ລັດຖະບານລຸກຊໍາບວກຊ່ວຍເຫຼືອລ້າ ສ້າງອາຄານຮຽນຫຼັງໃໝ່ ແກ່ນ້ອງນັກຮຽນບ້ານຈອມສີ

ລັດຖະບານລຸກຊໍາບວກຊ່ວຍເຫຼືອລ້າ ສ້າງອາຄານຮຽນຫຼັງໃໝ່ ແກ່ນ້ອງນັກຮຽນບ້ານຈອມສີ

10th December 2019 0 By Admin

ໂຄງການກໍ່ສ້າງອາຄານຮຽນປະຖົມ ແລະ ລະບົບນໍ້າລິນ ໃຫ້ແກ່ນ້ອງນັກຮຽນ ຢູ່ບ້ານຈອມສີ ເມືອງ ຫ້ວຍຊາຍ ແຂວງ ບໍ່ແກ້ວ ໄດ້ຮັບການຊ່ວຍເຫຼືອລ້າ ຈາກລັດຖະບານ ປະເທດລຸກຊຳບວກ. ເຊິ່ງໂຄງການນີ້ໄດ້ເລີ່ມລົງມືປະຕິບັດມາແຕ່ ວັນທີ 10 ມີນາ 2019 ມາຮອດວັນທີ 29 ພະຈິກ 2019 ສຳເລັດ 100%. ສ່ວນ ລະບົບນໍ້າລິນ ເລີ່ມກໍ່ສ້າງມາແຕ່ ວັນທີ 15 ມິຖຸນາ 2019 ເຖິງວັນທີ 1 ພະຈິກ 2019 ຈຶ່ງສໍາເລັດ ລວມມູນຄ່າທັງໝົດ 827 ລ້ານກີບ.

ດັ່ງນັ້ນ, ໃນວັນທີ 9 ທັນວາ 2019 ຜ່ານມາ, ຈຶ່ງໄດ້ພິທີມອບ – ຮັບອາຄານຮຽນຫຼັງໃຫມ່ ໃຫ້ໂຮງຮຽນປະຖົມ ແລະ ລະບົບນໍ້າລິນທີ່ກໍ່ສ້າງຕໍ່ເຕີມໃໝ່ ແລະ ສ້ອມແປງລະບົບເກົ່າ ໃຫ້ແກ່ນັກຮຽນ ແລະ ປະຊາຊົນ ບ້ານຈອມສີ  ໂດຍກ່າວມອບຕາງໜ້າບໍລິສັດແສງຟ້າລີ ກໍ່ສ້າງເຄຫາ ສະຖານຂົວທາງ ແລະ ຊົນລະປະທານ ກ່າວຮັບນາຍບ້ານຈອມສີ ເຂົ້າຮ່ວມມີ ທ່ານ ຄໍາແປງ ໃຈຍະສັກ ເຈົ້າເມືອງໆຫ້ວຍຊາຍ, ອໍານາດການປົກຄອງບ້ານ, ພາກສ່ວນທີ່ກ່ຽວຂ້ອງ ແລະ ພໍ່ແມ່ປະຊາຊົນ ເຂົ້າຮ່ວມ.


ທ່ານ ນາງ ສຸພັດສາ ວັນນະສີ ຕາງຫນ້າບໍລິສັດ ແສງຟ້າລີ ກໍ່ສ້າງສ້ອມແປງ ເຄຫາສະຖານ ຂົວທາງ ແລະ ຊົນລະປະທານ, ໄດ້ຂຶ້ນລາຍງານການຈັດຕັ້ງປະຕິບັດໃນໄລຍະຜ່ານມາ, ໂຄງການກໍ່ສ້າງອາຄານໂຮງຮຽນປະຖົມສຶກສາ ແລະ ຕໍ່ເຕີມລະບົບນໍ້າລິນ ບ້ານຈອມສີ ເມືອງຫ້ວຍຊາຍ ແຂວງບໍ່ແກ້ວ, ໄດ້ຮັບການອະນຸມັດທຶນຊ່ວຍເຫຼືອລ້າຈາກ ປະເທດລຸກຊໍາບວກ.

ເຊິ່ງໄດ້ເລີ່ມລົງມືຈັດຕັ້ງປະຕິບັດໃນການກໍ່ສ້າງມາແຕ່ ວັນທີ 10 ມີນາ 2019 ເປັນຕົ້ນມາ ເຖິງວັນທີ 29 ພະຈິກ 2019 ໄດ້ສໍາເລັດໃນການກໍ່ສ້າງ 100%, ອາຄານ ຮຽນ 1 ຫຼັງ, ປະກອບມີ 4 ຫ້ອງຮຽນ, 1 ຫ້ອງການຄູ ມີຂະຫນາດ 9 x 36 ແມັດ, ໂຄງສ້າງເປຕົງເສີມເຫຼັກ, ຫຼັງຄາມຸງດ້ວຍກະເບື້ອງ, ຝາກໍ່ດ້ວຍດີນຈີ່ ແລະ ຫ້ອງນໍ້າ4 ຫ້ອງ, ໃຊ້ເວລາໃນການກໍ່ສ້າງ 5 ເດືອນ ມູນຄ່າໃນການກໍ່ສ້າງ 675 ລ້ານກີບ ແລະ ການ ກໍ່ສ້າງຕໍ່ເຕີມລະບົບນໍ້າລິນ ເລີ່ມກໍ່ສ້າງມາແຕ່ ວັນທີ 15 ມິຖຸນາ 2019 ເຖິງວັນທີ 1 ພະຈິກ 2019 ຈຶ່ງສໍາເລັດ ຄວາມຍາວແຕ່ຫົວງານຫາບ້ານ 2.600 ແມັດ, ແບ່ງອອກເປັນ 4 ຫົວກ໋ອກ, ໃຊ້ເວລາໃນການກໍ່ສ້າງ 4 ເດືອນ, ລວມມູນຄ່າໃນການກໍ່ສ້າງ 152 ລ້ານກ່ວາກີບ.

 

ທີ່ມາ, ໜັງສືພິມບໍ່ແກ້ວ Bokeo Newspaper