ສຳຜັດປະເພນີ ແຫ່ຜາສາດເຜີ້ງ ງານບຸນນະມັດສະການພະທາດຫຼວງນໍ້າທາ

ສຳຜັດປະເພນີ ແຫ່ຜາສາດເຜີ້ງ ງານບຸນນະມັດສະການພະທາດຫຼວງນໍ້າທາ

13th December 2019 0 By Admin

ໃນຕອນແລງ ຂອງວັນທີ 10 ທັນວາ 2019 ໄດ້ມີການແຫ່ຜາສາດເຜີ້ງ 9 ໜູ່ບ້ານເທດສະບານແຂວງ ແລະ ຄະນະສົງວັດຫຼວງຂອນ, ມາໃນຄໍ່າຄືນຂອງວັນດຽວກັນໄດ້ມີການສະແດງສີນລະປະວັນນະຄະດີ, ງານບຸນນະມັດ ສະການພະທາດຫຼວງນໍ້າທາ ປະຈໍາປີ 2019 ໄດ້ເລີ່ມຄົບງັນຕາມຮີດຄອງປະເພນີທີ່ເຄີຍປະຕິບັດກັນມາ, ເຊິ່ງແຕ່ລະປີໄດ້ພັດປ່ຽນກັນເປັນເຈົ້າພາບ ໂດຍສະເພາະປີ 2019 ນີ້ແມ່ນບ້ານໜອງບົວວຽງເປັນເຈົ້າພາບຈັດງານບຸນນະມັດສະການພະທາດຫຼວງນໍ້າທາ.

*

ງານບຸນດັ່ງກ່າວມີຫຼາຍກິດຈະກຳສ້າງຄວາມເບີກບານມ່ວນຊື່ນ ໃຫ້ແກ່ຜູ້ທີ່ມາທ່ຽວງານບຸນ. ມາໃນຕອນເຊົ້າວັນທີ 11 ທັນວາ 2019 ກົງກັບມື້ຂຶ້ນ 15 ຄໍາ ເດືອນ 1 ລາວ ປີ ພສ 2563 ໄດ້ມີພິທີໃສ່ບາດຖວາຍສັງຄະທານໃຫ້ແກ່ຜູ້ທີ່ລ່ວງລັບໄປແລ້ວ ແລະ ປາດຖະໜາເອົາແຕ່ສີ່ງດິງາມເຂົ້າມາໃຫ້ແກ່ຕົນ ແລະ ຄອບຄົວ, ເຂົ້າຮ່ວມໃສ່ບາດໂດຍ ທ່ານ ເພັດຖາວອນ ພິລະວັນ ເຈົ້າແຂວງໆຫຼວງນໍ້າທາ ພ້ອມດ້ວຍການນຳແຂວງ,ເມືອງ ແລະ ມວນຊົນຊາວແຂວງຫຼວງນໍ້າທາເຂົ້າຮ່ວມຢ່າງພ້ອມພຽງ.

*

ດຈະກຳໃສ່ບາດຖວາຍສັງຄະທານຢູ່ງານບຸນນະມັດສະການພະທາດຫຼວງນໍ້າທາ ແມ່ນມີຂຶ້ນທຸກປີ ມີທັງແຂກພາຍໃນ ແລະ ຕ່າງປະ ເທດ ຕະຫຼອດຮອດຊາວພຸດທະສາສະນິກະຊົນຊາວແຂວງຫຼວງນໍ້າທາ ເຂົ້າມາຮ່ວມເປັນຈຳນວນຫຼວງຫຼາຍ ເຮັດໃຫ້ມີບັນຍາກາດ ຄຶກຄື້ນ ທັງເປັນການເຕົ້າໂຮມຄວາມສາມັກຄີໃຫ້ເປັນປຶກແຜ່ນ ຮັກສາໄດ້ວັດທະນະທຳຮີດຄອງປະເພນີອັນດີງາມຂອງຊາດລາວ ທີ່ເຄີຍສືບທອດກັນມາແຕ່ດຶກດຳບັນ ໃຫ້ຢູ່ຄູ່ກັບຄົນລາວທີ່ເກີດໃໝ່ໃຫຍ່ລຸນໄດ້ສືບທອດ ແລະ ເສີມຂະຫຍາຍມູນເຊື້ອດັ່ງກ່າວໃຫ້ມີຄວາມຍືນຍົງຊົ່ວເຊັ່ນລູກເຊັ່ນຫຼານຕະຫຼອດໄປ.

*

ທີ່ມາ: ຂ່າວສານຫຼວງນໍ້າທາ