ຜູ້ແທນໜັງສືພິມກອງທັບລາວ ຢ້ຽມຢາມ ກົມກອງທະຫານກອງທັບປະຊາຊົນຫວຽດນາມ

ຜູ້ແທນໜັງສືພິມກອງທັບລາວ ຢ້ຽມຢາມ ກົມກອງທະຫານກອງທັບປະຊາຊົນຫວຽດນາມ

11th December 2019 0 By Admin

ໃນວັນທີ 11 ທັນວາ 2019 ຜ່ານມາ ຄະນະຜູ້ແທນໜັງສືພິມ ກອງທັບ ປະຊາຊົນລາວ ໄດ້ສືບຕໍ່ເຄື່ອນໄຫວ ຢ້ຽມຢາມ ແລະ ເຮັດວຽກຢູ່ກອງພົນ 308, ກອງພັນໃຫຍ່ 102 ແລະ ຢ້ຽມຢາມ ໂຮງຮຽນ ນາຍທະຫານບົກ ເລກ 1 ກອງທັບ ປະຊາຊົນ ຫວຽດນາມ ເພື່ອເກັບກໍາຂໍ້ມູນ ຂ່າວສານ ໂຄສະນາ ໂອກາດສະເຫລີມ ສະຫລອງ ວັນສ້າງຕັ້ງ ກອງທັບປະຊາຊົນຫວຽດນາມ ຄົບຮອບ 75 ປີ ແລະ ວັນບຸນປວງຊົນປ້ອງກັນຊາດ ຫວຽດນາມ ຄົບຮອບ 30 ປີ.

ການລົງເຄື່ອນໄຫວຢ້ຽມຢາມຄັ້ງນີ້, ຄະນະຜູ້ແທນໜັງສືພິມກອງທັບ ປະຊາຊົນລາວ ໄດ້ພົບປະກັບບັນດາ ຄະນະພັກ-ຄະນະບັນຊາ ກົມກອງ ທະຫານ ກອງທັບ ປະຊາຊົນຫວຽດນາມ ແລະ ໄດ້ຮັບຟັງການລາຍງານ ໜ້າທີ່ພາລະບົດບາດ,ມູນເຊື້ອ ຂອງ ກອງພົນ 308 ແລະ ກອງພັນໃຫຍ່ 102 ທີ່ມີປະຫວັດມູນເຊື້ອໃນການຕໍ່ສູ້ກູ້ຊາດ ກັບ ພວກຈັກກະພັດຕ່າງດ້າວ ແບບເກົ່າ ແລະ ແບບໃຫມ່ ໃນຫລາຍບັ້ນຮົບ.

ໃນນັ້ນ ຍັງໄດ້ຮ່ວມສູ້ຮົບໃນບັນດາບັ້ນຮົບໃນລາວ ສາມາດ ກອບກູ້ເອົາເອກະລາດ ມາ ສູ່ປວງຊົນທັງສອງຊາດ ເຮັດໃຫ້ບັນດາກົມກອງ ມີປະຫວັດມູນເຊື້ອທີ່ດີເດັ່ນ ໃນການສູ້ຮົບ ກໍຄືການສ້າງສາພັດທະນາປະເທດຊາດ ໃນໄລຍະໃຫມ່ ໄປພ້ອມໆກັບ ການກໍ່ສ້າງພະນັກງານ-ນັກຮົບ ໃຫ້ມີຄວາມໜັກແໜ້ນເຂັ້ມແຂງ. ເຊິ່ງໃນໄລຍະຜ່ານມາ ພະນັກງານ-ນັກຮົບ ກອງພົນ 308 ກໍຄື ກອງພັນໃຫຍ່ 102 ນອກຈາກຈະປະຕິບັດຫນ້າທີ່ໃນສະຫນາມຮົບແລ້ວ ຍັງໄດ້ປະຕິບັດຫນ້າ ໃນສະຫນາມຮົບ ແນວຄິດ ໂດຍໃຊ້ສື່ມວນຊົນ ໃນການໂຄສະນາເຜີຍແຜ່ສຶກສາອົບຮົມການເມືອງ-ແນວຄິດ ແລະ ຕອບຕ້ານກຸ່ມຄົນບໍ່ຫວັງດີ.

ຈາກນັ້ນ, ຄະນະຜູ້ແທນ ໜັງສືພິມກອງທັບ ປະຊາຊົນລາວ ຍັງໄດ້ໄປ ຢ້ຽມຢາມ ນັກສຶກສາ ກອງທັບ ປະຊາຊົນ ລາວ ທີ່ ສຶກສາຢູ່ ໂຮງຮຽນ ນາຍທະຫານບົກ ເລກ 1 ກອງທັບ ປະຊາຊົນຫວຽດນາມ ເພື່ອໃຫ້ກໍາລັງໃຈ ໃນການຮໍ່າຮຽນ ໃຫ້ປະສົບຜົນສໍາເລັດ ສາມາດ ນໍາໄປຈັດຕັ້ງປະຕິບັດ ຢູ່ ກົມກອງຕົນເອງ ຢ່າງມີປະສິດທິພາບ.

ທີ່ມາ: Lao people’s Army News