ນມີຄວາມໝາຍສອງຄວາມໝາຍ “ ຈອມ ” ເປັນພາສາກຶມມຸ ເຊິ່ງແປວ່າ “ ຕິດຕາມໄປ ຫຼື ນຳກົ້ນໄປ ” ສ່ວນຄຳວ່າ “ ອອງ ” ແປວ່າ ໂຕຕໍ່ດິນ, ໃນສະໄໝກ່ອນປະຊາຊົນເມືອງນາໝໍ້ ໄດ້ໄປຄ້ອງຕໍ່ ຫຼື ຫາເອົາຮັງໂຕຕໍ່ ໂດຍໄດ້ເອົາຍອງຝ້າຍນ້ອຍໆອ່ອນໆມັດອາຫານໃສ່ຕີນໂຕຕໍ່ ແລ້ວກໍປ່ອຍຕໍ່ໃຫ້ບິນກັບໄປຫາຮັງ. ຈາກນັ້ນ, ປະຊາຊົນຈຶ່ງພາກັນນຳໂຕຕໍ່ນັ້ນໄປຈົນພົບເຫັນເຂດພື້ນທີ່ອ້ອມຂ້າງບໍລິເວນຖໍ້າແຫ່ງນີ້ ເຊິ່ງເປັນເຂດທີ່ອຸດົມສົມບູນ ເໝາະສົມໃນການຜະລິດກະສິກຳ, ປູກຝັງ, ລ້ຽງສັດ. ຕໍ່ມາປະຊາຊົນຈຶ່ງພາກັນຍ້າຍຖິ່ນຖານມາຕັ້ງເປັນທີ່ຢູ່ອາໄສ ແລະ ນັບມື້ຫຼາຍຄອບຄົວຈົນກາຍເປັນບ້ານດັ່ງທຸກວັນນີ້. ສະນັ້ນ, ຈຶ່ງເອີ້ນບ້ານນີ້ວ່າບ້ານຈອມອອງ ຈົນເທົ່າທຸກວັນນີ້.

ເມື່ອຮອດບ້ານຈອມອອງ ນັກທ່ອງທ່ຽວສາມາດພັກຜ່ອນກິນເຂົ້າກິນນໍ້າທີ່ເປັນເອກະລັກຂອງເຜົ່າກຶມມຸ ຕື່ມກຳລັງຕາມຮ້ານອາຫານທົ່ວໄປຕ່າງໆ ແລະ ທ່ຽວຊົມສຳຜັດວິຖີຊີວິດຮີດຄອງປະເພນີຂອງຊາວເຜົ່າກຶມມຸ ປະມານ 1 – 2 ຊົ່ວໂມງກໍໄດ້ ເປັນຕົ້ນແມ່ນທ່ຽວຊົມການຕໍ່າຫູກ, ຫຍິບປັກຖັກແສ່ວ ແລະ ຫັດຖະກຳຕ່າງໆຂອງຊົນເຜົ່າກຶມມຸ. ຫຼັງຈາກນັ້ນ, ຈຶ່ງເດີນທາງຕໍ່ໄປຫາຖໍ້າ ເຊິ່ງທາງເຂົ້າສູ່ຖໍ້າປະກອບມີ 2 ເສັ້ນທາງດ້ວຍກັນ ຕາມຄວາມມັກຂອງນັກທ່ອງທ່ຽວ ເຊັ່ນ: ເສັ້ນທາງຍ່າງ ໂດຍຍ່າງລັດແຕ່ບ້ານຜ່ານທົ່ງນາໄປ ປະມານ 2 ກິໂລແມັດ ແລ້ວຮອດຖໍ້າ ແລະ ທາງລົດ ເຊິ່ງເປັນລົດທີ່ຂີ່ໄປຕາມທາງດິນແດງປະມານ 3 ກິໂລແມັດ.

ການມາທ່ຽວຖໍ້າແຫ່ງນີ້ ໂດຍປົກກະຕິນັກທ່ອງທ່ຽວຕ່າງປະເທດມັກຈະໃຊ້ທາງຍ່າງເປັນສ່ວນຫຼາຍ ເພາະນອກຈາກເປັນການເດີນທາງເຕັມໄປດ້ວຍ ຄວາມຕື່ນຕາຕື່ນໃຈ, ທ່ຽວຊົມທິວທັດທຳມະຊາດ, ພູຜາປ່າດົງ ຕາມສອງຂ້າງທາງ, ຖ່າຍຮູບເກັບພາບເປັນທີ່ລະນຶກ ແລ້ວຍັງໄດ້ສຳຜັດກັບອາກາດທີ່ບໍລິສຸດ, ເຢັນສະບາຍມີລົມພັດເບົາໆ. ເມື່ອເດີນທາງໄປໃກ້ຮອດຖໍ້າຈະມີຫ້ວຍນໍ້າ ມີນໍ້າໄຫຼເຢັນໃສສະອາດ, ຫຼັງຈາກຍ່າງຂ້າມຫ້ວຍດັ່ງກ່າວຈຶ່ງໄປຮອດຖໍ້າ, ບໍລິເວນປາກຖ້ຳເປັນຖ້ຳໃຫຍ່, ຍາວ ແລະ ສວຍງາມທີ່ສຸດຂອງແຂວງເລີຍກໍວ່າໄດ້ ເຊິ່ງອ້ອມຂ້າງຖໍ້າປະກອບດ້ວຍລະບົບນິເວດທຳມະຊາດພູຜາປ່າໄມ້ທີ່ຂຽວຂະຈີຢ່າງອັດສະຈັນ, ມີຫຼາຍຊ່ອງທາງເຂົ້າ – ອອກ ພາຍໃນຖ້ຳຍາວປະມານ 16 ກິໂລແມັດ, ກວ້າງປະມານ 15 – 50 ແມັດ ແລະ ຄວາມສູງປະມານ 25 – 100 ແມັດ; ຢູ່ໃນຖ້ຳບາງບ່ອນມີສາຍນ້ຳໄຫຼຜ່ານ, ມີນົມຜາ, ຫີນຍ້ອຍທີ່ມີລວດລາຍສວຍງາມ, ຫີນແກ້ວເປັນສີຂາວເຫຼື້ອມຄືກັບເພັດພອຍເປັນກ້ອນໃຫຍ່ປະດັບປະດາຫ້ອຍຢູ່ຕາມຝາຫີນຄືກັບດອກໄຟຟ້າຢ່າງສວຍງາມປານຈິດຕະກອນປັ້ນແຕ່ງແຕ້ມມາ.

ນັກທ່ອງທ່ຽວສາມາດເຂົ້າໄປຊົມລວດລາຍຕ່າງໆໃນຖ້ຳໄດ້ ປະມານ 500 ແມັດ ເນື່ອງຈາກປັດຈຸບັນຂະແໜງການທ່ອງທ່ຽວໄດ້ນຳໄຟຟ້າແສງຕາເວັນເຂົ້າໄດ້ 500 ແມັດເທົ່ານັ້ນ. ສະນັ້ນ, ຫາກຈະເຂົ້າໄປເລິກກວ່ານັ້ນຕ້ອງມີອຸປະກອນໄຟຟ້າພ້ອມດ້ວຍຜູ້ຊ່ຽວຊານໄປນຳໃນຖ້ຳຍັງເປັນລັກສະນະເດີມ ຄົງທຳມະຊາດ ແລະ ຍັງບໍ່ໄດ້ຮັບການດັດແປງແຕ່ຢ່າງໃດ.

ຖ້ຳນີ້ໄດ້ຄົ້ນພົບໃນປີ ຄ.ສ 2005 ແລະ ເປີດບໍລິການປີ ຄ.ສ 2007 ເຊິ່ງໄດ້ຜ່ານການສຳຫຼວດຂອງນັກວິທະສາດຈາກສະຫະພາບເອີຣົບ ໃນປີ 2009 ແລະ ປີ 2010 ເປັນຖ້ຳທີ່ເໝາະສົມແກ່ການພັດທະນາເປັນສະຖານທີ່ທ່ອງທ່ຽວແບບຍືນຍົງ.

ຖໍ້າຈອມອອງ ແມ່ນເອີ້ນຕາມຊື່ຂອງບ້ານ, ປະຊາຊົນທ້ອງຖິ່ນເຄີຍເອີ້ນຊື່ຖ້ຳນີ້ໃນເມື່ອກ່ອນວ່າ “ ຖ້ຳເຈຍ ” ຫຼື ຖ້ຳຂີ້ເຈຍ ຍ້ອນວ່າສະໄໝກ່ອນໃນຖໍ້າມີໂຕເຈຍມາອາໄສຢູ່ເປັນຈຳນວນຫຼວງຫຼາຍ, ປະຊາຊົນເຂດຈອມອອງ ໄດ້ພາກັນຂຸດເອົາຂີ້ໂຕເຈຍຢູ່ໃນຖ້ຳມາເຮັດໝື້ປືນແກັບ. ດັ່ງນັ້ນ, ປະຊາຊົນເຂດຈອມອອງ ຈຶ່ງໄດ້ພາກັນເອີ້ນຊື່ຂອງຖ້ຳນີ້ວ່າ ຖ້ຳເຈຍ ຫຼື ຖ້ຳຂີ້ເຈຍ ແຕ່ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງອຸດົມໄຊ ໄດ້ໂຄສະນາໃຫ້ເອີ້ນຊື່ວ່າ ຖ້ຳຈອມອອງ ຕາມຊື່ຂອງບ້ານດັ່ງກ່າວ.

 

 

ທີ່ມາ, ທັນຂ່າວ