ປ່ຽນຊີວິດໄດ້..ເພາະໄດ້ຟັງພຣະສັທທັມ

ປ່ຽນຊີວິດໄດ້..ເພາະໄດ້ຟັງພຣະສັທທັມ

4th November 2019 0 By Lao Admin

ສະໄໝໜຶ່ງພຣະຜູ້ມີພຣະພາຄເຈົ້າປະທັບຢູ່ໃນພຣະວິຫາຣເວລຸວັນ ອັນເປັນທີ່ພຣະຣາຊະທານເຫຍື່ອແກ່ກະແຕ ເຂດພຣະນະຄອຣຣາຊະຄຶ ກໍໂດຍສະໄໝນັ້ນ ນາງພຣາມມະນີຊື່ ທະນັນຊານີແຫ່ງພຣາມ…ເປັນຜູ້ເຫລື້ອມໃສຢ່າງຍິ່ງໃນພຣະພຸທທະເຈົ້າ ໃນພຣະທັມ ແລະພຣະສົງຄ໌.

 

ຄັ້ງນັ້ນ ນາງທະນັນຊານີພຣາມມະນີກຳລັງນຳພັດຕາຫານເຂົ້າໄປໃຫ້ທ່ານພຣາມພາຣະທະວາຊະໂຄຕ ກ້າວຂາພາດ ຈຶ່ງເປັ່ງອຸທານ ໓ ຄັ້ງວ່າ ຂໍນອບນ້ອມແດ່ພຣະຜູ້ມີພຣະພາຄອະຣະຫັນຕະສັມມາສັມພຸທທະເຈົ້າ ພຣະອົງຄ໌ນັ້ນ ຯລຯ ເມື່ອນາງທະນັນຊານີພຣາມມະນີກ່າວຢ່າງນີ້ແລ້ວ ພຣາມພາຣະທະວາຊະໂຄຕໄດ້ກ່າວກັບນາງທະນັນຊານີພຣາມມະນີວ່າ ເຈົ້າຍິງຊົ່ວນີ້ ບໍ່ວ່າໃນທີ່ໃດໆ ກໍກ່າວຄຸນຂອງສະມະນະໂລ້ນຢ່າງນີ້ໆ ເຈົ້າຍິງຊົ່ວ ບັດນີ້ເຮົາຈັກໄປໂຕ້ວາທະກັບພຣະສາສດາຂອງເຈົ້ານັ້ນ.

 

ນາງທະນັນຊານີພຣາມມະນີກ່າວວ່າ: ພຣາມ ຂ້ອຍຍັງບໍ່ເຫັນບຸກຄົນໃດທີ່ຈະຍົກຖ້ອຍຄຳຕໍ່ພຣະຜູ້ມີພຣະພາຄອະຣະຫັນຕະສັມມາສັມພຸທທະເຈົ້າພຣະອົງຄ໌ນັ້ນໃນໂລກ ພ້ອມທັງເທວະໂລກ ມາຣໂລກ ພຣົມມະໂລກ ໃນໝູ່ສັຕພ້ອມທັງສະມະນະພຣາມ ເທວະດາ ແລະ ມະນຸສ; ຂ້າແຕ່ພຣາມ ເອົາເຖີດ ທ່ານຈະໄປກໍໄດ້ ເມື່ອໄປແລ້ວກໍຈະຮູ້ເອງ.

 

ລຳດັບນັ້ນ ພຣາມພາຣະທະວາຊະໂຄຕໂກດຂັດໃຈ ເຂົ້າໄປຫາພຣະຜູ້ມີພຣະພາຄເຈົ້າເຖິງທີ່ປະທັບ…ເມື່ອພຣາມພາຣະທະວາຊະໂຄຕນັ່ງໃນທີ່ຄວນສ່ວນຂ້າງໜຶ່ງແລ້ວ ໄດ້ກ່າວກັບພຣະຜູ້ມີພຣະພາກເຈົ້າດ້ວຍຄາຖາວ່າ:

ບຸກຄົນຂ້າອັນໃດໄດ້ ຈຶ່ງນອນເປັນສຸຂ ຂ້າອັນໃດໄດ້ ຈຶ່ງບໍ່ເສົ້າໂສກ ຂ້າແຕ່ພຣະໂຄດົມ ພຣະອົງຄ໌ຍ່ອມຊອບໃຈການຂ້າທັມອັນໃດວ່າເປັນທັມອັນເອກ?

 

ພຣະຜູ້ມີພຣະພາກເຈົ້າຕຣັສຕອບວ່າ:

ບຸກຄົນຂ້າຄວາມໂກດໄດ້ຈຶ່ງນອນເປັນສຸຂ ຂ້າຄວາມໂກດໄດ້ຈຶ່ງບໍ່ເສົ້າໂສກ.
ພຣາມ! ພຣະອະຣິຍະເຈົ້າທັງຫລາຍຍ່ອມສັນລະເສີນການຂ້າຄວາມໂກດອັນມີມູລເປັນພິດເປັນທີ່ສຸດ ເພາະວ່າບຸກຄົນຂ້າຄວາມໂກດນັ້ນໄດ້ແລ້ວ ຍ່ອມບໍ່ເສົ້າໂສກ.

 

ເມື່ອພຣະຜູ້ມີພຣະພາກເຈົ້າຕຣັສຢ່າງນີ້ແລ້ວ ພຣາມພາຣະທະວາຊະໂຄຕໄດ້ກຣາບທູນວ່າ ຂ້າແຕ່ພຣະໂຄດົມຜູ້ຈະເຣີນ ພາສິຕຂອງພຣະອົງຄ໌ແຈ່ມແຈ້ງຫລາຍ, ຂ້າແຕ່ພຣະໂຄດົມຜູ້ຈະເຣີນ ພາສິຕຂອງພຣະອົງຄ໌ແຈ່ມແຈ້ງຫລາຍ ພຣະໂຄດົມຜູ້ຈະເຣີນຊົງປະກາດທັມໂດຍອະເນກປະຣິຍາຍ ປຽບເໝືອນບຸກຄົນຫງາຍຂອງທີ່ຂວ້ຳ ເປີດຂອງທີ່ປິດ ບອກທາງແກ່ຄົນຫລົງທາງ ຫລືສ່ອງປະທີບໄວ້ໃນທີ່ມືດ ດ້ວຍຕັ້ງໃຈວ່າ ຄົນມີດວງຕາຈັກເຫັນຮູບໄດ້ ສັນນັ້ນ; ຂ້ານ້ອຍຂໍເຖິງພຣະໂຄດົມຜູ້ຈະເຣີນ ກັບທັງພຣະທັມແລະພຣະພິກຂຸສົງຄ໌ວ່າເປັນສະຣະນະ ຂ້ານ້ອຍຂໍບັນພະຊາ ແລະອຸປະສົມບົທໃນສຳນັກຂອງພຣະໂຄດົມຜູ້ຈະເຣີນ.

 

ພຣາມພາຣະທະວາຊະໂຄຕໄດ້ບັນພະຊາ ໄດ້ອຸປະສົມບົທແລ້ວໃນສຳນັກຂອງພຣະຜູ້ມີພຣະພາຄເຈົ້າ ເມື່ອທ່ານພາຣະທະວາຊະອຸປະສົມບົດແລ້ວບໍ່ນານ ຫລີກໄປຢູ່ຜູ້ດຽວບໍ່ປະໝາດ ມີຄວາມພຽນ ມີຕົນສົ່ງໄປຢູ່ ບໍ່ນານເທົ່າໃດກໍກະທຳໃຫ້ແຈ້ງເຊິ່ງຄຸນວິເສດອັນຍອດຢ້ຽມ ເປັນທີ່ສຸດແຫ່ງພຣົມມະຈັນ ເຊິ່ງກຸລະບຸຕທັງຫລາຍຜູ້ອອກຈາກເຮືອນບວດເປັນບັນພະຊິຕໂດຍຊອບ ມີຄວາມຕ້ອງການ ດ້ວຍປັນຍາອັນຍິ່ງເອງໃນປັດຈຸບັນເຂົ້າເຖິງຢູ່ ໄດ້ຮູ້ຊັດວ່າ ຊາຕສິ້ນແລ້ວ ພຣົມມະຈັນຢູ່ຈົບແລ້ວ ກິຈທີ່ຄວນທຳໄດ້ທຳສຳເລັດແລ້ວ ກິຈອື່ນເພື່ອຄວາມເປັນຢ່າງນີ້ບໍ່ໄດ້ມີອີກ ທ່ານພຣະພາຣະທະວາຊະໄດ້ເປັນພຣະອະຣະຫັນຕ໌ອົງຄ໌ໜຶ່ງໃນບັນດາພຣະອະຣະຫັນຕ໌ທັງຫລາຍ.

 

ສຸຕຕັນຕະປິດົກ ສັງຍຸຕຕະນິກາຍ ສະຄາຖະວັກ ໑໕/໑໙໔-໑໙໕/໖໒໖-໖໓໐

ທີ່ມາ: ເພຈ ແສງທັມນໍາຊີວິດ